وسكەمەندە جۇمىسشى ماماندىقتارىنىڭ جىلىنا وراي «عاسىرلىق داستۇرلەر» اتتى كىلەم توقۋ جانە ساندىك-قولدانبالى ونەر بۇيىمدارىنىڭ العاشقى رەسپۋبليكالىق فەستيۆالى ءوتتى. بۇل – ەلىمىزدەگى رۋحاني ونەردىڭ دامۋىنا سەپ بولاتىن ۇلكەن ءىس-شارا.
– فەستيۆالدىڭ كوزدەگەنى – حالىقتىق كىلەم توقۋ داستۇرلەرىن ناسيحاتتاۋ, اتا ءداستۇردى جاڭعىرتۋ, ساندىك-قولدانبالى ونەر شەبەرلەرىنە قولداۋ كورسەتۋ. مۇنداي ءىس-شارانى ەلىمىزدە العاش رەت قولعا الىپ وتىرمىز. الداعى ۋاقىتتا اياسىن كەڭەيتىپ وتكىزۋىمىز دە مۇمكىن. ارت-الاڭ قۇرساق دەگەن دە وي بار, – دەيدى وبلىستىق مادەنيەت باسقارماسىنىڭ باسشىسى سامات كاسەنوۆ.
بۇل ونەردىڭ ءورىسى كەڭگە قانات جايسا, تۋريزم سالاسىنا دا سەرپىن بەرەدى. الىستان ات ارىتىپ كەلگەن ساياحاتشىلار ەستەلىككە سىيلىق تاپپاي ساندالىپ جۇرمەيدى, بەلگىلى ءبىر ورتالىقتان قۇندى دۇنيە ارقالاپ كەتە بەرۋ مۇمكىندىگى دە قاراستىرىلادى.
كەڭ فويەگە الاشا-سىرماق جايىلىپ, تۇسىنا تۇسكيىزدەر ىلىنگەن. جاعالاي قولونەرشىلەر جايعاسقان. ءبىرى توقىما توقىسا, ەندى ءبىرى كەستە تىگىپ وتىر. ادەمى كورىنىس. جازدىڭ جايما شۋاعىندا, سارقىراپ اققان وزەننىڭ جاعاسىندا وتكىزەر مە ەدى بۇل كورمەنى؟ ءيا, بۇل ۇسىنىس مادەنيەت باسشىلىعىنا دا ايتىلدى.
بۇگىنگى فەستيۆالعا ەلىمىزدىڭ 8 وبلىسىنان, رەسپۋبليكالىق ماڭىزى بار 2 قالاسىنان 27 شەبەر كەلىپ قاتىستى. كورەرمەندەردىڭ نازارىنا بىرەگەي كىلەمدەر, كيىزدەن جاسالعان بۇيىمدار, گوبەلەندەر جانە ساندىك-قولدانبالى ونەردىڭ باسقا دا ۇلگىلەرى ۇسىنىلدى. قولونەرشىلەردىڭ جۇمىسىن قولونەرشىلەر وداعىنىڭ توراعاسى ايجان بەكقۇلوۆا, «Tarbiyabrend» ءسان ءۇيىنىڭ جەتەكشىسى, سانگەر تاربيا ايدىمباەۆا سىندى شەبەرلەر باعالادى. ەكى كۇنگە سوزىلعان بايقاۋدا جۇلدەلى 3-ورىندى سوناۋ الماتىدان الاشا-سىرماعىن ارقالاپ جەتكەن گۇلزيرا سارسەمباەۆا السا, ەكىنشى ورىندى كاتونقاراعايدان كەلگەن ىسمەر گۇلنار قوجامجاروۆا ەنشىلەدى. ءبىرىنشى ورىن قىزىلوردانىڭ قولونەرشىسى گۇلنار جۇسىپقىزىنا بۇيىردى.