«Yandex Qazaqstan» مەن «Kundelik» كومپانيالارى وقۋشىلارعا, اتا-انالارعا, مۇعالىمدەرگە ارنالعان العاشقى ءبىلىم بەرۋ براۋزەرىن ىسكە قوستى. جاڭا براۋزەر نەيروجەلىلەردىڭ كومەگىمەن وقۋشىلارعا تەك اقپارات ىزدەپ قانا قويماي, وقۋدى جەڭىل ءارى قىزىقتى ەتۋگە كومەكتەسەدى.
وقۋشىلار براۋزەردى «Kundelik» سايتى ارقىلى تەگىن جۇكتەي الادى. سونىمەن قاتار پورتالدىڭ باستى بەتىندە «ياندەكس ىزدەۋ» ارقىلى ينتەرنەتتەن اقپاراتتى جىلدام تابۋ مۇمكىندىگى پايدا بولدى.
«نەيروىزدەۋ» ءتۇرلى پاندەردىڭ سۇراقتارىنا ناقتى ءارى قىسقا جاۋاپ بەرەدى. ماسەلەن, «اباي قاشان جانە قايدا تۋعان؟» نەمەسە «تۇراقتى توك پەن اينىمالى توكتىڭ ايىرماشىلىعى نەدە؟» دەگەن سياقتى سۇراقتارعا لەزدە جاۋاپ الۋعا بولادى. سونىمەن قاتار جاۋاپ الىنعان سايتتارعا سىلتەمەلەر كورسەتىلەدى, بۇل وقۋشىنى اقپاراتتىڭ شىنايىلىعىن تەكسەرىپ, تاقىرىپتى تەرەڭىرەك زەرتتەۋگە ۇيرەتەدى.
بۇدان بولەك, جي-كومەكشى ماتەماتيكادان 5-8 سىنىپ وقۋشىلارىنا ارنالعان ەسەپتەردى شەشۋگە كومەكتەسەدى. ول دايىن جاۋاپتى بىردەن ايتا سالماي, كەڭەس بەرىپ, ديالوگ قۇرۋ ارقىلى وقۋشىنى دۇرىس شەشىمگە جەتەلەيدى. بۇل ءتاسىل بالانىڭ ءوز بەتىنشە ويلانۋىنا مۇمكىندىك بەرەدى.
جي-اۋدارماشى شەت تىلدەرىن مەڭگەرىپ جۇرگەن وقۋشىلارعا دا پايدالى قۇرال بولماق. ول 100-دەن استام ءتىلدى تۇسىنەدى جانە ماتىندەردى, قۇجاتتاردى, سايتتاردى ءاپ-ساتتە اۋدارادى. نەيروجەلىنىڭ كومەگىمەن بەينەماتىندەردى قازاق جانە ورىس تىلدەرىنە ءتارجىمالاۋ مۇمكىندىگى دە ىسكە قوسىلعان. بۇل مۇمكىندىك «Coursera», «YouTube», «VK ۆيدەو», «Vimeo» جانە «Twitch» پلاتفورمالارىنداعى بەينەجازبالاردى قاراپايىم ءارى تۇسىنىكتى ەتەدى.
سونىمەن قاتار «ياندەكس كىتاپتار» قىزمەتىندە مەكتەپ باعدارلاماسىنا ەنگەن ادەبي شىعارمالار مەن ناقتى عىلىمدارعا ارنالعان باسىلىمدار ءبولىمى پايدا بولدى. ەندى وقۋشىلار اباي قۇنانباي ۇلى, ىبىراي التىنسارين, ماعجان جۇماباەۆ, سۇلتانماحمۇت تورايعىروۆ, بەردىبەك سوقپاقباەۆتىڭ شىعارمالارىن ەلەكتروندىق فورماتتا وقي الادى.