ارال تەڭىزىندەگى سۋ كولەمى ارتتى

سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ارال اۋدانىنىڭ تۇرعىندارىمەن ارال تەڭىزىنىڭ سولتۇستىك بولىگىن قالپىنا كەلتىرۋ جوباسىنىڭ ەكىنشى كەزەڭىن ىسكە اسىرۋ ماسەلەسىن تالقىلادى. جيىنعا پارلامەنت ءماجىلىسىنىڭ دەپۋتاتى مارحابات جايىمبەتوۆ, قىزىلوردا وبلىسىنىڭ سۋ شارۋاشىلىعى وكىلدەرى مەن ساراپشى-عالىمدار قاتىستى.

سولتۇستىك ارالدى ساقتاۋ جوباسىنىڭ العاشقى كەزەڭ قورىتىندىسى بويىنشا تەڭىزدەگى سۋ كولەمى 42%-عا ارتىپ, 27 ملرد تەكشە مەترگە جەتتى. تەڭىز سۋىنىڭ تۇزدىلىعى ءتورت ەسەگە جۋىق تومەندەپ, جىل سايىنعى بالىق اۋلاۋ كورسەتكىشى 8 مىڭ تونناعا دەيىن جەتتى.

مەملەكەت باسشىسىنىڭ تاپسىرماسىن ىسكە اسىرۋ ماقساتىندا سۋ رەسۋرستارى جانە يرريگاتسيا مينيسترلىگى «وڭىرلىك دامىتۋ جانە ارال تەڭىزىنىڭ سولتۇستىك بولىگىن قالپىنا كەلتىرۋ» جوباسىن ازىرلەۋدە. جوبا نەگىزگى 3 نەگىزگى باعىتتى قامتيدى. اتاپ ايتقاندا, سولتۇستىك ارال تەڭىزىندە سۋ جيناقتاۋدىڭ كولەمى مەن تيىمدىلىگىن ارتتىرۋ, سۋ رەسۋرستارىن باسقارۋدى جاقسارتۋ, بالىق شارۋاشىلىعى مەن ەكوتۋريزمدى دامىتۋ, ءوڭىردىڭ ەكولوگيالىق جاعدايىن جاقسارتۋ بويىنشا ماڭىزدى ءىس-شارالار قاراستىرىلعان.

ايتا كەتۋ كەرەك, سۋ رەسۋرستارى جانە يرريگاتسيا مينيسترلىگى 2024 جىلى ارالعا 2,6 ملرد تەكشە مەترگە جۋىق سۋ جىبەردى. ونىڭ ىشىندە سۋارۋ كەزەڭىندە رەكوردتىق كولەم - 1 ملرد تەكشە مەتر سۋ باردى.

بۇل سىرداريا سۋىن ساۋاتتى ءبولۋ جانە ونى ۇنەمدەۋدىڭ ناتيجەسىندە مۇمكىن بولدى. سالىستىرمالى تۇردە ايتساق, 2022 جىلى ارالعا بار بولعانى 816 ملن تەكشە مەتر سۋ جىبەرىلگەن ەدى.

«بۇل ناتيجەلەر – سوڭعى ەكى جىلدا جۇرگىزىلگەن جۇيەلى جۇمىستىڭ جەمىسى. ءبىز سۋ ۇنەمدەۋ, ترانسشەكارالىق وزەندەردەگى سۋ رەسۋرستارىن ءادىل ءبولۋ ماسەلەسىندە كورشىلەس ەلدەرمەن ءوزارا تۇسىنىستىككە قول جەتكىزىپ, ناقتى قادامدار جاسادىق. الداعى ۋاقىتتا دا وسىنداي كەلىسسوزدەردى جالعاستىرا وتىرىپ, ماڭىزدى سۋ قويمالارىنىڭ دەڭگەيىن تۇراقتى ۇستاپ تۇرۋعا بار كۇشىمىزدى سالامىز. ارالدى قالپىنا كەلتىرۋگە باعىتتالعان جوبا ەڭ الدىمەن ءوڭىردىڭ ەكولوگيالىق جاعدايىن جاقسارتۋعا, بالىق شارۋاشىلىعى مەن ءتۋريزمدى دامىتۋعا جانە حالىقتىڭ ءال-اۋقاتىن ارتتىرۋعا باعىتتالىپ وتىر», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

جوبانىڭ نەگىزگى باعىتتارى تۋرالى باياندامالاردان كەيىن, جيىن «اشىق ميكروفون» فورماتىندا جالعاستى. اۋدان تۇرعىندارى جوبانى ىسكە اسىرۋعا قاتىستى ءوز پىكىرلەرىمەن ءبولىسىپ, تولعاندىرعان سۇراقتارىنا جاۋاپ الدى. نۇرجان نۇرجىگىتوۆ قوعامدىق تالقىلاۋدان كەيىن ازاماتتاردى جەكە قابىلدادى.