پرەمەر-ءمينيستردىڭ ورىنباسارى – سىرتقى ىستەر ءمينيسترى مۇرات نۇرتىلەۋ استاناعا رەسمي ساپارمەن كەلگەن ازەربايجان رەسپۋبليكاسىنىڭ سىرتقى ىستەر ءمينيسترى دجەيحۋن بايراموۆپەن كەلىسسوز جۇرگىزدى.
ازەربايجان ءمينيسترىنىڭ ساپارى قازاقستان مەن ازەربايجان اراسىنداعى ستراتەگيالىق سەرىكتەستىك جانە وداقتاستىق قاتىناستار تۋرالى شارتتىڭ 20 جىلدىعى اياسىندا ءوتتى. كەزدەسۋ بارىسىندا ەكى باۋىرلاس ەل اراسىنداعى ساياسات, ساۋدا, ەكونوميكا, ەنەرگەتيكا, كولىك, ترانزيت, سونداي-اق مادەني-گۋمانيتارلىق بايلانىستاردى قوسا العاندا ەكىجاقتى ءوزارا ءىس-قيمىل ماسەلەلەرىنىڭ كەڭ اۋقىمى تالقىلاندى.
سىرتقى ىستەر ءمينيسترى ەكىجاقتى قارىم-قاتىناستاردىڭ سەرپىندى دامۋىن, مەملەكەت باسشىلارىنىڭ ستراتەگيالىق ماقساتتارعا قول جەتكىزۋدەگى ساياسي ەرىك-جىگەرىنىڭ ءرولىن اتاپ ءوتتى.
– قازاقستان مەن ازەربايجان ءوزارا تۇسىنىستىك پەن سەنىمنىڭ جوعارى دەڭگەيىن كورسەتەدى. بۇل ءبىزدىڭ بارلىق سالاداعى ىنتىماقتاستىعىمىزدى دايەكتى تۇردە دامىتۋعا مۇمكىندىك بەرەدى. ءبىز ءوزارا ءىس-قيمىلدى, اسىرەسە ساۋدا-ەكونوميكالىق جانە ينۆەستيتسيالىق سالالاردا ودان ءارى كەڭەيتۋگە باعىتتالعانبىز, – دەدى م.نۇرتىلەۋ.
تاراپتار كەيىنگى بەس جىلدا قابىلدانعان شارالار ارقىلى بەس ەسەگە ۇلعايىپ, 2024 جىلى 533,4 ملن دوللارعا جەتكەن تاۋار اينالىمىنىڭ ايتارلىقتاي وسكەنىن قاناعاتتانۋشىلىقپەن اتاپ ءوتتى. ەكونوميكالىق ىنتىماقتاستىقتى ودان ءارى تەرەڭدەتۋ ماقساتىندا بۇل كورسەتكىشتى 1 ملرد دوللارعا دەيىن جەتكىزۋ نيەتىن راستادى.
كەلىسسوزدەردىڭ ماڭىزدى تاقىرىبى ەنەرگەتيكا سالاسىنداعى ىنتىماقتاستىقتى نىعايتۋ بولدى. مينيسترلەر ازەربايجان اۋماعى ارقىلى قازاقستاندىق ەنەرگورەسۋرستاردىڭ ءترانزيتى سالاسىنداعى تابىستى ءوزارا ءىس-قيمىلدى قۇپتادى. باكۋ – تبيليسي-دجەيحان قۇبىرى ارقىلى مۇنايدى تاسىمالداۋ كولەمى وتكەن جىلدىڭ قورىتىندىسى بويىنشا 1,4 ملن توننانى قۇراعان. ال ورتامەرزىمدى كەلەشەكتە جىلىنا 2,2 ملن توننا دەڭگەيىنە جەتۋ كۇتىلىپ وتىر.
– ءبىز قازاقستاندى ورتالىق ازياداعى باستى سەرىكتەس رەتىندە قاراستىرامىز. بۇگىنگى كەلىسسوزدەر كولىك, ينۆەستيتسيالار, ەنەرگەتيكا جانە ءبىلىم بەرۋدى قوسا العاندا ءتۇرلى باعىتتارداعى ىنتىماقتاستىقتى ودان ءارى نىعايتۋعا دەگەن ءوزارا ۇمتىلىستى راستادى, – دەپ مالىمدەدى د.بايراموۆ.
تاراپتار اۋىل شارۋاشىلىعى, ونەركاسىپتىك كووپەراتسيا, عارىش جانە تەلەكوممۋنيكاتسيا سالاسىنداعى ءوزارا ءىس-قيمىلدى جانداندىرۋعا كەلىستى. ىنتىماقتاستىقتى نىعايتۋعا بىلتىر قۇرىلعان قازاقستان – ازەربايجان تىكەلەي ينۆەستيتسيالاردىڭ ينۆەستيتسيالىق قورى ىقپال ەتەدى.
كەلىسسوز بارىسىندا مادەني-گۋمانيتارلىق ىنتىماقتاستىققا باسا نازار اۋدارىلدى. كەيىنگى ەكى جىلدا ەلدەردە قازاقستان مەن ازەربايجاننىڭ مادەنيەت كۇندەرى ءوتتى. بيىل ناۋرىزدا باكۋدە قازاقستاننىڭ 23 ۋنيۆەرسيتەتىنىڭ قاتىسۋىمەن قازاقستاندىق جوعارى ءبىلىم بەرۋ كۇندەرى ءوتىپ, ونىڭ قورىتىندىسى بويىنشا ىنتىماقتاستىق تۋرالى 40 مەموراندۋمعا قول قويىلدى.
مينيسترلەر سونداي-اق وڭىرلىك جانە جاھاندىق كۇن ءتارتىبىنىڭ وزەكتى ماسەلەلەرىن تالقىلادى, بۇۇ, تمۇ, اوسشك, تمد, يىۇ جانە كاسپي ءسامميتى شەڭبەرىندە ودان ءارى ىنتىماقتاستىققا دايىندىعىن راستادى. كەلىسسوز قورىتىندىسى بويىنشا 2025–2026 جىلدارعا ارنالعان سىمارالىق ءوزارا ءىس-قيمىل جوسپارىنا قول قويىلدى.
– بۇگىنگى باسقوسۋ مەملەكەتتەرىمىزدىڭ كوپجىلعى جەمىستى ىقپالداستىعىن جاڭا ءارى ساپالى دەڭگەيگە كوتەرۋدىڭ جانە قول جەتكىزىلگەن ۋاعدالاستىقتى جۇزەگە اسىرۋ جولدارىن سارالاپ الۋدىڭ ورايلى ءساتى دەپ سانايمىز. قازاقستان مەن ازەربايجان – قارت كاسپيدىڭ قوس جاعالاۋىنا ەجەلدەن قونىس تەپكەن باۋىرلاس ەلدەر. ءبىزدى ءتۇبى ءبىر تۇركىتىلدەس حالىقتار رەتىندە ورتاق تاريح, ءوزارا جاقىن مادەنيەت جانە تامىرلاس رۋحاني قۇندىلىقتار بايلانىستىرادى, – دەدى ەلىمىزدىڭ سىرتقى ىستەر ءمينيسترى مۇرات نۇرتىلەۋ كەلىسسوزدەن كەيىنگى باق وكىلدەرى الدىندا جاساعان مالىمدەمەدە.
ءمينيستردىڭ ايتۋىنشا, قازاق-ازەربايجان قارىم-قاتىناسى كونسترۋكتيۆتى ساياسي ديالوگتىڭ ارقاسىندا قارقىندى دامىپ كەلەدى.