ورال قالاسىندا جاستار مادەنيەت سارايى كۇردەلى جوندەۋدەن ءوتىپ, ونىڭ جانىنان ÓzgeEpic كرەاتيۆ حابى اشىلدى. 2019 جىلى الماتى قالاسىندا باستاۋ العان جوبا تۇركىستان جانە استانا قالالارىندا جالعاسىن تاۋىپ, تابىستى تاجىريبەدەن كەيىن بيىل ورال قالاسىندا اشىلىپ وتىر. ۇيىمداستىرۋشىلاردىڭ ايتۋىنشا, ورالداعى ÓzgeEpic-ءتىڭ تەحنيكالىق جاراقتاندىرىلۋى وتە جوعارى.
كرەاتيۆ حاب – زاماناۋي ونەر مەن مادەني تەندەنتسيالاردى, تسيفرلىق ونەر مەن جاڭا تەحنولوگيالاردى توعىستىراتىن الاڭ. ال ÓzgeEpic حابى وسى باعىتتا يننوۆاتسيالىق جوبالاردى جۇزەگە اسىرىپ, جاستاردىڭ شىعارماشىلىق باستامالارىن دامىتۋعا ۇلەس قوسىپ كەلە جاتقان تانىمال ورتا.
– بۇگىن – ءوڭىرىمىز ءۇشىن ايتۋلى كۇن. وبلىستىڭ مادەني جانە شىعارماشىلىق دامۋىنا تىڭ سەرپىن بەرەتىن, جاڭا مۇمكىندىكتەرگە جول اشاتىن زاماناۋي ÓzgeEpic Oral كرەاتيۆتى حابىنىڭ اشىلۋىنا كۋا بولىپ وتىرمىز, – دەيدى باتىس قازاقستان وبلىسىنىڭ اكىمى ناريمان تورەعاليەۆ.
قازىر كرەاتيۆتى يندۋستريانى دامىتۋ مەملەكەتتىك ساياساتتىڭ باسىم باعىتىنىڭ ءبىرى بولىپ وتىر. ەكونوميكانىڭ بۇل ستراتەگيالىق ماڭىزدى سەكتورى 2029 جىلعا دەيىنگى ۇلتتىق دامۋ جوسپارىنا ەنگىزىلگەن. پرەزيدەنت بيىل «كرەاتيۆتى يندۋستريالاردى دامىتۋ تۋرالى» زاڭعا قول قويدى. ونىڭ ماقساتى – كرەاتيۆتى يندۋستريا وكىلدەرىنىڭ دامۋىنا جاعداي جاساۋ. كرەاتيۆتى يندۋستريانى دامىتۋدىڭ باستى باعىتتاردىڭ ءبىرى – كرەاتورلارعا ارنالعان ينفراقۇرىلىم قۇرۋ.
– مىنە, پرەزيدەنت تاپسىرماسىنا سايكەس ورال قالاسىندا اشىلىپ وتىرعان كرەاتيۆتى حاب – قازاق ونەرىن جاڭا دەڭگەيگە كوتەرۋگە, باسەكەگە قابىلەتتى كرەاتيۆ يندۋستريانى قالىپتاستىرۋعا باعىتتالعان ماڭىزدى باستاما, – دەدى ءوڭىر باسشىسى.
قازاقستانداعى تۇڭعىش كرەاتيۆ حاب رەتىندە تانىلعان ÓzgeEpic ەندى ورال قالاسىندا دا زاماناۋي تەاتر, مۋزىكا, ادەبيەت, انيماتسيا, مەديا, جاساندى ينتەللەكت سياقتى باعىتتاعى جاڭا جوبالاردى جۇزەگە اسىرماق. سونداي-اق دارىندى جاستار ءۇشىن تالىمگەرلىك پەن كرەاتيۆتى ءبىلىم بەرۋ باعدارلامالارى قولعا الىنادى.
