سەررا-لەونە رەسپۋبليكاسىنىڭ ءسىم باسشىسى قازاقستانعا كەلدى

سۇحبات بارىسىندا مينيسترلەر ساياسي, ەكونوميكالىق جانە مادەني-گۋمانيتارلىق سالالارداعى ىنتىماقتاستىقتى كەڭەيتۋ بويىنشا بىرقاتار ماڭىزدى ماسەلەلەردى تالقىلاپ, ەكىجاقتى بايلانىستاردى نىعايتۋعا ەرەكشە كوڭىل ءبولدى.

وسى ورايدا تاراپتار شارتتىق-قۇقىقتىق بازانى جەتىلدىرۋ جانە ءتۇرلى دەڭگەيلەردە ساپارلارمەن الماسۋ تاجىريبەسىن دامىتۋ بويىنشا كۇش-جىگەر جۇمساۋعا دايىن ەكەنىن ءبىلدىردى.

«گەوگرافيالىق قاشىقتىققا قاراماستان ءبىز سەنىم مەن تەڭدىككە نەگىزدەلگەن ىنتىماقتاستىق ورناتۋعا قىزىعۋشىلىق تانىتۋدامىز. ساۋدا, كولىك جانە لوگيستيكا, دەنساۋلىق ساقتاۋ, اۋىل شارۋاشىلىعى جانە باسقا دا ماڭىزدى سالالاردا جەمىستى ىنتىماقتاستىققا زور الەۋەت بار», دەپ مالىمدەدى م.نۇرتىلەۋ.

قازاقستاننىڭ الەمدەگى ەڭ ءىرى ون استىق ءوندىرۋشى ەلدىڭ ءبىرى جانە ترانسكاسپي حالىقارالىق كولىك باعىتىن پايدالانىپ, استىق, ءداندى جانە مايلى داقىلدار, جوعارى ساپالى ەت جانە ورگانيكالىق ونىمدەردى افريكا ەلدەرىنە جەتكىزۋگە مۇددەلى ەكەنى اتالىپ ءوتتى.

سونىمەن قاتار مينيسترلەر اقپاراتتىق تەحنولوگيالار جانە تسيفرلاندىرۋ سالاسىنداعى, ونىڭ ىشىندە ورتالىق ازياداعى ەڭ ءىرى IT ستارتاپ-پارك «Astana Hub» بازاسىنداعى ىنتىماقتاستىقتى تالقىلادى. وتكەن جىلى وسى سالادا مەموراندۋمعا قول قويىلىپ, قازاقستان «KazAID» اگەنتتىگى ارقىلى سەررا-لەونەمەن e-Gov كومپونەنتتىك ەلەمەنتتەرىمەن ءبولىستى.

قازاقستان ءسىم باسشىسى ءوز ارىپتەسىنە الماتىدا ورتالىق ازيا مەن اۋعانستان ءۇشىن ورنىقتى دامۋ ماقساتتارى بويىنشا بۇۇ وڭىرلىك ورتالىعىن قۇرۋ تۋرالى بۇۇ باس اسسامبلەياسىنىڭ رەزوليۋتسياسىنا قولداۋ كورسەتكەنى جانە تەڭ اۆتورى بولعانى ءۇشىن العىسىن ءبىلدىردى. ول استانانىڭ تۇراقتى دامۋ سالاسىندا ءارى قاراي ىنتىماقتاستىققا جانە حالىقارالىق باستامالار شەڭبەرىندە بەلسەندى سەرىكتتەستىككە دايىن ەكەنىن اتاپ ءوتتى.

مينيسترلەر حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى جانە ءتۇرلى دەڭگەيلەردە كۇش-جىگەردى ۇيلەستىرۋدى جالعاستىرۋعا كەلىستى.

كەلىسسوزدەردىڭ قورىتىندىسى بويىنشا سىرتقى ساياسي ۆەدومستۆولاردىڭ باسشىلارى ەكى تاراپتىڭ ىنتىماقتاستىعى جونىندەگى جول كارتاسىنا قول قويدى.