تۇركيادا قازاق-تۇرىك سوزدىگى مەن «تۇركى تىلدەرىندەگى ەتىستىكتەر» اتتى ەڭبەكتىڭ تانىستىرىلىمى ءوتتى. حالىقارالىق تۇركسوي ۇيىمىنىڭ شتاب پاتەرىندە وتكەن مادەني ماجىلىستە تۋىستاس تىلدەردىڭ ءوزارا بايلانىسى, بۇگىنى مەن بولاشاعى ءسوز ەتىلدى, دەپ حابارلايدى Egemen.kz.
ءىس-شاراعا تۇركيا جانە قازاقستان ۋنيۆەرسيتەتىنىڭ ءتىل عالىمدارى مەن مادەنيەت قايراتكەرلەرى قاتىستى. ولار قازاق جانە تۇرىك تىلدەرىنىڭ اراسىنداعى لەكسيكالىق, گرامماتيكالىق ۇقساستىقتار مەن ايىرماشىلىقتاردى قاراستىرىپ, تۇركى تىلدەرىندەگى ەتىستىكتەردىڭ تاريحى مەن قازىرگى جاعدايى جونىندە بايانداما جاسادى. سونىمەن قاتار تۇركى دۇنيەسىنە ورتاق تىلدىك پلاتفورما جاساقتالىپ, تسيفرلاندىرۋ داۋىرىندەگى تەحنولوگيالىق تەرميندەردى شىعارۋ جوسپارى تالقىعا سالىندى.
كىتاپ اۆتورى دوتسەنت كەنەن كوچ سوزدىكتەردىڭ عىلىمي جۇمىس قانا ەمەس, باۋىرلاس حالىقتار اراسىندا ءتىل ارقىلى بايلانىس ورناتۋدىڭ جاڭا قادامى ەكەنىن ايتادى.
«قازاق جانە تۇرىك تىلدەرىنىڭ اراسىنداعى جاقىندىقتى, ۇقساستىقتار مەن ايىرماشىلىقتاردى زەرتتەۋ ارقىلى ءبىز ءبىر-ءبىرىمىزدى تەرەڭىرەك تۇسىنۋگە مۇمكىندىك الامىز. تىلدىك زەرتتەۋلەردىڭ ماڭىزدىلىعى كۇننەن-كۇنگە ارتىپ كەلەدى. ويتكەنى ءتىل - تەك قارىم-قاتىناس قۇرالى عانا ەمەس, مادەنيەتىمىزدىڭ ايناسى», دەيدى كىتاپ اۆتورى.