جوبا باتىس قازاقستان وبلىسى اكىمدىگىنىڭ باستاماسىمەن, Samruk-Kazyna Trust كورپوراتيۆتىك قورىنىڭ قولداۋىمەن جانە قاراشىعاناق پەترولەۋم وپەرەيتينگ ب.ۆ. كومپانياسىنىڭ الەۋمەتتىك ينۆەستيتسيالارى اياسىندا جۇزەگە اسىرىلىپ وتىر.
ÓzgeEpic يدەياسىنىڭ اۆتورى ماقپال جۇمابايدىڭ ءوزى تانىستىرعان كرەاتيۆ حابتىڭ 837 شارشى مەترلىك اۋماعىن تۇگەل ارالاپ شىقتىق. بۇل جوباعا «Samruk-Kazyna Trust» قورى 211 ملن تەڭگەدەن اسا قايىرىمدىلىق قارجى قۇيعان. جوبا شەڭبەرىندە 200-گە جۋىق كرەاتيۆ مامان دايارلانادى دەيدى ۇيىمداستىرۋشىلار. ولاي بولسا, ءوڭىردىڭ شىعارماشىلىق الەۋەتىن ەسەلەپ ارتتىراتىن قادام بولارى ءسوزسىز.
– بۇگىن دارىندى جاستار مەن شىعارماشىلىق سالا ماماندارى ءۇشىن ماڭىزدى كۇن بولدى. سەبەبى حالىققا قاجەتتى, سۇرانىستاعى ءتۇرلى كونتەنت دايىندايتىن ءارى كرەاتيۆتى مامانداردىڭ كاسىبي ورتاسىن قالىپتاستىراتىن ورتا پايدا بولدى. ورالداعى ورتالىق – «سامۇرىق-قازىنا» قورىنىڭ ەلىمىز بويىنشا اشقان ءۇشىنشى كرەاتيۆتى حابى. وسىعان دەيىن اقتوبە مەن پەتروپاۆل قالالارىندا پايدالانۋعا بەرىلدى. جالپى, باتىس قازاقستاندا كەيىنگى ءتورت جىلدا 1,5 ملرد تەڭگە بولاتىن 16 الەۋمەتتىك جوبا جاسادىق. سولاردىڭ ءبىرى – جىل سايىن 700 ەرەكشە بالا كومەك الاتىن «قامقورلىق» وڭالتۋ ورتالىقتارى. قازىرگى تاڭدا تاسقىن سالدارىنان زارداپ شەككەن ءجاڭاومىر اۋىلىندا كوپفۋنكتسيونالدى سپورت كەشەنىن سالۋ جوسپارلانعان. بۇل دا – قور كومپانيالارى توبىنىڭ وڭىرلەردىڭ ينفراقۇرىلىمىن دامىتۋعا, حالىقتى الەۋمەتتىك قولداۋعا جاساپ جاتقان قادامىنىڭ ءبىرى, – دەيدى «سامۇرىق-قازىنا» اق كورپوراتيۆتىك باسقارۋ, الەۋمەتتىك-ەڭبەك قاتىناستارى جانە ەڭبەكتى قورعاۋ جونىندەگى باسقارۋشى ديرەكتور عيبرات اۋعانوۆ.
جاستارعا ارنالعان جاڭاشىل جوبانىڭ باسى-قاسىندا جۇرگەن وبلىس اكىمىنىڭ ورىنباسارى باقىتجان نارىمبەتوۆ تە ÓzgeEpic Oral كرەاتيۆ حابىنىڭ اشىلۋى وڭىردەگى مادەني جانە ينتەللەكتۋالدىق الەۋەتتى ارتتىرۋعا زور ۇلەسىن قوسارىنا سەنىمدى. ونىڭ ايتۋىنشا, جاڭا كەڭىستىكتە مادەنيەت پەن تەحنولوگيا سالاسىنداعى ءارتۇرلى قىزمەت باعىتتارى ءبىر الاڭدا توعىسادى.
