وقۋ-اعارتۋ ءمينيسترى عاني بەيسەمباەۆ الەۋمەتتىك جەلىلەردە الماتى وبلىسىنداعى مەكتەپتەرگە قاتىستى تاراعان شاعىمدارعا وراي پىكىر ءبىلدىردى. شاعىمدا وقۋشىلار ءوز قۇقىقتارىنىڭ بۇزىلىپ جاتقانىن جانە مەكتەپ اسحانالارىندا سانيتارلىق تالاپتاردىڭ ساقتالمايتىنىن ايتقان, دەپ حابارلايدى Egemen.kz.
«وقۋشىلاردان كەلىپ تۇسكەن الماتى وبلىسىنداعى جاعدايعا قاتىستى شاعىم نازاردان تىس قالدىرۋعا بولمايتىن ماسەلە. بۇل وقۋشىلاردىڭ قۇقىقتارىنىڭ بۇزىلۋى مەن مەكتەپتەگى تاماقتانۋ قىزمەتىندە سانيتارلىق تالاپتاردىڭ ساقتالماۋى سياقتى ماڭىزدى ماسەلەلەردى كوتەرەدى. مۇنداي جاعدايلار جەرگىلىكتى اتقارۋشى ورگانداردىڭ ءوز مىندەتتەرىن ءتيىستى دەڭگەيدە ورىنداماي وتىرعانىن كورسەتەدى», دەپ جازدى عاني بەيسەمباەۆ Facebook پاراقشاسىندا.
عاني بەيسەمباەۆتىڭ مالىمەتىنشە, بالالاردىڭ قۇقىقتارىن قورعاۋ ماقساتىندا مينيسترلىك ءۇش نەگىزگى زاڭعا 94 تۇزەتۋ ەنگىزگەن. وتكەن جىلى ءبىلىم بەرۋ ۇيىمدارىن تەكسەرۋ ناتيجەسىندە 24 جاعدايدا باسشىلار اكىمشىلىك جاۋاپكەرشىلىككە, ال 78 جاعدايدا تارتىپتىك جاۋاپكەرشىلىككە تارتىلعان.
«اتالعان جاعداي جەكە باقىلاۋىمدا. بالالاردىڭ قۇقىقتارىن قورعاۋ كوميتەتى مەن اۋماقتىق ءبىلىم ساپاسىن قامتاماسىز ەتۋ دەپارتامەنتىنىڭ قاتىسۋىمەن ارنايى جۇمىس كوميسسياسىن قۇرۋدى تاپسىردىم. كوميسسيا قولدانىستاعى زاڭناما اياسىندا بارلىق قاجەتتى شارالاردى قابىلدايتىن بولادى», دەدى مينيستر.سونىمەن قاتار مينيستر الماتى وبلىسىنىڭ باسشىلىعىنان بۇل جاعدايدى جان-جاقتى قاراپ, مۇنداي كەلەڭسىزدىكتەردىڭ قايتالانباۋى ءۇشىن ناقتى شارالار قابىلداۋدى كۇتەتىنىن اتاپ ءوتتى.
ەستەرىڭىزگە سالا كەتەيىك, بۇعان دەيىن قازاقستانداعى بالا قۇقىقتارى جونىندەگى ۋاكىل دينارا زاكيەۆا الماتى وبلىسىنىڭ جەتى اۋدانىندا جۇرگىزىلگەن ءانونيمدى ساۋالناما ناتيجەلەرىمەن ءبولىسىپ, بىرقاتار زاڭبۇزۋشىلىقتار انىقتالعانىن حابارلاعان ەدى.