جەزقازعان قالاسىنداعى «Kinoplexx» كينوتەاترىندا «تاعدىرلار – 2» اتتى الەۋمەتتىك فيلمدەردىڭ تانىستىرىلىمى ءوتتى. «بالانىڭ جىلۋى», «وزگە ءومىر», «جامان وي», «سوڭعى تىلەك», «وتباسى شەكاراسى» دەپ اتالاتىن بەس قىسقا مەتراجدى فيلم جەزقازعان قالاسى اكىمدىگىنىڭ تاپسىرىسىمەن تۇسىرىلگەن.
باس پروديۋسەر ەركەبۇلان مولداشوۆ, جەزقازعان قالالىق ءماسليحاتىنىڭ توراعاسى راۋشان قاپاروۆا, جەزقازعان قالالىق ىشكى ساياسات ءبولىمىنىڭ باسشىسى قالامقاس ابدۋاليەۆا شىنايى ومىردەن الىنعان كينو تۋىندىلارى قوعامداعى كەلەڭسىز وقيعالاردان اۋلاق بولىپ, جاقسىدان ۇيرەنىپ, جاماننان جيرەنۋگە ناسيحاتتايتىنىن تىلگە تيەك ەتتى.
«وزگە ءومىر» فيلمىندە جاۋىننان كەيىن شىققان ساڭىراۋقۇلاقتاي قاپتاپ كەتكەن اقىلى كوۋچتاردى تىڭداعان جاس كەلىنشەك ايرانداي ۇيىپ وتىرعان وتباسىن تالقان ەتە جازدايدى. ابىروي بولعاندا تەز اقىلعا كەلەدى.
فيلمدەردە تاعدىر تالكەگىنە, الاياق ادامداردىڭ ارباۋىنا ءتۇسىپ, دارمەنسىز جاعدايعا تۇسكەن جاندارعا سول شىرماۋىقتان شىعۋدىڭ جولدارىن كورسەتەدى. اداسقان جاستار قايدا بارۋ كەرەك, كىمنەن كەڭەس الۋ كەرەك دەگەن ساۋالدىڭ جاۋابىن تاپقانداي بولادى. كۇندەلىكتى ومىردە كەزدەسەتىن وقيعالاردى ارقاۋ ەتكەن فيلمدەر كورەرمەنگە ۇلكەن وي سالادى, ساباق بولادى.
فيلمدە سەركە قوجامقۇلوۆ اتىنداعى جەزقازعان قازاق مۋزىكالىق-دراما تەاترىنىڭ ارتىستەرى, قاتارداعى قاراپايىم ازاماتتار ويناعان.
«Er-Nar Media» كينوستۋدياسىنىڭ رەجيسسەرى, تانىمال اكتەر شاپاعات ورىنباي: ء«بىزدىڭ ستۋديا ەلىمىز بويىنشا الەۋمەتتىك فيلمدەردى تۇسىرەدى. وسى جوبامەن ون جىل بويى اينالىسىپ كەلەمىز. الەۋمەتتىك ءفيلمنىڭ تاقىرىبى ءار ءتۇرلى. بۇگىنگى ءفيلمدى جەزقازعان قالالىق اكىمدىگىنىڭ تاپسىرىسى بويىنشا «Er-Nar Media» كينوستۋدياسى جاسادى. فيلمدەردى ءبىزدىڭ پورتالداعى YouTube ارناسىنا اي سايىن ءبىر-بىردەن شىعارىپ تۇرامىز. بۇگىنگى تاڭدا YouTube ارنامىزدا تاپسىرىسپەن تۇسىرىلگەن 30 شاقتى فيلم, تيك-توك جەلىلەرىندە 1,5-2 ميلليون قارالىم بار», دەيدى.
ۇلىتاۋ وبلىسى