كرەاتيۆ حابتىڭ ەكوجۇيەسىندە كونتسەرت الاڭى, تەاتر, كينوزال, كىتاپحانا جانە اسحانا ورنالاسقان. سونىمەن قاتار گالەرەيا, ءدارىسحانا, كوۆوركينگ كەڭىستىگى, وندىرىستىك جانە مەديا تسەحتار – فوتو, پودكاست جانە دىبىس جازۋ ستۋديالارى, ءتۇسىرىلىم الاڭدارى جۇمىس ىستەيدى. ايتا كەتەرلىگى, كرەاتيۆ حابتا وڭىرلىك انيماتسيالىق ستۋديا جۇمىسىن باستاپ, مۋلتيپليكاتسيا ماماندارى دايارلانادى. بۇل ايماقتاعى انيماتسيا باعىتىنداعى العاشقى كاسىبي ستۋديا بولماق.
– ءار وڭىردە كرەاتيۆ سالانىڭ دامۋىنا ىقپال ەتەتىن كەڭىستىكتەردى قۇرعاندا ول جەرگىلىكتى جەردىڭ, سول ايماقتىڭ مادەني-الەۋمەتتىك ەرەكشەلىگىنە نەگىزدەلۋگە ءتيىس. وسىنى ەسكەرە وتىرىپ, ءتيىستى زەرتتەۋلەردەن كەيىن حابىمىزدى اشتىق. ورال قالاسىنداعى اشىلعان كرەاتيۆ كەڭىستىك وڭىرلەردىڭ زياتكەرلىك الەۋەتىن ءوز دەڭگەيىندە كورسەتەتىن, ايماقتاردىڭ مۇمكىندىگىن ورتالىقپەن تەڭەستىرەتىن, كرەاتيۆ يندۋستريانى دامىتۋداعى وڭىرلەردىڭ ءرولىن ايقىندايتىن بىرەگەي الاڭ بولادى دەگەن ويىمىز بار, – دەيدى ÓzgeEpic نەگىزىن قالاۋشىلار ماقپال جۇماباي جانە توعجان قۇرمانجانقىزى.
جاڭا ورتالىقتىڭ تەحنيكالىق مۇمكىندىگى وتە جوعارى. مىسالى, مۇنداعى بەينەتۇسىرۋ قۇرالدارىنىڭ ساپاسى حالىقارالىق Oskar سىيلىعىنا ۇسىنىلاتىن فيلمدەردى تۇسىرۋگە قابىلەتتى. بۇل جەردە وسىنداي اپپاراتتىڭ ءتورت توپتاماسى بار ەكەنىن ايتتى ماقپال جۇماباي. ياعني بۇل جەردە جوعارى ساپالى فيلمدەر تۇسىرۋگە, كونتسەرتتەر جازۋعا بولادى. سونداي-اق مۇنداعى انيماتسيالىق ستۋديا دا ەڭ زاماناۋي كومپيۋتەرلەرمەن جابدىقتالعان. جوبا دەمەۋشىلەرىنىڭ ءبىرى «Samruk-Kazyna Trust» قورى الداعى ۋاقىتتا كرەاتيۆتى يندۋستريا سالاسىندا 200 جاڭا مامان دايارلاۋعا جاردەم بەرمەك, سونىڭ ىشىندە 10 مامان-انيماتوردى وقىتۋ ارقىلى وبلىستا العاشقى انيماتسيالىق ستۋديا قۇرۋ جوسپارلانعان.
ء«ىس تەتىگىن مامان شەشەدى». بۇل قاي زاماندا دا وزگەرمەيتىن قاعيدا بولىپ تۇر. كادردى جۇيەلى دايارلاۋ, كرەاتيۆتى يندۋستريادا ءبىلىم بەرۋ باعدارلامالارىن دامىتۋ – قازاقستان ءۇشىن ستراتەگيالىق قاجەتتىلىك. ورال قالاسىندا اشىلعان جاڭا ورتالىق ايماقتىڭ شىعارماشىلىق الەۋەتىن, ەكونوميكاسىن باسەكەگە قابىلەتتى ەتە تۇسەدى دەيدى يدەيا اۆتورلارى. سولاي بولعاي!
باتىس قازاقستان وبلىسى