الاتاۋدىڭ ەتەگىن تەڭ جايلاعان قازاق پەن قىرعىزدىڭ ءتۇپ تامىرى مەن تاريحى, مادەنيەتى دە ءبىر-بىرىنەن الىس ەمەس. ال وسى ەكى حالىقتىڭ ادەبيەتىن بيىككە كوتەرگەن تۇلعالار دا ءوزارا سىيلاسىپ, دوس-جار بولىپ, شىعارماشىلىق بايلانىستىڭ جوعارى دەڭگەيىن كورسەتتى. بۇل سوزىمىزگە مۇحتار اۋەزوۆ پەن شىڭعىس ايتماتوۆتىڭ سالعان دارا جولى دالەل بولا الادى.
قازىر دە قازاق-قىرعىز قالامگەرلەرى ءوزارا سىيلاستىقتىڭ, سىرلاستىقتىڭ بەينەسىن كورسەتىپ ءجۇر. بۇل كۇندەرى ەسىمى اتالعان قوس حالىققا ەتەنە تانىس سۇلتان راەۆتىڭ «جانجازا» رومانى «فوليانت» باسپاسىنان قايتالاي جارىق كورىپ, استانادا وتكەن VIII Eurosian Book Fair كىتاپ جارمەڭكەسىندە تانىستىرىلىمى ءوتىپ, وقىرمانعا جول تارتتى. جىندى جەتەۋدىڭ ءشول دالاداعى ساپارىن سۋرەتتەپ, سول ارقىلى ادامزاتقا ۇلكەن وي ايتقىسى كەلگەن قالامگەردىڭ بۇل رومانى تالاي جىلعى تىنىمسىز ەڭبەكتىڭ جەمىسى ەكەنى شىندىق. شىعارمانى وقي كەلە ءبىز ءارتۇرلى قيىندىقتارعا كەزدەسسە دە, مويىماعان جەتى كەيىپكەردىڭ ءۇمىتى مەن اڭسارى, مۇراتى مەن ماقساتى بولەك ەكەنىن تۇسىنەمىز. ءيا, جەتى ىقىلىم زاماندى كوز الدىڭىزعا اكەلەتىن جەتى كەيىپكەرى بار رومان ەندى قازاق وقىرمانىنا قولجەتىمدى.