بۇگىن وڭتۇستىك استانادا تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى جانە الماتى قالاسى اكىمدىگىنىڭ ۇيىمداستىرۋىمەن جاساندى ينتەللەكت سالاسىندا AlmatyFair.ai كورمەسى اشىلدى, دەپ جازادى Egemen.kz.
كورمەدە AI سالاسىنداعى الەمنىڭ جەتەكشى IT-كومپانيالارى, ستارتاپتار مەن ساراپشىلار ءبىر الاڭعا جينالىپ, عالامدىق سىن-قاتەرلەر كەزەڭىندە جاساندى ينتەلەكتىڭ مۇمكىندىكتەرىن تالقىلاپ, الدىڭعى قاتارلى تەحنولوگيالارمەن بولىسەتىن بولادى.
كورمەنىڭ باس دەمەۋشىسى – Kaspi.kz, ال رەسمي سەرىكتەستەرى – Freedom Bank, Halyk Bank.
كورمەدە ەلىمىزدىڭ AI سالاسىنداعى نەگىزگى باستامالار ۇسىنىلىپ وتىر. ولاردىڭ قاتارىندا حالىقارالىق alem.ai جاساندى ينتەللەكت ورتالىعىنىڭ تۇجىرىمداماسى, KazLLM ۇلتتىق تىلدىك مودەلىن دامىتۋ, 8 مىڭنان استام قولدانۋشى تىركەلگەن ۇلتتىق AI پلاتفورماسى مەن Tomorrow School - العاشقى جاساندى ينتەللەكت مەكتەبى بار.
وڭىرلىك ستارتاپ-ەكوجۇيەلەردى قولداۋ ماقساتىندا Astana Hub پەن IT Park Uzbekistan باستاماسىمەن قۇرىلعان ورتالىق ازيانىڭ ءىرى تەحنوپاركتەرى اليانسى – Central Asian Innovation Hubs قىزمەتىمەن دە كورمە بارىسىندا تانىسۋعا بولادى.
تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ كورمەنىڭ اشىلۋ سالتاناتىندا جاساندى ينتەللەكت بۇگىندە ەكونوميكانى, مەملەكەتتىك باسقارۋ جۇيەسىن, ءبىلىم بەرۋ مەن دەنساۋلىق ساقتاۋ سالالارىن تۇبەگەيلى وزگەرتىپ جاتقاندىعىن اتاپ ءوتتى. «McKinsey زەرتتەۋلەرىنە سايكەس, 2030 جىلعا قاراي AI-ءدىڭ جاھاندىق ەكونوميكاعا قوسار ۇلەسى 20 ترلن دوللارعا جەتۋى مۇمكىن. قازاقستان بۇل ۇدەرىستە دايىن شەشىمدەردى پايدالانىپ قانا قويماي, ءوز تەحنولوگيالارىن دامىتۋى قاجەت. بيىل ۇلتتىق AI پلاتفورماسىن ىسكە قوستىق, وڭىردەگى العاشقى ۇلتتىق تىلدىك مودەل — KazLLM-دى قۇردىق جانە جاساندى ينتەللەكت تۋرالى زاڭ قابىلداۋ جۇمىستارىنا كىرىستىك. سونداي-اق مەملەكەت باسشىسىنىڭ تاپسىرماسىنا سايكەس, قازاقستاندى AI-گە نەگىزدەلگەن مەملەكەتكە اينالدىرۋدى كوزدەيتىن حالىقارالىق alem.ai ورتالىعى قۇرىلىپ جاتىر» دەدى مينيستر.
كورمە جاساندى ينتەللەكت تەحنولوگيالارىنىڭ ەكونوميكا سالالارىمەن قاتار دەنساۋلىق ساقتاۋ, ءبىلىم بەرۋ جانە قالالىق ينفراقۇرىلىمعا دا قانشالىقتى اسەرى بار ەكەنىن كورسەتەدى. مۇنىمەن قوسا كومپانيالار جاساندى ينتەللەكتكە قاتىستى يننوۆاتسيالىق جوبالارى مەن زاماناۋي شەشىمدەرىن ۇسىنادى. تاجىريبە الماسۋ, كاسىبي بايلانىستار ورناتۋ مەن الەۋەتتى ينۆەستورلارمەن كەزدەسۋگە بىرەگەي مۇمكىندىك بەرەتىن AlmatyFair.ai كورمەسىندە AI كوماندالار جوبالارىن تانىستىرىپ, 10 000 اقش دوللارى كولەمىندەگى جۇلدە قورى مەن كرەمني القابىندا وتەتىن Hero Training Program اكسەلەراتورىنا قاتىسۋ ءۇشىن تارتىسقا تۇسەدى.
كورمەدە سونداي-اق تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى ءىت-يندۋستريانىڭ ەكسپورتتىق الەۋەتىن ارتتىرۋ جانە ترانسشەكارالىق تەحنولوگيالار ترانسفەرىن ىلگەرىلەتۋگە باعىتتالعان بىرقاتار ماڭىزدى كەلىسىمدەرگە قول قويادى. ونىڭ بارىسىندا Astana Hub پەن ى. التىنسارين اتىنداعى ۇلتتىق ءبىلىم اكادەمياسى اراسىندا قازاقستاننىڭ ءبىلىم بەرۋ جۇيەسىن تسيفرلىق ترانسفورماتسيالاۋ, يننوۆاتسيالىق تەحنولوگيالاردى ەنگىزۋ جانە STEM باعىتتارىن دامىتۋ بويىنشا مەموراندۋمعا قول قويىلادى.