قىتايدا ادام ءتارىزدى روبوتتار اراسىنداعى العاشقى جارتىلاي مارافون ءوتتى. تاريحتا تۇڭعىش رەت ۇيىمداستىرىلعان ەرەكشە دوداعا بەيجىڭ, شانحاي, گۋانچجوۋ, تسزيانسۋ سىندى وڭىرلەردەن 21 كاسىپورىن مەن جوعارى وقۋ ورنىنىڭ كوماندالارى قاتىسقان.
ادەتتەگى مارافوندا سپورتشىلار ءبىر ساتتە جارىستى باستاسا, بۇل سايىستا روبوتتار بىرىنەن سوڭ ءبىرى جولعا شىقتى. 21 شاقىرىمدىق جارتىلاي مارافوندا روبوتتار سپورتشىلارمەن قاتارلاسىپ جۇگىردى. قاۋىپسىزدىك ماقساتىندا ەكى توپقا بولەك جولاقتار بولىنگەن. وسىلايشا, بۇل ءىس-شارا روبوتتەحنيكا مەن جاساندى ينتەللەكت سالاسىنداعى جەتىستىكتەردى كورسەتىپ قانا قويماي, بولاشاقتا روبوتتاردىڭ قوعامدىق ومىرگە بەلسەندىرەك ارالاسۋى مۇمكىن ەكەنىن دە ايگىلەدى.