اتىراۋ وبلىسىندا ەكىنشى دۇنيەجۇزىلىك سوعىسقا قاتىسقان ءتىرى مايدانگەر قالمادى. بىراق سۇراپىل شايقاستان ورالعانداردىڭ ءوزى بولماسا دا, كوزىندەي ساقتالعان جادىگەرلەر بار.
قۇرمانعازى اۋدانىندا كىندىك قانى تامعان ءيسىم قويشيەۆ ميلليونداردى مايدان دالاسىندا قالدىرعان سوعىس باستالعان جىلى 17 جاسقا تولعان ەكەن. ءبىر جىلدان سوڭ سوعىسقا اتتانعان. الدىمەن ەكى ايلىق ساپەرلەردى دايارلايتىن كۋرسقا جىبەرىلگەن. ال 1943 جىلى ۆورونەج مايدانىندا 329-گۆارديالىق ديۆيزيادا ساپەرلىك مىندەتىن اتقارىپتى. دنەپر وزەنى ماڭىندا بولعان شايقاستا كورسەتكەن ەرلىگى ءۇشىن ءىىى دارەجەلى «داڭق» وردەنىمەن ماراپاتتالعان. جەڭىس ساعاتى جاقىنداعان 1945 جىلدىڭ ساۋىرىندە «قىزىل جۇلدىز» وردەنىنە, مامىر ايىندا «گەرمانيانى جەڭگەنى ءۇشىن», «ەرلىگى ءۇشىن» مەدالدارىنا يە بولعان.
جەڭىس كۇنىن مايدان دالاسىندا قارسى العان جاۋىنگەر اۋىلىنا بىردەن ورالا قويعان جوق. قازاق سولداتىنا ۋكراينا ەلىندە 1947 جىلعا دەيىن اسكەري بورىشىن وتەۋىنە تۋرا كەلەدى. سودان سوڭ ەلگە ورالىپ, جۇمىس تالعامادى. الدىمەن قازىرگى قۇرمانعازى اۋداندىق ىشكى ىستەر بولىمىندە قىزمەت اتقارىپتى. كەيىن 1984 جىلعا دەيىن كومينتەرن ۇجىمشارىندا, كيروۆ, وكتيابر كەڭشارلارىندا باقتاشى بولىپ جۇمىس ىستەدى.
جاۋعا قارسى شايقاستا ەرلىك كورسەتكەن ءيسىم قويشيەۆ بەيبىت ومىردە دە باتىلدىعىمەن تانىلدى. سونىڭ ءبىر دالەلىندەي, كولىكپەن سۋ ايدىنىنداعى مۇز استىنا ءتۇسىپ كەتكەن 3 ادامدى قۇتقارىپ قالعان. ءدال وسى باتىلدىعى ءۇشىن «سۋعا كەتكەندەردى قۇتقارعانى ءۇشىن» مەدالىمەن ماراپاتتالعان.
جيىرما جاسقا تولماي سوعىسقا اتتانعان مايدانگەر 2003 جىلى ومىردەن ءوتتى. ءبىر جىل بۇرىن مايدان دالاسىندا قولدانعان جاۋىنگەرلىك سومكەسىن قۇرمانعازى اۋداندىق مۋزەيىنىڭ قورىنا تاپسىرعان ەكەن. مايدانگەر سومكەسىنە اداستىرمايتىن باعدار كورسەتەتىن كومپاسىن, بوتقادان ءدام تاتقاندا قولدانعان قاسىعىن ۇدايى سالىپ جۇرگەن. قيىن كۇندەردىڭ كۋاسىندەي بولعان بۇل جادىگەرلەر ەندى مۋزەي قورىندا ساقتاۋلى تۇر.
اتىراۋ وبلىسى