دەنە شىنىقتىرۋ جانە بۇقارالىق سپورت اكادەمياسى سپورت مەنەدجمەنتىنىڭ كوشباسشىلارىن دايارلاۋ ماسەلەسىنە ارنالعان VISION 2025 ءىس-شاراسىن ۇيىمداستىردى. باسقوسۋعا تۋريزم جانە سپورت ءمينيسترى ەربول مىرزابوسىنوۆ, عىلىم جانە جوعارى ءبىلىم ءمينيسترى ساياسات نۇربەك, سپورتتى دامىتۋ ديرەكتسياسى, سپورت فەدەراتسيالارى, وتاندىق, شەتەلدىك جوعارى وقۋ ورىندارىنىڭ پروفەسسور-وقىتۋشىلار قۇرامى وكىلدەرى, سپورت ساڭلاقتارى, EMBA باعدارلاماسىنىڭ تۇلەكتەرى قاتىستى.
جاھاندىق تاجىريبەگە ۇڭىلسەك, سپورتتا ۇزدىك ناتيجەگە قول جەتكىزىپ جۇرگەن ەلدەر رەفورمانى سپورت مەنەدجمەنتىن, سالاداعى عىلىم-ءبىلىمدى دامىتۋدان باستايدى. تسيفرلاندىرۋدى يگەرۋ, جاڭا تەحنولوگيالارعا يەك ارتۋ تابىسقا جەتكىزەدى. وسى تۇرعىدا تۋريزم جانە سپورت مينيسترلىگى عىلىم جانە جوعارى ءبىلىم مينيسترلىگىمەن بىرلەسىپ, سالاعا بىلىكتى باسشى, تاجىريبەلى مامان دايارلاۋعا باسىمدىق بەرىپ وتىر. Executive MBA (EMBA) Sport Management باعدارلاماسى – سپورتتاعى سان سالالى جۇمىستىڭ ءبىر باعىتى. تۋريزم جانە سپورت ءمينيسترى ەربول مىرزابوسىنوۆ پەن عىلىم جانە جوعارى ءبىلىم ءمينيسترى ساياسات نۇربەك باعدارلاما تۇلەكتەرىنە ديپلوم تاپسىردى.
– ەمۆا باعدارلاماسى بويىنشا وقىپ, تاجىريبەسىن ارتتىرعان ماماندارعا تابىس تىلەيمىز. بۇل – سپورت مەنەدجمەنتىن, سپورتتاعى عىلىمدى, سپورت مەديتسيناسىن دامىتۋ ماقساتىندا جاسالىپ وتىرعان ماڭىزدى قادام. سپورتشىلارىمىز جاھاندىق دەڭگەيدە تابىستى ونەر كورسەتسىن دەسەك, الەمنىڭ وزىق تاجىريبەلەرىن, باعدارلامالارىن جان-جاقتى ۇيرەنىپ, يگەرگەنىمىز ءجون. قازىردە سپورت عىلىمى اۋاداي قاجەت باعىت. ەرتەڭ اكادەميا تۇلەكتەرى سپورتتىڭ ءار باعىتىندا ءوز تاجىريبەسىن قولدانادى. اكادەميادا باكالاۆراتىندا دەنەشىنىقتىرۋ مۇعالىمدەرىنەن باستاپ, سپورت تۇرلەرىنە جەكە-جەكە ماماندانعان جاتتىقتىرۋشىلار وقيدى. كەلەشەكتە بوكس, كۇرەس, حوككەي, دزيۋدو, فۋتبول, تاعىسىن-تاعى سپورت تۇرلەرى بويىنشا ارنايى مامان دايارلايتىن وقۋ ورىندارى كوبەيۋگە ءتيىس. سپورت عىلىمى, سپورت مەنەدجمەنتى, سپورت مەديتسيناسىنا وزىق ماماندار قاجەت. سوندا عانا ەل سپورتىنىڭ الەمدىك ارەنادا باسەكەگە قابىلەتى ارتادى, دەدى ە.مىرزابوسىنوۆ.
حالىقارالىق سەرىكتەستەرمەن بىرلەسىپ ازىرلەنگەن ەمۆا باعدارلاماسى سپورت مەنەدجەرلەرىنىڭ الەۋەتىن ارتتىرۋعا, جاڭا ساتىعا كوتەرۋگە كومەكتەسەدى. سپورت مەكەمەلەرىن باسقارۋدىڭ جاڭاشىل ءادىس-تاسىلدەرى سالاعا بىرتە-بىرتە ەنگىزىلەدى. ساياسات نۇربەك وسى جونىندە كەڭىنەن ايتىپ بەردى.
– قازىر سپورت سالاسى دامىپ جاتىر. بىراق بىزدە كاسىبي مەنەدجەرلەر از. سپورت – كەشەندى سالا, ونىڭ باعىتتارى سپورت مەديتسيناسى, سپورت مەنەدجمەنتى, سپورت فارماكولوگياسى بولىپ جالعاسا بەرەدى. ەمۆا باعدارلاماسى ارقىلى شەتەلدىك ۋنيۆەرسيتەتتەرمەن بايلانىس ورناتتىق. باسشى كادرلاردىڭ شەتەلدە تاجىريبە الماسۋىنا كوڭىل ءبولىندى, وقۋ باعدارلامالارى پىسىقتالدى. وسى ارقىلى سپورت فەدەراتسيالارى, ۇلتتىق قۇرامالار كاسىبي ماماندانعان مەنەدجەرلەرمەن تولىعادى. قازىر ۇلتتىق سپورت قارقىندى دامىپ جاتىر, فەدەراتسيالار قۇرىلدى. سپورتشىلاردى حالىقارالىق دەڭگەيگە شىعارۋ دەگەن تىپتەن بولەك جۇمىس. وسى تۇرعىدا سپورت سالاسىنا مەنەدجەر دايارلاۋ, سپورتتىق مەديتسينانى دامىتۋ اسا ماڭىزدى. بيىل جەلتوقساندا ۇلتتىق سپورت ۋنيۆەرسيتەتى اشىلادى دەگەن اقجولتاي حابارىمىز بار. ۋنيۆەرسيتەتتە سپورت مەديتسيناسى, سپورت فارماكولوگياسى, سپورتتاعى عىلىم سىندى باعىتتار قامتىلادى, دەدى س.نۇربەك.
