اقپاننىڭ 22-سىنەن 23-ىنە قاراعان ءتۇنى توتەنشە جاعدايلار قىزمەتى قوستاناي وبلىسى, امانگەلدى اۋدانىنىڭ امانتوعاي اۋىلىنان 22 شاقىرىم جەردەگى اۋليەكول-جالداما اۆتوجولىنىڭ جابىق ۋچاسكەسىندە 98 ادامدى قۇتقاردى, دەپ حابارلايدى Egemen.kz.
تجم-ءنىڭ حابارلاۋىنشا, قار قۇرساۋىندا قالعان جولاۋشىلاردىڭ اراسىندا 18 بالا بار. قۇتقارىلعان 7 ادام, ونىڭ ىشىندە 6 بالا امانتوعاي اۋىلىنىڭ جىلىتۋ پۋنكتىنە جەتكىزىلدى.
سونداي-اق اق تۇتەك بوراننان جۇرە الماي قالعان 8 جەڭىل كولىك كۇرەلگەن جولعا دەيىن جەتكىزىلدى.
اۋا رايىنىڭ كۇرت بۇزىلۋىنان سارىكول اۋدانىنىڭ سونالى اۋىلىنان 5 شاقىرىم جەردە سارىكول-كومسومولسكوە اۆتوكولىك جولىندا ەكى ادامى بار جەڭىل كولىك قار قۇرساۋىندا قالعان. كومەككە كەلگەن تجم كۇشتەرى ولاردى قاۋىپسىز جەرگە جەتكىزدى.
جولدا قالعان جولاۋشىلاردىڭ ەشقايسىنا مەديتسينالىق كومەك كورسەتىلگەن جوق.
توتەنشە جاعداي قىزمەتىنىڭ ماماندارى ەل تۇرعىندارىنا اۋا رايى قولايسىز ۋاقىتتا جولعا شىعۋ قاۋىپتى ەكەنىن ەسكەرتەدى.