قازاق رۋحانياتىنىڭ اسا كورنەكتى وكىلى, جاراتىلىسى بولەك, ءار شىعارماسىنان ۇلى دالانىڭ بولمىس-ءبىتىمى, مىنەز-قۇلقى مەنمۇندالاپ تۇراتىن, ۇلتىمىزدىڭ ۇلكەن جۇرەكتى پەرزەنتى, كلاسسيك جازۋشىسى مۇحتار ماعاۋين ومىردەن ءوتتى.
تاريحقا «الپىسىنشى جىلعىلار» دەگەن قاناتتى ۇعىممەن ەنگەن تاڭعاجايىپ تالانتتى بۋىننىڭ كورنەكتى وكىلدەرىنىڭ ءبىرى بولعان, كەسكىنى مەن كەلبەتى جاراسقان, شەشەن ءتىلدى, كوسەم مىنەزدى, ويى مەن بويىنان ءبىلىم مەن بىلىك اڭقىپ تۇرعان جىگىت اعاسىن العاش كورگەنىم ەسىمدە. ءجۇرىس-تۇرىسىنا قاراپ, الدەبىر باتىس روماندارىنىڭ ەرۋديت كەيىپكەرلەرىنىڭ ءبىرىن كورگەندەي كۇي كەشىپ ەم… العاشقى سەزىم الداماپتى… «قوبىز سارىنىن», ء«بىر اتانىڭ بالالارى» مەن «تازىنىڭ ءولىمىن» وقىپ ءسۇيىندىم… «كوك مۇناردى» وقىپ تاڭىرقادىم!.. مۇحتار ماعاۋين مەنىڭ رۋحاني كەڭىستىگىمە سولاي ەندى. جازۋشىلار وداعىندا بىرگە قىزمەتتەس بولدىق. وتپەلى ءداۋىردىڭ سان تاراۋ قيىندىقتارى مەن حيكمەتتەرىن دە بىرگە ءجۇرىپ اتقاردىق. بولىستىك. مۇحاڭ ۇستانىمىنا بەرىك, تىرشىلىكتىڭ ۇساق-تۇيەك اڭگىمەسىنە ۋاقىت ولتىرمەيتىن ناعىز كاسىبي جازۋشى ەدى.
الەمنىڭ ارعى شەتى مەن بەرگى شەتىن ءسوز دەيتىن ۇلى ونەرمەن عانا ولشەيتىن. قازاقتىڭ ۇلى تاريحىن ءدال مۇحتار ماعاۋيندەي سارالاپ, تالداپ, جەرىنە جەتكىزە تانيتىن ادام جازۋشى دەيتىن قاۋىمدا سيرەك ەدى.
ول ءسوزدى قازاقتان, قازاقتى ادەبيەتتەن بولگەن جوق. مىنا جالعاننىڭ قىزىعى مەن قۋانىشىن, قايعىسى مەن قاسىرەتىن ءسوز دەيتىن جۇمباعى مەن سىرى مول الەممەن قالاي ولشەسە, باقي دەيتىن بەيمالىم الەمگە دە سول ءسوز ونەرىنىڭ ماڭگىلىگىن ارقالاپ, ۇزاپ بارادى.
جانىڭىزعا مەكەن ءجاننات تورىنەن بۇيىرىپ, رۋحىڭىز پەيىشتە شالقىسىن, حالقىنا قادىرى اسقان, ءسوزدى الەمنىڭ كىندىگى ساناعان قايران مۇحا! قوش, سۋرەتكەر!
نۇرلان ورازالين,
مەملەكەتتىك سىيلىقتىڭ لاۋرەاتى