سەناتتىڭ الەۋمەتتىك-مادەني دامۋ جانە عىلىم جونىندەگى كوميتەتىنىڭ دەپۋتاتتارى كەڭەيتىلگەن وتىرىس وتكىزدى. وندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت, ءبىلىم بەرۋ جانە تالىمگەرلىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ تالقىلاندى.
زاڭ ۇلتتىق زاڭنامانى جەتىلدىرۋگە, ونىڭ ىشىندە مەملەكەتتىك ءتىلدىڭ قولدانىلۋىن كەڭەيتۋگە, ونىڭ مارتەبەسىن نىعايتۋعا, بالا قۇقىقتارىن قورعاۋعا جانە ءبىلىم بەرۋ جۇيەسىن دامىتۋعا باعىتتالعان.
ماسەلەن, جەتىم بالالار مەن اتا-اناسىنىڭ قامقورلىعىنسىز قالعان بالالارعا تالىمگەرلىك ينستيتۋتىن رەتتەۋ ءۇشىن زاڭناماعا «تالىمگەرلىك جونىندەگى ۇيىم» ۇعىمى ەنگىزىلەتىن بولدى. تالىمگەر بولۋعا ۇمىتكەر ادامدار مىندەتتى تۇردە تالىمگەرلىك بويىنشا وقۋدان وتۋگە ءتيىس بولادى, سونداي-اق تالىمگەرلىك جونىندەگى وقۋدى ۇيىمداستىراتىن ۇيىمداردىڭ قۇقىقتارى مەن مىندەتتەرى ايقىندالادى.
ۇلتتىق سوزدىك قورى مەن قازاق ءتىلىنىڭ ۇلتتىق كورپۋسىن قۇرۋ تۋرالى ەرەجەلەر ەنگىزىلەدى, ولار ماتىندەر مەن سوزدىك قورىنا قول جەتكىزۋدى, سونداي-اق جاساندى ينتەللەكتى پايدالانا وتىرىپ, ءتىل ۇلگىسىن قالىپتاستىرۋدى قامتاماسىز ەتەدى.
دارىندى وقۋشىلاردى مەملەكەتتىك قولداۋ جانە ولاردىڭ عىلىمي جۇمىسىن ىنتالاندىرۋ ماقساتىندا حالىقارالىق عىلىمي جوبالار كونكۋرستارىنىڭ جەڭىمپازدارى مەن جۇلدەگەرلەرىنە مەملەكەتتىك ءبىلىم بەرۋ گرانتتارىن كونكۋرستان تىس بەرۋ جونىندەگى ەرەجە بولادى.
دەپۋتاتتار كەڭەيتىلگەن وتىرىستىڭ قورىتىندىسى بويىنشا زاڭدى پالاتانىڭ قاراۋىنا جىبەرۋ تۋرالى شەشىم قابىلدادى.