دەنە شىنىقتىرۋ جانە بۇقارالىق سپورت اكادەمياسىندا وقۋعا عىلىم جانە جوعارى ءبىلىم مينيسترلىگى جىل سايىن گرانت قاراستىرادى. بۇدان وزگە, شاكارىم ۋنيۆەرسيتەتىندە پولشانىڭ ۇزدىك ەكونوميكا جانە سپورت مەنەدجەرلەرىن دايارلايتىن ۋنيۆەرسيتەتىنىڭ فيليالى اشىلعان. ياعني جوعارىدا ايتقانداي, ەمۆا – سپورتتى دامىتۋعا ارنالعان باعدارلامالاردىڭ تەك ءبىر باعىتى عانا. باعدارلامامەن ءبىر جىل وقىپ, ديپلوم العان تۇلەكتەردىڭ ءبىرى, اقتوبە قالاسىنىڭ تۇرعىنى, سامبودان, امبەباپ جەكپە-جەكتەن الەم چەمپيونى رايسا بايليەۆا:
– باپكەرلىكپەن جاستايىمنان اينالىسامىن. كاسىبي سپورتپەن ۇزاق جىل اينالىستىم, قۇقىق قورعاۋ سالاسىندا جۇمىس ىستەدىم, قوعامدىق جۇمىستارعا ارالاستىم. دەنە شىنىقتىرۋ جانە بۇقارالىق سپورت اكادەمياسىنىڭ ارقاسىندا EMBA باعدارلاماسى بويىنشا وقىدىق. وقۋ بارىسىندا كوپ نارسەنى ۇيرەندىك. شۆەتسيا, پولشاعا بارىپ, شەتەلدىك تاجىريبەمەن تانىسىپ قايتتىق. قازىر اقتوبە قالاسىنداعى №1 مەكتەپتە دزيۋدو, سامبو ۇيىرمەسىنەن ساباق بەرەمىن. بالالاردى بۇقارالىق سپورتقا باۋلۋعا كۇش سالىپ كەلەمىز. وسى جىلدار ارالىعىندا سامبو, امبەباپ جەكپە-جەكتەن الەم, ازيا چەمپيوناتىنىڭ جۇلدەگەرلەرىن تاربيەلەدىك. قازىر مەكتەپتە 45 بالا سپورتپەن شۇعىلدانادى. كەلەشەكتە سپورتپەن مىقتاپ اينالىسىپ, ۇلكەن جەتىستىككە جەتەتىن بالالار شىعادى دەپ ۇمىتتەنەمىز, – دەيدى.
استاناداعى دەنە شىنىقتىرۋ جانە بۇقارالىق سپورت اكادەمياسى 2021 جىلى دەنە شىنىقتىرۋ مەن سپورتتى دامىتۋدىڭ 2026 جىلعا دەيىنگى تۇجىرىمداماسى نەگىزىندە اشىلعان. قازىر دەنەشىنىقتىرۋ پەداگوگتەرىن, سپورت تۇرلەرى بويىنشا جاتتىقتىرۋشىلاردى, سپورت مەنەدجەرلەرىن, سپورت پسيحولوگتەرى مەن سالانىڭ باسقا دا كادرلارىن دايارلايدى. مۇندا باكالاۆرياتتا, ماگيستراتۋرادا وقۋعا مۇمكىندىك بار.
وقۋ ورنىنىڭ اكادەميالىق ماسەلەلەر جونىندەگى پرورەكتورى تۇرسىنزادا قۋانعاليەۆا اكادەميادا سپورت مەنەدجمەنتىنە 150-دەن استام ادام وقىپ جاتقانىن ايتتى. وسى جولى 39 تۇلەك ديپلوم السا, باسقاسى باعدارلامانى جىل سوڭىنا دەيىن اياقتايدى. ايتا كەتەرلىگى, ولار سپورت سالاسىنداعى ءتۇرلى ۇيىمداردىڭ, مينيسترلىكتىڭ توپ مەنەدجەرلەرى. EMBA باعدارلاماسى باسشىلارعا كوشباسشىلىقتى, ستراتەگيالىق جوسپارلاۋدى, قارجىنى ءتيىمدى باسقارۋدى ۇيرەتۋگە ارنالعان. اكادەميا وسى قوس ديپلومدى باعدارلامانى ازىرلەۋ ماقساتىندا پولشا, بەلگيا, فرانتسيامەن بايلانىس ورناتقان. باعدارلاما بيزنەس باعىتىنا جاقىن بولعاندىقتان, مەملەكەتتەن گرانت قاراستىرىلماعان. ءار ادام وقۋ اقىسىن ءوز قالتاسىنان تولەيدى. اكادەميا تەك شەتەلدىك تاعىلىمدامانى قارجىلاندىرادى.