ەلىمىزدە ونكولوگيالىق اۋرۋلاردىڭ الدىن الۋ ماقساتىندا تەكسەرىس شارالارى ءجۇرىپ جاتىر. وسىعان وراي دەنساۋلىق ساقتاۋ مينيسترلىگى ونكوسكرينينگتەن كىمدەر تەگىن وتە الاتىنىن ايتىپ بەردى, دەپ جازادى Egemen.kz.
تەكسەرىس پاتسيەنتتىڭ تىركەلگەن جەرى بويىنشا مەديتسينالىق-سانيتاريالىق العاشقى كومەك ۇيىمدارىندا جۇرگىزىلەدى. مەديتسينالىق-سانيتاريالىق العاشقى كومەك ۇيىمدارى پاتسيەنتكە قوڭىراۋ سالۋ, SMS جولداۋ ارقىلى حابارلايدى. ودان بولەك ماماندار ۇيلەردى ارالاپ, تۇرعىنداردى اقپاراتتاندىرادى.
– ءسۇت بەزى وبىرىن ەرتە انىقتاۋ ءۇشىن: ءسۇت بەزىنىڭ قاتەرلى ىسىكتەرىمەن ديناميكالىق بايقاۋدا تۇرماعان 40, 42, 44, 46, 48, 50, 52, 54, 56, 58, 60, 62, 64, 66, 68, 70 جاستاعى ايەلدەر; جاتىر موينى وبىرىن ەرتە انىقتاۋ ءۇشىن: جاتىر موينىنىڭ قاتەرلى ىسىكتەرىمەن ديناميكالىق باقىلاۋدا تۇرماعان 30, 34, 38, 42, 46, 50, 54, 58, 62, 66, 70 جاستاعى ايەلدەر;
كولورەكتالدى وبىردى ەرتە انىقتاۋ ءۇشىن: جۋان ىشەكتىڭ قاتەرسىز جانە قاتەرلى ىسىكتەرىمەن ديناميكالىق بايقاۋدا تۇرماعان 50, 52, 54, 56, 58, 60, 62, 64, 66, 68, 70 جاستاعى ەرلەر مەن ايەلدەر وتە الادى, – دەيدى مينيسترلىك ماماندارى.
مۇنداي تەكسەرىستەر جوعارىدا اتالعان وبىر تۇرلەرىمەن ديناميكالىق باقىلاۋدا تۇرمايتىن, مىندەتتى الەۋمەتتىك مەديتسينالىق ساقتاندىرۋ جۇيەسىندە ساقتاندىرىلعان ازاماتتارعا جۇرگىزىلەدى.
– سكرينينگ شەڭبەرىندە اۋرۋلاردىڭ دياگنوستيكاسى دياگنوزدى مورفولوگيالىق ۆەريفيكاتسيالاۋ دەڭگەيىنە دەيىن جۇرگىزىلەدى, ودان ءارى اۋرۋدىڭ تارالۋ دارەجەسىن انىقتاۋ ءۇشىن زەرتتەپ-قاراۋ تالاپ ەتىلەدى. وبىر الدى پروتسەستەر انىقتالعان جاعدايدا, پاتسيەنتتەر ونكولوگتىڭ كونسۋلتاتسياسىنان وتە الادى. قازىرگى ۋاقىتتا وڭىرلىك ونكولوگيالىق ورتالىقتاردىڭ بازاسىندا, ساراپتامالىق ەندوسكوپيالىق ورتالىقتار قۇرىلعان. ولار كولورەكتالدى وبىر سكرينينگىنەن وتەتىن پاتسيەنتتەر اراسىندا دياگنوستيكالىق ەندوسكوپيالىق زەرتتەۋلەردى عانا جۇزەگە اسىرىپ قويماي, ساۋىقتىرۋدان وتەدى جانە ديناميكالىق باقىلاۋعا الىنادى, – دەيدى دەنساۋلىق ساقتاۋ مينيسترلىگى.
مينيسترلىكتىڭ دەرەگىنشە, سكرينينگ ازىرگە ءمامس ەسەبىنەن قارجىلاندىرىلادى. ونكولوگيالىق سكرينينگتى حالىققا تەگىن كورسەتىلەتىن مەديتسينالىق قىزمەتتەر تىزىمىنە ەنگىزۋدى جوسپارلانىپ وتىرعاندارىن حابارلادى. زاڭنامالىق اكت قابىلدانسا, اتالعان تەكسەرىس تۇرلەرى مىندەتتى الەۋمەتتىك مەديتسينالىق ساقتاندىرۋ جۇيەسىندە ساقتاندىرىلماعان ازاماتتارعا دا تەگىن جۇرگىزىلەدى.