مەملەكەتتىك ستيپەنديا تابىستالدى

ادەبيەت پەن ونەر سالاسىنداعى ارنايى ستيپەنديا جىل سايىن قۇرمەتتى اتاقتار مەن مەملەكەتتىك ناگرادالارعا يە بولعان شىعارماشىلىق مايتالماندارىن, مادەنيەت قايرات­كەرلەرىن, سونداي-اق ەل رۋحانياتىن قالىپتاستىرۋعا, ساقتاۋعا جانە دامىتۋعا ۇلەس قوسقان  تالانت يەلەرىن قولداۋ ماقساتىندا بەرىلىپ كەلەدى.

ايتۋلى تىزىمگە ەسىمى ەنگەن ازاماتتارعا سەرتيفيكات تابىستاعان مينيستر ايدا بالاەۆا ونەر مەن مادەنيەتتە كورىنىس تاپقان ەلەۋلى جەتىستىكتەردى سارالاپ, مەملەكەت تاراپىنان سالانى قولداۋعا باعىتتالىپ جاتقان جۇمىستار تۋرالى اتاپ ءوتتى.

– «دانا ابايدان باستاپ قازاقتىڭ ءاربىر جازۋشىسى, اقىنى, ونەر مايتالمانى جۇرەگىندە ۇستاپ, ەل-جۇرتىنا امانات ەتكەن ەسكىرمەيتىن ۇلى قاعيدا بار: «مادەنيەت پەن ادەبيەت – ۇلتتىڭ رۋحىن ۇلى بيىكتەرگە كوتەرەتىن قوس قانات». بۇگىن, مىنە, وسى ورتادا سول تالاپتى ومىرلىك قاعيداتى ەتىپ, شىعارماشىلىق ىزدەنىسىن حالقىمىزدىڭ رۋحاني ءوسىپ-وركەندەۋىنە ارقاۋ قىلعان ءبىر توپ ازاماتتى قۇرمەتكە بولەپ وتىرمىز. ءسوز جوق, بۇل – ەڭ الدىمەن سىزدەردىڭ ۇزاق جىلعى تابىستى ەڭبەكتەرىڭىزدىڭ ناتيجەسى. پرەزيدەنتتىڭ وسى ەڭبەكتى جوعارى باعالاپ, ۇلتتىق ادەبيەت پەن ونەرىمىزگە ەرەكشە كوڭىل ءبولىپ, ءاردايىم قولداۋىنىڭ ارقاسى. بۇل سىزدەردىڭ ەل ءۇشىن اسا ماڭىزدى شىعارماشىلىق جۇمىستارىڭىزعا جاڭا مۇمكىندىك, كەڭ ءورىس اشاتىنىنا سەنىمىم مول. پرەزيدەنت قاسىم-جومارت توقاەۆتىڭ ۇلتتىق رۋحانيات تۋرالى ۇنەمى ايتىپ, ونىڭ ەلدىك جولىنداعى وراسان كۇشى مەن مول مۇمكىندىكتەرىنە قوعامنىڭ نازارىن اۋدارىپ جۇرگەنىن جاقسى بىلەسىزدەر. جىلداعى حالىققا ارناعان جولداۋلارى, ۇلتتىق قۇرىلتايداعى باستامالارى, ءتۇرلى سۇحباتتارىنىڭ وزەگىندە تاۋەلسىز­دىك پەن وتانشىلدىق, بىرلىك پەن ىنتى­ماق, ادىلدىك پەن جاۋاپكەرشىلىك, زاڭ مەن ءتارتىپ, جاسامپازدىق پەن جاڭاشىلدىق سياقتى بۇگىنگى قازاقستانعا اۋاداي قاجەت قۇندىلىقتار جاتىر. جانە ەڭ ماڭىزدىسى بۇل قۇندىلىقتار ۇران ەمەس, ەل جۇرەگىنە وزدەرىڭىزدەي زيالى قاۋىم ارقىلى, سىزدەردىڭ شىعارمالارىڭىز بەن كۇندەلىكتى قوعامدىق ميسسيالارىڭىز ارقىلى جەتەتىن دۇنيەلەر. حالىقتى بىرلىككە شاقىرۋ, تاتۋلىقتى نىعايتۋ, جاس ۇرپاققا ىزگى قۇندىلىقتاردى ءسىڭىرۋ – مىنە, بۇل ءسىز بەن ءبىزدىڭ, ياعني زيالى ورتا مەن مەملەكەتتىڭ ورتاق مۇددەسى. ويتكەنى پرەزيدەنتتىڭ قاي كەزەڭدە بولسىن كوتەر­گەن باستامالارى ساپالى ۇلت قالىپتاستىرۋدى ماقسات ەتەدى. ال ەلىمىزدىڭ باي رۋحاني مۇراسى سىزدەردىڭ تۋىندىلارىڭىز ارقىلى جاڭعىرىپ, ۇرپاقتان-ۇرپاققا جالعاسىپ كەلەدى, – دەدى ا.بالاەۆا.

ستيپەندياعا يە بولعاندار قاتارىندا ءاسانالى ءاشىموۆ, بيبىگۇل تولەگەنوۆا, ولجاس سۇلەيمەنوۆ, دۋلات يسابەكوۆ, يرانبەك ورازباەۆ, نۇرعالي ءنۇسىپجانوۆ, نۇكەتاي مىشپاەۆا, تۇڭعىشباي جامانقۇلوۆ, تولەن ابدىك ۇلى, مەرۋەرت وتەكەشوۆا, ەسمۇحان وباەۆ, اماندوس اقاناەۆ, تاتيانا تارسكايا, گۋلۆەر رازيەۆا, نۇرتاس يساباەۆ, زەينەپ احمەتوۆا جانە باسقا دا كورنەكتى مادەنيەت پەن ادەبيەت قايراتكەرلەرى بار.

– بىزگە قۇرمەت كورسەتىپ جاتقان ەل باسشىسىنا, قازاق حالقىنا العىس ايتۋعا ءتيىسپىز. وتكەن جىل قالامگەرلەر قاۋىمى ءۇشىن تابىستى, مەرەيلى جىل بولدى. بىرقاتار اقىن-جازۋشى­نىڭ ەڭبەگى باعالاندى. ستيپەندياتتار قاتارىندا تالانتتى جاستاردىڭ بولعانى كوڭىل قۋانتادى. بۇل – ۇلت ادەبيەتىنە, مادەنيەتىنە جاسالعان قۇرمەت, – دەيدى مەملەكەتتىك سىيلىقتىڭ لاۋرەاتى, اقىن اقۇشتاپ باقتىگەرەەۆا.

باسقوسۋ بارىسىندا مينيستر رۋحانياتتىڭ كوشىن العا سۇيرەپ كەلە جاتقان اعا بۋىننىڭ لەبىزى مەن ۇسىنىس-تىلەكتەرىن تىڭداپ, ولاردىڭ ەل بىرلىگىن نىعايتۋ جانە ۇلتتىق قۇندىلىقتاردى ناسيحاتتاۋ ىسىندە ماڭىزدى ءرول اتقاراتىنىنا سەنىم ءبىلدىردى.

الماتى