مىڭجىلدىقتاردىڭ كۋاسى بولعان بۇل قاسيەتتى تۇركىستان قالاسى جاقىندا ەرەكشە مارتەبەگە يە بولىپ, جاڭا دامۋ كەزەڭىنە قادام باستى. تۇركى الەمىنىڭ رۋحاني استاناسىنا اينالعان تۇركىستان ەندى حالىقارالىق دەڭگەيدەگى مادەني, تۋريستىك جانە ەكونوميكالىق ورتالىققا اينالۋعا دايىن.
تۇركىستاننىڭ ەرەكشە مارتەبەگە يە بولۋى – قالانىڭ دامۋىنا جاڭا سەرپىن بەرىپ, زاماناۋي مادەنيەت پەن وركەنيەتتىڭ توعىسقان نۇكتەسى بولماق.
ەرەكشە مارتەبە اياسىندا قالادا ەلىمىزدىڭ ەڭ ۇلىق مەرەكەلەرىنىڭ ءبىرى – ناۋرىز مەيرامى بۇرىنعىدان دا اۋقىمدى, ءسان-سالتاناتىمەن تويلانباق. كونە ءداستۇر مەن جاڭا ءداۋىردىڭ توعىسقان شاعىندا بۇل مەرەكەنىڭ ءمانى تەرەڭدەي تۇسەرى انىق.
ايتا كەتەيىك, تۇركىستانداعى ناۋرىز مەرەكەسى – تەك ويىن-ساۋىق قانا ەمەس, ۇلتتىق قۇندىلىقتاردى جاڭعىرتۋعا, تاريحي سانانى كۇشەيتۋگە, رۋحاني ساباقتاستىقتى ساقتاۋعا ارنالعان تاعىلىمدى ءىس-شارا بولماق. قالادا ەتنواۋىلدار بوي كوتەرىپ, ۇلتتىق كيىمدەرمەن بەزەندىرىلگەن كوشەلەردە جارمەڭكەلەر, قولونەر كورمەلەرى, تەاترلاندىرىلعان قويىلىمدار وتەدى.
سونداي-اق بيىل ۇلتتىق ويىندارعا ەرەكشە كوڭىل بولىنەدى. ۇلى دالادا عاسىرلار بويى ساقتالعان كوكپار, بايگە, قىز قۋ, اۋدارىسپاق سياقتى جارىستار وتكىزىلەدى. ات قۇلاعىندا وينايتىن جىگىتتەر ەرلىكتىڭ, كۇش-قايراتتىڭ, ەپتىلىكتىڭ ۇلگىسىن كورسەتەدى.
مەرەكە قارساڭىندا سۋىرىپسالما اقىندار ەلدىڭ بىرلىگى, تۇركىستاننىڭ مارتەبەسى جانە ۇلتتىق قۇندىلىقتاردىڭ ماڭىزى تۋرالى جىر تولعايدى. سونداي-اق, ەلىمىزدىڭ بەلگىلى انشىلەرى مەن كۇيشىلەرى ۇلتتىق مۋزىكا كەشتەرىن وتكىزەدى. دومبىرانىڭ كۇمبىرلەگەن ءۇنى, قوبىزدىڭ سىرلى سازى, ءداستۇرلى اندەردىڭ اۋەنى تۇركىستان اسپانىن تەربەمەك.
قوجا احمەت ءياساۋيدىڭ قاسيەتتى توپىراعى سانالعان تۇركىستان ەندى «تۇركى الەمىنىڭ رۋحاني استاناسىنىڭ» مادەني ورتالىعى رەتىندە جاڭعىرىپ كەلەدى.
ەرەكشە مارتەبەگە يە بولعان تۇركىستان – بۇگىنگى قازاقستاننىڭ مادەني جانە رۋحاني ورداسى. ونىڭ قاقپاسى تەك تۋريستەرگە عانا ەمەس, جاڭا يدەيالارعا, وركەنيەت توعىسىنا, ۇرپاق ساباقتاستىعىنا ايقارا اشىق.