وتاندىق وزات وقۋشىلار الەمگە ايگىلى «NASA» (National Aeronautics and Space Administration – عارىش اگەنتتىگى) ۇيىمى مەن اقش ۇلتتىق عارىش قوعامى (National Space Society) ۇيىمداستىرعان ءبىلىم بايگەسىندە توپ جاردى. دارىندىلار دوداسىنا دۇنيەجۇزىنىڭ 25 ەلىنەن مەكتەپ جاسىنداعى 26 مىڭنان اسا جەتكىنشەك قاتىسقان. ال ەلىمىزدىڭ نامىسىن قورعاعان ورەندەر ەكى بىردەي جوعارى جۇلدەنى قانجىعاعا بايلادى.
«Space Settlement Contest» – مەكتەپ وقۋشىلارىنا ارنالعان جىل سايىن وتكىزىلەتىن حالىقارالىق بايقاۋ. بۇل ءبىلىم باسەكەسى قاتىسۋشىلاردىڭ ينجەنەرلىك قابىلەتىن, كرەاتيۆتى ويلاۋىن دامىتۋعا, عىلىمعا ۇمتىلىسىن ارتتىرۋعا باعىتتالعان.
وقۋ-اعارتۋ مينيسترلىگىنىڭ دەرەگىنە سۇيەنسەك, ورەندەرىمىزدىڭ «Space Settlement Contest 2025» حالىقارالىق بايقاۋىندا ۇسىنعان «YURT» جوباسى جەڭىسكە جەتىپ وتىر. كاميلا ەرتىسقىزى, ءىلياس داۋلەت, اناستاسيا تسوي, يۋليا كيمنەن قۇرالعان توپ يۋپيتەردىڭ وربيتاسىمەن قوزعالىپ, ونىڭ گانيمەد جانە كالليستو سەرىكتەرىنە جاقىنداي الاتىن اۆتونومدى عارىش ستانساسىنىڭ جوباسىن تانىستىردى. ستانسا 30 مىڭعا جۋىق ادام تۇرۋعا ارنالعان, جاساندى گراۆيتاتسيا جۇيەسىمەن جانە تولىقتاي دەربەس تىرشىلىكپەن قامتاماسىز ەتەتىن جۇيەمەن جابدىقتالعان. ءدال وسى وتاندىق وقۋشىلاردىڭ جۇمىسى ۇزدىك دەپ تانىلىپ, توپ ءبىرىنشى ورىندى ولجالادى.
ەكىنشى ورىندى ەلىمىزدەن بارعان تاعى ءبىر توپ ەنشىلەدى. ولار بايقاۋدا 45 مىڭ تۇرعىنعا ارنالعان گانيمەدتىڭ تومەنگى وربيتاسىندا ورنالاسقان عارىش ستانساسىن قۇراستىرعان. بۇل جوبانى اسان تابىلدى, ارمان تەمىربولاتوۆ, ىنكاربەك سابىرجان, توميريس قۇزباكوۆا, مۇحيدين جاپاروۆ, الىشەر باعداۋلەت, بەرىك ءۋالي, ايسۇلۋ نۇرسۇلتان, ارلان تايروۆ, اسلان باقىتتان تۇراتىن توپ ازىرلەدى. ال ولاردىڭ جەتەكشىسى – 12-سىنىپ وقۋشىسى ادىلەت ساندىقباەۆ.