1-سىنىپقا «egov.kz» ارقىلى قابىلدايدى. ەلىمىزدە ءبىرىنشى سىنىپقا ءوتىنىش قابىلداۋ ناۋقانى باستالدى. بۇل وسى جىلدىڭ 31 تامىزىنا دەيىن جالعاسادى. وقۋ-اعارتۋ مينيسترلىگىنىڭ تاراتقان اقپاراتىنا سۇيەنسەك, مەكتەپتىڭ العاشقى سىنىبىنا اتا-اناسىنىڭ ءوتىنىشى بويىنشا بالالار 6 جاستان باستاپ قابىلدانادى.
قۇجاتتار مەملەكەتتىك «egov.kz» ەلەكتروندى ۇكىمەت, جەرگىلىكتى اتقارۋشى ورگانداردىڭ اقپاراتتىق جۇيەلەرى ارقىلى قابىلدانادى. وسىعان قوسا ءداستۇرلى تۇردە دە, ياعني قاعاز نۇسقادا دا 1 ءساۋىر مەن 31 تامىز ارالىعىندا تاپسىرۋعا بولادى.
قازاقستان ازاماتتارى جالپى ءبىلىم بەرەتىن ورتا مەكتەپكە قابىلداۋعا تومەندەگى قۇجاتتاردى وتكىزۋى قاجەت:
1) اتا-انانىڭ نەمەسە زاڭدى وكىلىنىڭ ءوتىنىشى;
2) №065-ۋ نىسانىنداعى دەنساۋلىق جاعدايى تۋرالى انىقتاما جانە №052-2/ۋ نىسانىنداعى بالانىڭ دەنساۋلىق پاسپورتى;
3) ولشەمى 3ح4 سم سۋرەت (2 دانا).
شەتەل ازاماتتارى مەكتەپكە قۇجات تاپسىرۋ ءۇشىن ءوزى, ياعني ءبىلىم ۇياسىنا باراتىن بالانىڭ اتا-اناسى نەمەسە باسقا زاڭدى وكىلى قازاقستاندا ۋاقىتشا يا تۇراقتى تۇرۋى كەرەك. شەتەلدىكتەر مەكتەپكە قازاقستان رەسپۋبليكاسىندا تۇراقتى تۇرۋ قۇقىعى تۋرالى جانە تۇرعىلىقتى جەرى بويىنشا تىركەۋ تۋرالى قۇجاتتاردى ۇسىنۋى كەرەك.
ءوتىنىش دەمالىس جانە مەرەكە كۇندەردى قوسپاعاندا, دۇيسەنبىدەن جۇماعا دەيىن قابىلدانادى. وسى رەتتە مينيسترلىك قۇجات تاپسىرۋدى سوڭعى كۇندەرگە قالدىرماي, اتا-انالاردى بالاسىن مەكتەپكە بەرۋدى الدىن الا ويلاستىرۋعا شاقىردى.