«بيىل قاڭتار ايىندا جاۋىن-شاشىن مولشەرى بىلتىرعىداي بولدى. قازىر تاسقالا, سىرىم, ءبورلى, تەرەكتى, بايتەرەك اۋداندارىندا, ورال قالاسىندا توپىراقتا قالىڭدىعى 2 سم توڭ پايدا بولدى. اۋا رايى كۇرت جىلىپ, جاڭبىر مول جاۋاتىن بولسا, ناۋرىز ايىندا بۇل سۋ تاسقىنىنا سوقتىرۋى ىقتيمال», دەپ حابارلايدى «قازگيدرومەت» قىزمەتى باتىس قازاقستان وبلىستىق فيليالىنىڭ ديرەكتورى تىلەگەن شاپانوۆ.
باتىس قازاقستان وڭىرىندە كوكتەمگى سۋ تاسقىنى بيىل دا بولۋى مۇمكىن دەگەن بولجام بۇرىن دا ايتىلعان ەدى. سوندىقتان وبلىستا تابيعات سىنىنا دايىندىق قىزۋ ءجۇرىپ جاتىر. جاز بويى جايىق وزەنىنىڭ جاعالاۋى بەكىتىلىپ, سۋ باسۋ قاۋپى بار اۋماقتاردا جالپى ۇزىندىعى 102 شاقىرىم بولاتىن 54 قورعانىس بوگەتى تۇرعىزىلدى. توتەنشە جاعداي تۋا قالسا, جۇمىلا كەتۋگە 1817 تەحنيكا, 4 مىڭنان استام مامان ساقاداي-ساي تۇر.
وبلىس اكىمدىگىنىڭ ءباسپاسوز قىزمەتى حابارلاعانىنداي, كوكتەمگى سۋ تاسقىنىنا قارسى دايىندىق جۇمىسى بىلتىرعى سۋ تاسقىنى زارداپتارىن جويۋ ىسىمەن بىرگە ءجۇردى. ماماندار جاز كەزىندە-اق قاۋىپتى جەرلەردى زەرتتەپ, سونىڭ ناتيجەسىندە الدىن الۋ جۇمىستارىن جۇرگىزۋ ماقساتىندا ارنايى جول كارتاسى ازىرلەندى.
جاقىندا وبلىس اكىمدىگىندە كوكتەمگى تاسقىنعا دايىندىق بارىسىن پىسىقتاعان تاعى ءبىر جيىن ءوتتى. وبلىس اكىمى ناريمان تورەعاليەۆ بۇل ماسەلەنىڭ مەملەكەت باسشىسىنىڭ تىكەلەي باقىلاۋىندا ەكەنىن اتاپ ءوتتى. باسقوسۋدا سۋ باسۋ قاۋپى بار اۋماقتاردا تاسقىننىڭ الدىن الۋعا دايىندىق بارىسى جونىندە جاۋاپتى تۇلعالار ەسەپ بەردى. سونىڭ ىشىندە سۋ قويمالارى مەن توعانداردىڭ جاعدايى ەرەكشە باقىلاۋعا الىنعان. قازىر بارلىق سۋ وتكىزەتىن ارنالاردىڭ تازالىعى پىسىقتالىپ جاتىر. ىقتيمال سۋ تاسقىنىن جويۋعا ارنالعان كۇش پەن قۇرالداردىڭ, قورعانىس بوگەتتەرىنىڭ دايىندىعى كۇن تارتىبىندە تۇر.
«كوكتەمگە بارىنشا دايىن بولۋىمىز كەرەك. سۋ تاسقىنىنىڭ الدىن الۋ شارالارىن ساپالى جۇرگىزۋ قاجەت. ورال, اقساي قالالارى مەن بارلىق اۋدان اكىمدەرىنە, ءتيىستى مەكەمە باسشىلارىنا وسى جۇمىستى كۇشەيتۋدى ەسكەرتەمىن», – دەدى وبلىس اكىمى ن.تورەعاليەۆ.
باتىس قازاقستان وبلىسى