«ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسىن ىسكە اسىرۋ بويىنشا جوبالىق كەڭسەنىڭ جۇمىسى باستالدى. ۆيتسە-پرەمەر قانات بوزىمباەۆ «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسىن ىسكە اسىرۋ جونىندەگى جوبالىق كەڭسەنىڭ العاشقى وتىرىسىن وتكىزدى.
ۇلتتىق جوبا ينفراقۇرىلىمنىڭ توزۋ دەڭگەيىن تومەندەتۋگە جانە كوممۋنالدىق قىزمەتتەردى ۇزدىكسىز ۇسىنۋدى قاماتاماسىز ەتۋگە باعىتتالعان. قازىرگى تاڭدا جىلۋ, ەلەكتر ەنەرگياسى, سۋمەن جابدىقتاۋ جانە سۋ بۇرۋ سالالارىندا قىزمەت كورسەتەتىن 87 مونوپوليست كاسىپورىنداعى ەنەرگەتيكالىق جانە كوممۋنالدىق ينفراقۇرىلىمنىڭ توزۋ دەڭگەيى 65%-دان 100%-عا دەيىن جەتكەن. وسىعان بايلانىستى جوبالىق كەڭسەگە ينجەنەرلىك جەلىلەر توزۋىن 40%-عا دەيىن تومەندەتۋ جانە ەلەكتر ەنەرگياسىن ءوندىرۋدىڭ جاڭا كوزدەرىن (قوسىمشا 7,3 گۆت) سالۋ مىندەتى قويىلدى.
2029 جىلعا دەيىن كوممۋنالدىق جەلىلەردى جاڭعىرتۋعا ينۆەستيتسيالىق قاجەتتىلىك 6,8 ترلن تەڭگەنى, ەلەكتر ەنەرگياسىن وندىرۋگە 6,2 ترلن تەڭگەنى قۇرايدى. ەكىنشى دەڭگەيلى بانكتەردەن, ۇلتتىق قارجىلىق دامۋ ينستيتۋتتارىنان جانە حالىقارالىق قارجى ۇيىمدارىنان قاراجات تارتىلادى. تابيعي مونوپوليا سۋبەكتىلەرىن قارجىلاندىرۋ تەتىگىن قۇرۋ, جەڭىلدەتىلگەن قارجىلاندىرۋعا نەمەسە سۋبسيديالاۋعا وتىنىمدەردى قاراستىرۋ «بايتەرەك» ۇبح» اق-عا جۇكتەلگەن. جوبالاردىڭ جۇزەگە اسىرىلۋ بارىسى جانە قۇرىلىس-مونتاجداۋ جۇمىستارىنا باقىلاۋ جۇرگىزۋ «تكش قازورتالىق» اق-نىڭ قۇزىرەتىنە بەكىتىلگەن.
ۇلتتىق جوبادا وتاندىق ونەركاسىپتىڭ دامۋىنا ەرەكشە نازار اۋدارىلىپ, جۇمىس ىستەپ تۇرعان كاسىپورىنداردى 100% جۇكتەۋمەن قاتار, 27 جاڭا ءوندىرىس ورىندارىن اشۋ جانە جۇمىس ورىندارىن قۇرۋ جوسپارلانعان. ونەركاسىپ جانە قۇرىلىس مينيسترلىگىنە وتاندىق تاۋار وندىرۋشىلەر وندىرەتىن تاۋارلار, جۇمىستار جانە قىزمەتتەر ءتىزىمىن ازىرلەۋ, جوسىقسىز قاتىسۋشىلار ءتىزىمىن ەنگىزە وتىرىپ, ساتىپ الۋدىڭ بىرىڭعاي ەلەكتروندىق نىسانىن ەنگىزۋ تاپسىرىلدى.
وتىرىستا حالىقتىڭ الەۋمەتتىك تۇرعىدان وسال ساناتتارى ءۇشىن قولداۋ شارالارى دا تالقىلاندى. حالىقتىڭ تولەم قابىلەتى بار توپتارى كوممۋنالدىق قىزمەتتەردى ءادىل, نارىقتىق تاريفتەر بويىنشا تولەۋى كەرەك. ال وسال ساناتتاعىلار تۇرعىن ءۇي اۆتوماتتاندىرىلعان جۇيەسى ارقىلى تاريفتەردىڭ وسۋىنەن قورعالادى. سالالىق مينيسترلىكتەرگە حالىقتىڭ الەۋمەتتىك وسال توپتارى ءۇشىن وتباسىنىڭ جيىنتىق تابىسىنىڭ 5%-ىنا دەيىنگى كوممۋنالدىق تولەمدەرگە شىعىنداردىڭ شەكتى مولشەرىن بەكىتۋ, سونداي-اق تۇرعىن ءۇي اۋدانى مەن كوممۋنالدىق قىزمەتتەردى تۇتىنۋدىڭ قولدانىستاعى نورمالارىن بىرىزدەندىرۋ ماسەلەسىن پىسىقتاۋ تاپسىرىلدى.
«ەنەرگەتيكا جانە كوممۋنالدىق شارۋاشىلىق سالاسىنداعى پروبلەمالار ەڭ وزەكتى ماسەلەلەردىڭ ءبىرى جانە ولار كەشەندى ءارى جەدەل شەشۋدى تالاپ ەتەدى. ۇلتتىق ەكونوميكا مينيسترلىگىنە مۇددەلى مەملەكەتتىك ورگاندارمەن جانە ۇيىمدارمەن بىرلەسە وتىرىپ, ەكى اپتا ىشىندە ۇلتتىق جوبانى ىسكە اسىرۋدىڭ جول كارتاسىن ازىرلەپ, ونى ۇكىمەت اپپاراتىنا ەنگىزۋدى تاپسىرامىن», دەدى ق.بوزىمباەۆ.
ۆيتسە-پرەمەر ۇلتتىق جوبانى ءساتتى جۇزەگە اسىرۋ ءۇشىن مينيسترلىكتەر, اكىمدىكتەر مەن جەكە سەكتوردىڭ ءوزارا ىنتىماقتاستىعى, سونداي-اق ازاماتتاردىڭ بەلسەندى قاتىسۋى قاجەت بولاتىنىن باسا ايتتى.
«وسىعان بايلانىستى ۇلتتىق ەكونوميكا, ەنەرگەتيكا, ونەركاسىپ جانە قۇرىلىس مينيسترلىكتەرىنە, مادەنيەت جانە اقپارات مينيسترلىگىمەن, سونداي-اق مۇددەلى مەملەكەتتىك ورگاندار جانە ۇيىمدارمەن بىرلەسە وتىرىپ, قاڭتاردىڭ ءۇشىنشى ونكۇندىگىندە جۋرناليستەرگە ارنالعان بريفينگ وتكىزىپ, حالىق, بيزنەس قاۋىمداستىق جانە تابيعي مونوپوليا سۋبەكتىلەرى اراسىندا اۋقىمدى ءتۇسىندىرۋ جۇمىستارىن جۇرگىزۋدى تاپسىرامىن», دەدى ق.بوزىمباەۆ.