قاسىم-جومارت توقاەۆ ۇلتتىق قۇرىلتايدىڭ IV وتىرىسىندا ەلدە اتقارىلىپ جاتقان اۋقىمدى رەفورمالارعا توقتالدى, دەپ حابارلايدى Egemen.kz.
ء«بىز بىرتىندەپ بارلىق سالادا اۋقىمدى رەفورمالار مەن ناقتى وزگەرىستەردى جۇزەگە اسىرىپ جاتىرمىز. ونىڭ ءبارى حالىقتىڭ تىلەگى مەن زاماننىڭ تالابىنا ساي جاسالۋدا. بۇل جەردەگى تۇپكى ماقسات – بارلىعىن وزگەرتۋ ەمەس. ەڭ باستىسى – اتقارىلىپ جاتقان شارۋانى وڭتايلاندىرىپ, ونىڭ تيىمدىلىگىن ارتتىرۋ.الدىمىزدا تۇرعان نەگىزگى مىندەتتىڭ ءبىرى – جەكەلەگەن باعىتتار بويىنشا مەملەكەتتىك اپپاراتتىڭ جۇمىسىن جۇيەلەپ, رەتكە كەلتىرۋ.وزدەرىڭىزگە ءمالىم, ەلىمىزدە ءتۇرلى سالاعا قاتىستى باعدارلامالار مەن كەشەندى جوسپارلار بار. بيىل وسىنداي بىرقاتار قۇجاتتىڭ مەرزىمى اياقتالادى. ارينە, ونىڭ كەيبىرى جالعاسادى, كەيبىرى مۇلدەم توقتاتىلادى. ۇكىمەت مۇقيات ويلاستىرىپ, ناقتى شەشىم قابىلداۋى كەرەك», دەدى مەملەكەت باسشىسى.
ءوز سوزىندە پرەزيدەنت وسى جىلى ەسىرتكىمەن كۇرەسكە قاتىستى جاڭا قۇجات دايىندالاتىنىن اتاپ ءوتتى.
«ەل بولاشاعى ءۇشىن ايرىقشا ماڭىزى بار سالالار بويىنشا جۇمىس ۇزدىكسىز جالعاسۋعا ءتيىس. ناشاقورلىققا جانە ەسىرتكى بيزنەسىنە قارسى كۇرەس تۋرالى كەشەندى جوسپاردىڭ مەرزىمى بيىل بىتەدى. بۇل قۇجات 2023 جىلى ازىرلەنگەن. مۇنداي جوسپار ەلىمىزگە قاجەت ەكەنى انىق. ويتكەنى وسى قاۋىپتى كەسەلگە قارسى كۇرەس – وتە ماڭىزدى ماسەلەنىڭ ءبىرى. جاڭا قۇجاتتى دايىنداۋعا قازىردەن باستاپ كىرىسۋ كەرەك», پرەزيدەنت.