جازدىڭ جايما-شۋاق كۇندەرىندە تالدىقورعان قالاسىندا اۋدانداردىڭ مادەني كۇندەرى شىمىلدىعىن اشتى. ءداستۇرلى مەرەكەنىڭ تۇساۋكەسەرىن وتكەن جىلى باس جۇلدەنى يەلەنگەن اسپانتاۋلار ولكەسىنىڭ جۇرتشىلىعى – رايىمبەكتىكتەر باستاپ, شاھار حالقى مەن قوناقتاردى ولەڭ مەن جىردىڭ اق بەسىگىندە تەربەتىپ, سالت-ءداستۇردىڭ مايەگىن ۇسىنۋمەن ەرەكشەلەندى.
شارا قالاداعى ء“ۇش بايتەرەك” جانە “داڭق” ەسكەرتكىشتەرىنە گۇل شوقتارىن قويۋدان باستالىپ, اۋدان ازاماتتارى س.سەيفۋللين اتىنداعى وبلىستىق كىتاپحانادا وقىرماندارمەن جۇزدەسىپ, مۇقاعالي, بەردىبەك, ساعات, ەركىن, باققوجا, تاعى باسقا تالانتتارىنىڭ ءومىرى مەن شىعارماشىلىعى جايلى كەڭىنەن اڭگىمەلەدى.
“اتا سالتىم – قازىنام” باعدارلاماسىمەن قاز-قاتار تىگىلگەن ۇيلەردەگى ۇلتتىق قولونەر, ءداستۇر جالعاستىعى ورنەكتەلسە, “حان ءتاڭىرى” اۋەندەرى قالا حالقىنىڭ كوڭىلىنەن شىقتى. سونداي-اق, قۋانسا بالا قۋانسىن دەمەكشى, وبلىستىق مۇمكىندىگى شەكتەۋلى بالالارعا ارنالعان وڭالتۋ ورتالىعىنداعى ءبۇلدىرشىندەرگە اۋدان جۇرتشىلىعى اتىنان سىيلىق تاپسىرىلىپ, مۇندا دا سابيلەر نازارىنا اۋەزدى ءان ۇسىنىلدى. جاستاردىڭ ساۋىق كەشى مازمۇندى بولىپ, اۋىل مەن قالالىقتار ءبىر-بىرىمەن جاقىنداستى.
كۇمىسجان بايجان.
الماتى وبلىسى.
ءبىلىم مەن جۇمىس ورىندارى جارمەڭكەسى
وبلىستىق مادەنيەت ورتالىعىندا “كاسىپتىك ءبىلىم جانە بيزنەس: سەرىكتەستەر سۇحباتى” دەگەن تاقىرىپتا ايماقتىق فورۋم ءوتتى. ونى ۇيىمداستىرۋشىلار وبلىستىق ءبىلىم باسقارماسى, “اقتوبە وبلىسى كاسىپكەرلەرى مەن جۇمىس بەرۋشىلەرى وداعى” بىرىككەن قوعامى جانە اقتوبە قالاسىنىڭ جۇمىسپەن قامتۋ جانە الەۋمەتتىك باعدارلامالار ءبولىمى. ايماقتىق فورۋمعا اقتوبەنىڭ جوعارى وقۋ ورىندارى مەن كوللەدجدەرىنىڭ, رەسەي جانە چەحيا جوعارى وقۋ ورىندارىنىڭ وكىلدەرى قاتىستى.
فورۋمنىڭ ماقساتى – قازاقستاننىڭ 2008-2012 جىلدارعا ارنالعان تەحنيكالىق جانە كاسىپتىك ءبىلىم بەرۋدى دامىتۋدىڭ مەملەكەتتىك باعدارلاماسىنىڭ مىندەتتەرىن جۇزەگە اسىرۋعا ىنتالى تاراپتاردى تارتۋ, وقۋ ورىندارىنىڭ تۇلەكتەرىن جۇمىسقا ورنالاستىرۋ جانە كادرلاردى دايارلاۋدىڭ دەڭگەيىن كوتەرۋ ماسەلەلەرىن شەشۋدە جۇمىس بەرۋشىلەر مەن ءبىلىم بەرۋ مەكەمەلەرىنىڭ ىنتىماقتاستىعىنا قول جەتكىزۋ.
وسى شارانىڭ اياسىندا وتكىزىلگەن ء“بىلىم. جۇمىس. مانساپ-2010” اتتى كورمەدە شەتەلدە ءبىلىم الۋ جايىندا كەڭەس بەرىلدى, وبلىستىڭ ىرگەلى كاسىپورىندارىنىڭ قاتىسۋىمەن جۇمىس ورىندارى جارمەڭكەسى ۇيىمداستىرىلدى. ۇزدىك ۇستازدار ون ەكى نوميناتسيا بويىنشا ماراپاتتالدى.
ساتىبالدى ءساۋىرباي.
اقتوبە وبلىسى.