قر پارلامەنتى دەپۋتاتى ەكاتەرينا سمىشلياەۆا پرەمەر-ءمينيستردىڭ ورىنباسارى رومان سكليارعا دەپۋتاتتىق ساۋال جولداپ, جولاۋشىلار تاسىمالىنىڭ قاۋىپسىزدىگىنە قاتىستى ماسەلە كوتەردى, دەپ حابارلايدى Egemen.kz.
ىشكى ىستەر مينيسترلىگىنىڭ مالىمەتىنشە, 2024 جىلى جول-كولىك وقيعالارى مەن ولاردان زارداپ شەككەن ازاماتتاردىڭ سانى 2023 جىلمەن سالىستىرعاندا ەكى ەسە ارتقان. جولداردا 2579 ادام قازا تاپتى. ونىڭ ۇشتەن ءبىرى - بالالار.
زارداپ شەككەندەر اراسىندا الماتى, جامبىل, قاراعاندى, قوستاناي جانە باسقا دا وبلىستارداعى تاس جولداردا اپاتقا ۇشىراعان تاكسيلەردىڭ جولاۋشىلارى بار. وكىنىشكە قاراي, ولار بويىنشا جەكە ستاتيستيكا جۇرگىزىلمەيدى. ويتكەنى بۇگىنگى نارىقتىڭ 95%-ى رەتسىز باعىتتار مەن بەيرەسمي قىزمەتتەردەن تۇرادى.
سونىمەن قاتار نارىقتا الەۋمەتتىك جەلىلەر مەن مەسسەندجەرلەر ارقىلى جۇمىس ىستەيتىن تاسىمالداۋشىلار بار. مۇنداي قىزمەتتەر باقىلانبايدى.
«قىسقاشا ايتقاندا, جولاۋشىلاردى تاسىمالداۋ جۇيەسى تاسىمالداۋشىنىڭ جولاۋشىلار الدىنداعى جاۋاپكەرشىلىگىن ساقتاندىرۋ تالاپتارىنا سايكەس كەلمەيدى, قىزمەتتى تاسىمالداۋشى رەتىندە انىقتاۋعا مۇمكىندىك بەرەتىن بيلەت جۇيەسى جوق. قازا تاپقاندار مەن زارداپ شەككەندەردىڭ وتباسىلارى بۇل ساپاردىڭ كوممەرتسيالىق بولعانىن دالەلدەۋگە ءماجبۇر, جۇرگiزۋشiلەردi مەديتسينالىق تەكسەرۋ جانە جولعا الدىن الا باقىلاۋ جۇرگiزiلمەگەن. ال كولىك قۇرالىنىڭ تەحنيكالىق جاعدايى ساپارعا شىعار الدىندا تەكسەرىلمەيدى. كولىك جۇرگىزۋشىلەرى جۇمىس نەمەسە دەمالىس كەستەسىن ساقتامايدى جانە دەمالاماستان ۇزاق جول جۇرەدى», دەپ اتاپ ءوتتى دەپۋتات.
بۇل نورمالاردىڭ بارلىعى جاڭا ەمەس. ولار «اۆتوموبيل كولىگى تۋرالى» قولدانىستاعى زاڭنىڭ 26-بابىنىڭ 2-تارماعىندا كوزدەلگەن. بىراق تاپسىرىستى الۋ كەزەڭىندە دە, ونى ورىنداۋ ساتىندە دە ولاردىڭ ساقتالۋى باقىلانبايدى. ويتكەنى, تاسىمالداۋشى كولىكتەردە كوبىنەسە جول پوليتسياسىنىڭ نەمەسە كولىك ينسپەكتسياسىنىڭ سايكەستەندىرۋ بەلگىلەرى بولمايدى.
«سونىمەن قاتار قازىرگى زامانعى پلاتفورمالار تۇراقتى مارشرۋتتار مەن كلاسسيكالىق ديسپەتچەرلىك قىزمەتتەردى ءبىرجولا ۇمىتتىرعانىن مويىنداۋ كەرەك. تاكسي قىزمەتتەرى قولجەتىمدى بولدى. بۇل وتە ىڭعايلى, بىراق ازىرگە جايلىلىق ءۇشىن بىز ءوز دەنساۋلىعىمىز بەن ومىرىمىزدى تاۋەكەلگە قويامىز. سوندىقتان جولاۋشىلار تاسىمالىنىڭ قاۋىپسىزدىگى ماسەلەلەرىن شەشۋ كەيىنگە قالدىرىلمايدى. قولدانىستاعى زاڭناما تالاپتارىنىڭ ورىندالۋىن قامتاماسىز ەتۋ قاجەت», دەيدى دەپۋتات.