ەڭبەك جانە حالىقتى الەۋمەتتىك قورعاۋ مينيسترلىگى ەرەكشە قاجەتتىلىكتەرى بار ادامدارعا ينۆاتاكسي قىزمەتىن كورسەتۋ جونىندەگى قاناتقاقتى جوبانى قولعا العالى ءبىراز ۋاقىت بولدى. وتكەن جىلى استانا, الماتى قالالارىندا قىزمەتتىڭ وسى ءتۇرى 207,2 مىڭ مارتە كورسەتىلدى.
سالىستىرۋ ءۇشىن ايتساق, 2023 جىلى مۇگەدەكتىگى بار ادامدار ينۆاتاكسي قىزمەتىنە 53,9 مىڭ رەت جۇگىنگەن ەكەن. ينۆاتاكسيدىڭ ساپاسى مەن قىزمەت كورسەتۋ جىلدامدىعىن ارتتىرۋ ماقساتىندا ەڭبەك جانە حالىقتى الەۋمەتتىك قورعاۋ مينيسترلىگى اكىمدىكتەرمەن بىرلەسىپ, قىزمەتتى جەتىلدىرۋدىڭ ءتۇرلى جولدارىن قاراستىرىپ جاتىر. ايتالىق, وسىعان دەيىن ازاماتتار ينۆاتاكسيگە كۇن بۇرىن, تەلەفون ارقىلى جازىلاتىن. ساپاردى الدىن الا جوسپارلاپ, ينۆاتاكسيدى كۇتۋگە ءماجبۇر بولاتىن. ونىڭ ۇستىنە كولىك قۇرالدارىنىڭ جەتىسپەۋشىلىگى دە بايقالادى. وسى تۇيتكىلدى شەشۋ ماقساتىندا مينيسترلىك ۇسىنعان قاناتقاقتى جوبا ارقىلى ينۆاتاكسي قىزمەتىنە تاكسي اگرەگاتورلارىن تارتۋعا مۇمكىندىك تۋدى. مۇنداعى باستى شارت – ساپارلاردىڭ اقىسىندا ارتىق پايىزدىڭ بولماۋى. ولار ادەتتە اگرەگاتور پلاتفورمالارىنىڭ پايداسىنا اۋدارىلادى.
بۇل رەتتە «ياندەكس» كومپانياسىنىڭ جوباعا وتەۋسىز نەگىزدە قاتىسۋعا نيەت بىلدىرگەنى قۋانتتى. ازاماتتار ەندى «ياندەكس Go» ءموبيلدى قوسىمشاسى ارقىلى ينۆاتاكسي قىزمەتىن پايدالانا الادى. بۇل – قىزمەت الۋشىعا كولىكتى تەزىرەك تاڭداۋعا, ونلاين رەجىمدە تاپسىرىس مارتەبەسىن قاداعالاۋعا, جاسالعان ساپارلارعا مونيتورينگ جۇرگىزۋگە مۇمكىندىك بەرەدى. قوسىمشادا مۇگەدەكتىگى بار ادامدار جۇرگىزۋشىگە ساپارداعى ەرەكشە قاجەتتىلىكتەرى تۋرالى ەسكەرتۋگە ارنالعان مۇمكىندىكتەر ەكرانى بار. جۇرگىزۋشىلەر ادامدى كولىككە وتىرعىزاردا, تۇسىرەردە قالاي كومەك كورسەتۋگە بولاتىنى تۋرالى ارنايى نۇسقاۋلار الادى. بيىل جوبانى قاناتقاقتى رەجىمدە ىسكە اسىرۋ جالعاسادى. تاجىريبەنى ەلدىڭ باسقا دا وڭىرلەرىنە تاراتۋ جوسپارلانىپ وتىر.