مەملەكەت باسشىسى قاسىم-جومارت توقاەۆ ەلىمىزدە جاستار اراسىندا قازاقتىڭ بولمىسىنا جات ءدىني اعىمداردىڭ كۇشەيىپ بارا جاتقانىن ايتتى, دەپ حابارلايدى Egemen.kz.
ء«ماجىلىس دەپۋتاتى ەرمۇرات باپي ەلىمىزدەگى ءدىني احۋالعا الاڭداۋشىلىق ءبىلدىرىپ ءجۇر. قۇرىلتاي مۇشەلەرى دانيا قىدىرباەۆا جانە ولجاس سۇلەيمەن جات ءدىني اعىمداردىڭ جاستار اراسىندا, اسىرەسە سپورت سالاسىندا ىقپالى كۇشەيىپ بارا جاتقانىن ايتتى. تەرىس اعىمدارعا, قازاقتىڭ بولمىسىنا جات يدەولوگيالارعا توسقاۋىل قويۋ قاجەت ەكەنىنە ەش كۇمان جوق. ەلىمىزدە ءدىن بوستاندىعىنا كەپىلدىك بەرىلگەن. بىراق جۇگەنسىزدىككە, تارتىپسىزدىككە جول بەرۋگە بولمايدى. ءدىننىڭ اسا ماڭىزدى ميسسياسى – ۇلتتى ۇيىستىرۋ. ءدىني ۇيىمداردىڭ قىزمەتىن رەتتەيتىن قۇجاتتار وسى تالاپقا ساي بولۋعا ءتيىس. بۇل ماسەلەنى جان-جاقتى قاراۋ كەرەك. سونىڭ ىشىندە زاڭنامانى جاڭا جاعدايعا بەيىمدەپ وتىرۋ وتە ماڭىزدى», دەپ اتاپ ءوتتى مەملەكەت باسشىسى.
قۇرىلتاي مۇشەلەرى تاعى ءبىر جايتقا الاڭداۋشىلىق ءبىلدىرىپ وتىر. سوڭعى كەزدە ەل ىشىندە ءتۇرلى الاياقتىق ارەكەتتەر جيىلەپ بارادى. تەرىس پيعىلدى ادامدار قايىرىمدىلىققا دەپ اقشا جيناپ, ونى جەكە باسىنىڭ پايداسىنا جاراتادى. سونداي-اق كوپ ادام ينتەرنەت-الاياقتاردان زارداپ شەگۋدە.
«بۇدان بولەك, قازىر جۇرتقا اقىل ايتىپ اقشا تاباتىن جالعان پسيحولوگتار مەن «كوۋچتار» كوبەيىپ كەتتى. ولارعا سەنىپ, الدانىپ قالعاندار كوپ. ماعان بۇل تۋرالى كوپتەگەن شاعىم ءتۇسىپ جاتىر. بۇل ماسەلەنى قۇرىلتاي مۇشەسى ايگۇل ورىنبەك دۇرىس كوتەرىپ وتىر. جاۋاپتى ورگاندار بۇل ماسەلەنى دە نازارعا الۋعا ءتيىس», دەدى پرەزيدەنت.