بۋرابايدا مەملەكەت باسشىسىنىڭ قاتىسۋىمەن ۇلتتىق قۇرىلتايدىڭ IV وتىرىسى ءوتىپ جاتىر. مەملەكەت باسشىسى ءوز سوزىندە ۇلتتىق بىرەگەيلىكتى ساقتاۋ مەن دامىتۋدا مادەنيەتتىڭ ءرولىن ەرەكشە اتاپ ءوتتى. اسىرەسە, قازاق حالقىنىڭ ءتول مەرەكەسى – ءاز-ناۋرىزدىڭ ماڭىزدىلىعىنا توقتالدى, دەپ جازادى Egemen.kz.
پرەزيدەنتتىڭ ايتۋىنشا, ناۋرىز مەرەكەسىن تويلاۋدىڭ جاڭا تۇجىرىمداماسى ازىرلەنىپ, ەندى بۇل مەيرام 14 ناۋرىز – امال كۇنىنەن باستالىپ, ون كۇنگە جالعاسادى جانە ءار كۇنگە ەرەكشە اتاۋ بەرىلمەك. حالىق بۇل باستامانى وڭ قابىلداعان.
«جۇرتشىلىق بۇل باستامانى جاقسى قابىلدادى. اسىرەسە, ناۋرىزناماداعى «ۇلتتىق كيىم كۇنى» قوعامنىڭ زور قولداۋىنا يە بولدى. ۇلتتىق كيىمدەرگە دەگەن قىزىعۋشىلىق ارتا ءتۇستى. مەكتەپتەردە, ءتۇرلى مەكەمەلەردە, سونداي-اق, ءىرى كومپانيالاردا ۇلتتىق كيىمگە ءمان بەرىلە باستادى. سۇرانىسقا ساي تىگىن تسەحتارى اشىلىپ, جاڭا برەندتەر, دۇكەندەر پايدا بولدى. وسىلايشا, ۇلتتىق كيىم كيۋ بىرتىندەپ قالىپتى كورىنىسكە اينالىپ كەلەدى. بۇل – وتە جاقسى ءۇردىس» دەدى مەملەكەت باسشىسى.
سونىمەن قاتار قاسىم-جومارت توقاەۆ بەت-ءجۇزدى تۇمشالايتىن قارا كيىمنەن گورى ءوزىمىزدىڭ ۇلتتىق كيىمدەرىمىز الدەقايدا ارتىق ەكەنىن ايتىپ, ونى جان-جاقتى دارىپتەۋدى تاپسىردى.