قاسىم-جومارت توقاەۆ سي تسزينپين مەن ونىڭ بارشا وتانداسىن «چۋنتسزە» مەرەكەسىمەن قۇتتىقتاپ, جەدەلحات جولدادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
پرەزيدەنت جاڭارۋ مەن بىرلىكتى, مەيىرىمدىلىك پەن جاسامپازدىقتى دارىپتەيتىن قاستەرلى مەيرامعا وراي جىلى لەبىزىن جەتكىزىپ, ەلىن بۇگىنگىدەن دە بيىك بەلەستەرگە جەتەلەۋدى كوزدەگەن قحر توراعاسىنىڭ ستراتەگيالىق باستامالارى مەن يگى جوسپارلارىنا ساتتىلىك تىلەدى.
«قازاقستان مەن قىتايدىڭ ماڭگى ءارى جان-جاقتى ستراتەگيالىق سەرىكتەستىگى كۇننەن-كۇنگە جاندانىپ, مىزعىماس دوستىق پەن ءوزارا ءتيىمدى ىقپالداستىقتىڭ ۇلگى تۇتارلىق كورىنىسىنە اينالعانىن زور ريزاشىلىقپەن اتاپ وتەمىن. بۇل يگى ىسكە ءسىزدىڭ قوسىپ وتىرعان ەرەكشە ۇلەسىڭىزدى جوعارى باعالايمىن جانە قىتايمەن سان قىرلى ىنتىماقتاستىعىمىزدى ودان ءارى نىعايتۋعا مۇددەلى ەكەنىمدى راستايمىن, دەپ جازىلعان جەدەلحاتتا.