بريۋسسەلدەگى ايگىلى «Espace Intermediare» گالەرەياسىندا قازاقستان مەن ورتالىق ازيا ەلدەرىنىڭ قولونەر شەبەرلەرى مەن ديزاينەرلەرىنىڭ كورمەسى اشىلدى. كورمەگە ءتۇرلى اشەكەي بۇيىمدار, تەرى مەن جۇننەن جاسالعان كيىمدەردەن بولەك, پايدالانىلعان ماتەريالداردى وڭدەۋ ارقىلى جاسالعان ونىمدەر دە قويىلعان.
كەلۋشىلەر قولدانىلعان ماتەريالدار قالاي قايتا وڭدەلەتىنىمەن تانىسا الادى.
ء«بىز مۇنداي ءىس-شارانى جىل سايىن وتكىزبەكپىز. باستى ماقساتىمىز – ورتالىق ازيانى, ونىڭ ىشىندە قازاقستاندى مادەنيەت, قولونەر ارقىلى تانىستىرۋ. كەلەشەكتە يگى ءىستى بارلىق ديزاينەرىمىزدى شاقىرىپ, وتكىزىپ تۇرساق دەيمىز», دەيدى «مادەنيەت كەرۋەنى» ورتالىق ازيا شىعارماشىلىق ورتالىعىنىڭ ديرەكتورى ەلەنا ۆان حاريتونوۆا.
كيىم ديزاينەرى وكسانا يان قازاقستاندا تۋىپ-وسكەن. بەلگيادا تۇرعانىنا جيىرما جىلدان استى. قازاقستانعا كەزەكتى ساپارىندا تۇيە جۇنىنەن جاسالعان كورپەلەردى كورىپ, ونى قايتا وڭدەپ, ەتنوستيلدە ادەمى پالتو تىگىپ شىعارۋدى ويلاعان. بۇگىندە مۇنداي ءۇردىس فرانتسيا, بەلگيا جانە گوللانديا ديزاينەرلەرى اراسىندا دا قالىپتاسىپ كەلەدى.
«مەن بۇل كورپەنى كورگەندە ونى تۇرلەندىرىپ, باسقا ءونىم شىعارۋ ويىما كەلدى. ويتكەنى 2017 جىلدان بەرى پايدالانىلعان ماتەريالداردى وڭدەۋ ارقىلى جاسالاتىن كيىم برەندىم بار. تۇيە ءجۇنى جىلۋ رەتتەگىشتىك پەن سۋدى باساتىن قاسيەتكە يە ەكەنى بەلگىلى. ونىڭ ۇستىنە بۇگىندە ەۋروپادا قورشاعان ورتانى قورعاۋعا كوپ كوڭىل ءبولىنىپ جاتقاندىقتان, شيكىزاتتى قايتا وڭدەۋ وزەكتى», دەيدى ديزاينەر وكسانا يان.
ال زەرگەرگەرلىك بۇيىمدار ديزاينەرى كاميلا فورينتيني كورمەگە كۇمىستەن جاساعان قازاقتىڭ ويۋ-ورنەگى بار اشەكەي بۇيىمدارىن الىپ كەلگەن. بۇل بۇيىمدار ەۋروپالىقتاردىڭ تالعامىنا ساي وزگەرتىلىپ جاسالعان. سونداي-اق ەرلەرگە ارنالعان بىلەزىكتەر مەن مويىنتۇمارلار دا ۇسىنىلدى.
كورمەگە قويىلعان قولونەر بۇيىمدارى مەن اشەكەيلەرىنەن ۇلى دالانىڭ كۇش-قۋاتىن سەزۋگە بولادى. «ەۋروپالىقتاردى قىزىقتىراتىن دا وسى ەرەكشەلىك», – دەيدى ديزاينەرلەر.
ايتا كەتەيىك, قازاقستاندىق قولونەر شەبەرلەرىنىڭ كورمەسى 19 قاڭتارعا دەيىن جالعاسادى.
مارجان قۋاتقىزى,
جۋرناليست