اباي وبلىسىنىڭ پوليتسەيلەرى جەدەل ىزدەستىرۋ شاراسى اياسىندا ەسىرتكى زاتتارىن زاڭسىز ساقتاۋ فاكتىسىن انىقتادى, دەپ حابارلايدى Egemen.kz.
پوليتسيا باسقارماسى ۇسىنعان دەرەككە سايكەس, كانونەركا اۋىلىنىڭ تۇرعىنى ۇلكەن كولەمدەگى ەسىرتكىنى ساقتاپ كەلگەن.
شۇعىل ءتىنتۋ كەزىندە 46 جاستاعى ەر ادامنىڭ كۇرتەسىنىڭ ىشكى قالتاسىنان ەرەكشە ءيىسى بار, قويۋ جاسىل ءتۇستى وسىمدىك تەكتەس زات سالىنعان قاعاز وراما تابىلدى. سىرتقى قالتاسىنان دا سوعان ۇقساس زاتتىڭ شاشىراڭقى ءتۇرى انىقتالدى.
سونىمەن قاتار, تۇرعىن ءۇي اۋماعىن ءتىنتۋ بارىسىندا شارۋاشىلىق قۇرىلىسىنان تاعى ءبىر قاعاز وراما تابىلدى, ونىڭ ىشىندە دە قويۋ جاسىل ءتۇستى وسىمدىك تەكتەس زات بولعان. باسقا ءبىر قۇرىلىستان دا وسىمدىك تەكتەس زاتتىڭ شاشىراڭقى ءتۇرى انىقتالدى. ۇيدەگى ەدەن استىنداعى جەرتولەدەن كولەمى 0,5 ليتر بولاتىن ەكى شىنى بانكادان دا ەسىرتكى تابىلعان.
ساراپتاما قورىتىندىسىنا سايكەس, تاركىلەنگەن زاتتىڭ جالپى سالماعى 890,05 گرامم قۇرعاق ماريحۋانا ەكەنى انىقتالدى. اتالعان فاكتى بويىنشا كۇدىكتىگە قاتىستى سوتقا دەيىنگى تەرگەۋ باستالدى.