استانادا تىلدەردى دامىتۋ جانە ارحيۆ ءىسى باسقارماسىنىڭ ۇيىمداستىرۋىمەن ناۋرىزنامانىڭ ون كۇندىگى اياسىندا «اق باتا» بايقاۋى ءوتتى, دەپ جازادى Egemen.kz.
ۇلتتىق مۇرامىزدى ۇلىقتاۋ ماقساتىندا وتكىزىلگەن بايقاۋعا ەلوردالىق 7 اقساقال قاتىسىپ, ءبىرىنشى كەزەڭدە باتانىڭ 7 ءتۇرى بويىنشا (ناۋرىز باتا, العىس باتا, وتاۋ باتا, بالاعا باتا, جولاۋشىعا باتا, اس باتا, توي باتا) ونەر كورسەتسە, ەكىنشى كەزەڭدە سالت-داستۇرگە قاتىستى سۇراقتارعا جاۋاپ بەردى.
قازىلار القاسىنىڭ شەشىمىمەن ءبىرىنشى ورىندى 77 جاستاعى مەكەباي كاكەن ۇلى, ەكىنشى ورىندى ايداربەك قارجاۋ ۇلى, ءۇشىنشى ورىندى 77 جاستاعى راتقان الىپباەۆ جەڭىپ الدى, بەلسەنە قاتىسقان قاريالار تاستىباي ساكەن ۇلى, ەرمەك حامزا ۇلى, مامانباي راقمەت ۇلى, قانات سالمەن ۇلى العىس حاتتارمەن ماراپاتتالدى.
سونداي-اق, كورەرمەنمەن «اكەم ۇيرەتكەن باتا» ايدارى بويىنشا ينتەراكتيۆ ۇيىمداستىرىلدى. قالا تۇرعىندارى دا باتا بەرۋدىڭ قۇندىلىعى تۋرالى پىكىرلەرىن ءبىلدىرىپ, جارىسا باتا بەردى. كەش مەرەكەلىك كونتسەرتپەن جالعاستى.