انكارادا نۇرعيسا تىلەنديەۆتىڭ 100 جىلدىق مەرەيتويىنا وراي تۇركسوي ۇيىمى اياسىنداعى ەسكە الۋ جىلىنىڭ اشىلۋ ءراسىمى ءوتتى, دەپ حابارلايدى Egemen.kz سىرتقى ىستەر مينيسترلىگىنىڭ ءباسپاسوز قىزمەتىنە سىلتەمە جاساپ.
ءىس-شاراعا تۇركسوي باس حاتشىسى سۇلتان راەۆ, قازاقستاننىڭ تۇركياداعى ەلشىسى ەركەبۇلان ساپيەۆ, انكارا مۋزىكا جانە ونەر ۋنيۆەرسيتەتىنىڭ رەكتورى, تۇركى الەمى ونەر ۋنيۆەرسيتەتتەرى كەڭەسىنىڭ باسشىسى ەرحان وزدەن, قازاقستاننان ارنايى كەلگەن ونەرپازدار, ديپلوماتتار, دەپۋتاتتار مەن قازاق دياسپوراسى قاتىسقان.
اشىلۋ سالتاناتى انكارانىڭ اتاقتى «تۇركى الەمى» مۋزىكا توبىنىڭ ن.تىلەنديەۆ شىعارمالارىن ورىنداۋىمەن باستاۋ العان. ودان ءارى قوناقتار كومپوزيتوردىڭ فوتوكورمەسىنىڭ تۇساۋىن كەسىپ, ن.تىلەنديەۆ مەموريالدى مۋزەيىنىڭ عىلىمي قىزمەتكەرى نۇرمۇحان شايمەردەنوۆ كەلگەن قوناقتارعا ۇلى كۇيشىنىڭ ونەر جانە ءومىر جولىن تانىستىرعان.
«نۇرعيسا تىلەنديەۆتىڭ مۋزىكاسى بىزگە تەك ونەردىڭ بيىگىن كورسەتىپ قانا قويماي, ەلىمىزدىڭ مادەنيەتىنە جانە ۇلتتىق بىرەگەيلىگىنە دەگەن سۇيىسپەنشىلىكتى ارتتىرادى. ونىڭ ەلى ءۇشىن سىڭىرگەن ەڭبەگى ۇرپاقتان-ۇرپاققا ۇلگى بولىپ قالارى ءسوزسىز», دەدى قازاقستاننىڭ تۇركياداعى ەلشىسى ەركەبۇلان ساپيەۆ
تۇركسوي باس حاتشىسى س.راەۆ نۇرعيسا تىلەنديەۆتىڭ تەك قازاق جۇرتىنا عانا ەمەس بۇكىل تۇركى الەمىنە بەلگىلى تۇلعا بولعانىن العا تارتقان.
قازاقستاننان ارنايى كەلگەن قازاق مەملەكەتتىك اكادەميالىق فيلارمونياسىنىڭ ديرەكتورى اقان ءابدۋالي, ن.تىلەنديەۆ اتىنداعى اكادەميالىق فولكلورلى-ەتنوگرافيالىق «وتىرار سازى» وركەسترىنىڭ كۇيشىسى ارسەن تۇرسىن, انكاراداعى قازاق ستۋدەنتتەرىنەن قۇرالعان «وتاۋ» ءانسامبلى كومپوزيتوردىڭ كەرەمەت شىعارمالارىن ورىنداپ, ءىس-شاراعا ەرەكشە اتموسفەرا سىيلادى.
ەستەرىڭىزگە سالا كەتەيىك, 2023 جىلى ازەربايجاندا وتكەن تۇركسوي ۇيىمىنا مۇشە ەلدەردىڭ مادەنيەت مينيسترلەرىنىڭ 40-شى تۇراقتى كەڭەسى قورىتىندىسى بويىنشا 2025 جىل ن.تىلەنديەۆتىڭ 100 جىلدىق مەرەيتويىنا وراي تۇركسوي ۇيىمى اياسىنداعى ۇلى كومپوزيتوردى ەسكە الۋ جىلى بولىپ جاريالانعان بولاتىن.