قازاقستاننىڭ فرانتسياداعى ەلشىلىگى مەن شىمكەنت قالاسى اكىمدىگىنىڭ ۇيىمداستىرۋىمەن فرانتسۋز ەلىندە شىمكەنت قالاسىنىڭ كۇندەرى اتالىپ ءوتتى, دەپ حابارلايدى Egemen.kz.
ءىس-شارادا قازاقستاننىڭ فرانتسياداعى ەلشىسى گ.ارىستانقۇلوۆا, گارج-لە-گونەسس قالاسى سپورت ماسەلەلەرى جونىندەگى مەرىنىڭ ورىنباسارى ب. گيۋنو جانە «AKFT» قازاق دياسپوراسىنىڭ توراعاسى ر.گيۋناي قۇتتىقتاۋ ءسوز سويلەپ, جينالعان جۇرتقا جىلى لەبىزدەرىن ارنادى. بىلتىر پاريجدە وتكەن جازعى وليمپيادا ويىندارىنىڭ التىن جۇلدەگەرى, دزيۋدو سپورتىنان اتاقتى بالۋان ەلدوس سمەتوۆ تە مەرەكەلىك باسقوسۋدا كوپشىلىككە ءوزىنىڭ قۇتتىقتاۋ تىلەگىن جولدادى.
سونىمەن قاتار, شىمكەنت قالاسى تۋريزم باسقارماسىنىڭ باسشىسى ب.ءادىلحانوۆ سالادا اتقارىلعان جۇمىستار تۋرالى قىسقاشى ايتىپ ءوتتى. مەرەكەلىك كونتسەرت اياسىندا شاھاردىڭ «Qagan» ەتنو-ءانسامبلى مەن «ياسسى» بي توبى ءوز ونەرلەرىن كورەرمەنگە پاش ەتتى. سونداي-اق, «مادەنيەت پەن سپورتتى دامىتۋ» قوعامدىق بىرلەستىگى ۇلتتىق ويىندار - اسىق اتۋ, ارقان تارتۋدان قىزىقتى سپورتتىق سايىستار ۇيىمداستىردى.
وسى ءىس-شارادا فۋتبولدان وتكەن حالىقارالىق تۋرنير دە كوپشىلىككە كەرەمەت اسەر سىيلادى. اياقدوپ جارىسىنا بىرنەشە كوماندا قاتىستى. ولاردىڭ قاتارىندا قازاقستاندىق ديپلوماتتار, قانداستار, فرانتسيادا جۇمىس ىستەيتىن, وقيتىن وتانداستار, شەتەلدىكتەر بولدى. تۋرنير ناتيجەسىندە «پاريج قازاق سپورت» كومانداسى چەمپيون اتانسا, «وڭتۇستىك قازاقستان وبلىسى» كومانداسى كۇمىس مەدال جەڭىپ الدى, ال «دوستىق» كومانداسى قولا مەدالدى مىسە تۇتتى. بارلىق جەڭىمپازداردى دزيۋدودان وليمپيادا چەمپيونى ە.سمەتوۆ ءوز قولىمەن ماراپاتتادى.
بۇدان بولەك شىمكەنتتىڭ فرانتسياداعى كۇندەرى ءىس-شاراسىنا قاتىسۋشىلار «ۇرشىق» قولونەرشىلەر قوعامى ۇيىمداستىرعان شەبەرلىك ساعاتىنا قاتىسىپ, توقىلعان ۇلتتىق اشەكەيلەر مەن قولونەر بۇيىمدارىنىڭ جاسالۋىن تاماشالادى. كوكتەمگى كەزدەسۋ ۇلتتىق كيىمنىڭ «Bibikarden» ايەلدەر توپتاماسىنىڭ كورسەتىلىمىنە ۇلاستى.
سونىمەن ۇيىمداستىرۋشىلار شىمكەنتتىك ونەرپازدار سىيلاعان قۋانىش قازاقستان مەن فرانتسيا اراسىنداعى دوستىق پەن ىنتىماقتاستىقتى نىعايتۋعا ۇلكەن ۇلەس قوسقانىن اتاپ ءوتتى.