وڭىرلەردە سۋ تاسقىنىنىڭ الدىن الۋعا باعىتتالعان شارالار كۇشەيتىلدى

تجم مالىمەتىنشە, وڭىرلەردە 590 كم قورعانىس بوگەندەرى مەن بىلىكتەرى تۇرعىزىلعان, 822 كم درەناج جۇيەلەرى, كانالدار مەن ارىقتار جوندەلىپ, سالىنعان. اۆتوموبيل جانە تەمىرجول قاتىناستارىندا 960 سۋ وتكىزۋ قۇرىلىسى ورناتىلىپ, اۋىستىرىلعان. 74 وزەننىڭ قاۋىپتى ۋچاسكەلەرىندە 500 كم جۋىق ءتۇبىن تەرەڭدەتۋ, جاعالاۋدى نىعايتۋ جانە ارنالاردى تازارتۋ جۇمىستارى اتقارىلعان.

زارداپ شەككەندەردى قابىلداۋعا ارنالعان 3,5 مىڭنان استام پۋنكت دايىندالىپ, بروننان بوساتىلعان جاعدايدا تىرشىلىكتى قامتاماسىز ەتۋ قۇرالدارى مەن مەملەكەتتىك ماتەريالدىق رەزەرۆ تەحنيكاسى ايقىندالعان. وسى شارالاردىڭ بارلىعى حالىقتىڭ قاۋىپسىزدىگىن ارتتىرۋعا جانە ىقتيمال سۋ تاسقىنىنان بولاتىن زالالدى بارىنشا ازايتۋعا باعىتتالىپ وتىر.

الماتى وبلىسىنداعى سۋ تاسقىنى قاۋىپتى ۋچاسكەلەرگە اەروۆيزۋالدى تەكسەرۋ جۇرگىزىلدى. تەكسەرۋ باعىت بارتوعاي سۋ قويماسى, اقتوعان اۋىلى, ماساق اۋىلى, ىلە وزەنىنىڭ 164-ءشى كم, سونداي-اق باقاناس, باقباقتى جانە جيدەلى ەلدى مەكەندەرىن قوسا العاندا, ەڭبەكشىقازاق جانە بالقاش اۋداندارىنىڭ سۋ تاسقىنى قاۋپى بار ايماقتارىن قامتىعان. مۇددەلى ورگانداردىڭ وكىلدەرىمەن بىرلەسىپ وزەندەرگە, سۋ قويمالارىنا جانە قار جامىلعىسىنا اەروۆيزۋالدى تەكسەرۋ جۇرگىزىلگەن.

اقتوبە وبلىسىندا كوكتەمگى سۋ تاسقىنىنا دايىندىق جۇمىستارى قارقىندى جۇرگىزىلىپ جاتىر. جۇيەلەردى قاردان تازارتۋ جۇمىستارى وبلىس كولەمىندە جانە قالانىڭ بارلىق اۋداندارىندا جۇرگىزىلۋدە. سۋ تاسقىنىنىڭ الدىن الۋ ماقساتىندا تجم قۇتقارۋشىلارى, 20982 اسكەري ءبولىمىنىڭ, 30238 اسكەري ءبولىمىنىڭ قىزمەتكەرلەرى جانە اۋە قورعانىسى كۇشتەرى اسكەري ينستيتۋتىنىڭ كۋرسانتتارى «التىن وردا» شاعىن اۋدانىندا كانالداردى, نوسەر جانە سۋ وتكىزۋ قۇبىرلارىن قاردان تازارتۋ جۇمىستارىن جۇرگىزدى. بارلىعى 1,5 م تەرەڭدىكتە 3 كم قار تازارتىلدى. سونداي-اق ەلەك وزەنىندەگى مۇز كەپتەلىستەرىن الدىن الا جويۋدىڭ الدىن الۋ ماقساتىندا دەمالىس ورىندارى ورنالاسقان اۋداندا مۇز كەپتەلىستەرىن الدىن الا جويۋ بويىنشا جارىلىس جۇمىستارى جۇرگىزىلدى. ناتيجەسىندە وزەن ارناسىندا جارىلعىش زاتتاردىڭ كومەگىمەن 5 مىڭ شارشى مەتر اۋماقتا جارىلىس جۇمىستارى جۇرگىزىلدى. 

جەتىسۋ وبلىسىنىڭ اۋماعىندا سۋ تاسقىنى جاعدايى تۇراقتى, الدىن الۋ شارالارى جالعاسىپ جاتىر. «قازگيدرومەت» رمك دەرەكتەرىنە سايكەس قار جامىلعىسىنىڭ دەڭگەيى مەن توپىراقتىڭ ىلعالدىلىعى بىلتىرعى كورسەتكىشتەردەن اسىپ تۇسەدى, بۇل جوعارى باقىلاۋدى قاجەت ەتەدى. «قازگيدرومەت» الدىن الا بولجامى بويىنشا سۋ باسۋ قاۋپى جوعارى ايماقتارعا الاكول, ەسكەلدى, كەربۇلاق جانە كوكسۋ اۋداندارى جاتادى. ورتاشا قاۋىپتى اۋداندارعا – پانفيلوۆ جانە سارقان, تومەن تاۋەكەلگە – تالدىقورعان, قاراتال جانە اقسۋ اۋداندارى ەنىپ وتىر.

قوستاناي وبلىسىندا دايىندىق شارالارى بەلسەندى جۇرگىزىلۋدە. ءوڭىردىڭ بارلىق اۋداندارىندا پروفيلاكتيكالىق جۇمىستار كۇشەيتىلدى, سۋ قۇبىرى جۇيەلەرى تازارتىلدى, ينەرتتى ماتەريالدار دايىندالىپ جاتىر. سۋ تاسقىنىنىڭ الدىن الۋ جونىندەگى ءىس-شارالار شەڭبەرىندە تجم 68303 اسكەري ءبولىمىنىڭ 50 اسكەري قىزمەتشى مەن 5 تەحنيكاسى اباي وبلىسىنان قوستاناي وبلىسىنا جىبەرىلگەن. اسكەري قىزمەتشىلەر سۋ تاسقىنىنىڭ ىقتيمال سالدارىن جويۋ جانە قورعانىش قۇرىلىستارىن نىعايتۋ بويىنشا جۇمىستار جۇرگىزەدى.