شىڭعىستاۋدىڭ ەتەگىندە تۋىپ, الاتاۋدىڭ باۋرايىندا قازاققا قىزمەت ەتكەن ماعاۋيننىڭ الىپ جۇرەگى ەلدەن جىراقتا توقتادى. مۇحيتتىڭ ارعى جاعى, وزگە قۇرلىق. بۇكىل ءومىرى قازاققا قىزمەت ەتۋمەن ءوتتى. العاشقى «كوكمۇنار» رومانىندا جازعانداي, ءومىردىڭ ماعىناسى ۇلت دەپ ءبىلدى. ونىڭ مۇراسى تۇگەلىمەن ۇلتتىڭ يگىلىگى دەپ ويلايمىن. ء«ومىر بار جەردە ءولىم بار» دەسەك تە, بۇل – قازاق حالقىنىڭ ۇلكەن قازاسى.
ادەبيەتتانۋعا, اسىرەسە كوركەم ادەبيەتكە, مادەنيەتتانۋعا, كوسەمسوزگە, تاريحقا دا قىزمەت ەتكەن كونە گرەك الىپتارى ءتارىزدى تۇلعا ەدى. ونىڭ ۇلى جۇرەگى سوعىپ تۇرعاندا, ءبىز الاڭسىز جۇرەتىنبىز. الدىمىزدا ماعاۋين تۇر دەگەن ۇلكەن سەنىم بار ەدى. ارقاسۇيەر الىپ بايتەرەگىمىز, اسقار تاۋىمىز قۇلادى.
80-جىلدارى جاريالانىپ, مەملەكەتتىك سىيلىققا يە بولعان «الاساپىران» اتتى تاريحي رومانى – قازاق ادەبيەتى تۇگىلى, الەم ادەبيەتىندەگى كەسەك شىعارمانىڭ ءبىرى. ماعاۋيننىڭ قازاسى ءولىم ەمەس, ول وسىعان دەيىن جازعان تۋىندىلارىمەن الەم كلاسسيكتەرىنىڭ قاتارىنا قوسىلدى. تىرناقالدى شىعارمالارى «تىلەنشى», «قارا قىز», «كوكمۇنار», «تازىنىڭ ءولىمى» سىندى تاعى باسقا ەڭبەكتەرىنىڭ قاي-قايسىسى – كلاسسيكالىق تۋىندىلار. سوندىقتان ءبىز بۇگىن ماعاۋين تۇلعاسىمەن ەمەس, قازاق ادەبيەتىنىڭ الىپ داۋىرىمەن قوشتاسىپ وتىرمىز.
بىلتىر جىل سوڭىندا بىزگە اسىعىس قوڭىراۋ شالىپ, پىكىرىن ءبىلدىردى. نەگە اسىققانى ەندى تۇسىنىكتى بولدى. شىعارماشىلىق تۋرالى جاڭا ويىن ورتاعا سالىپ ۇلگەردى. اۋىر سىرقاتى بايقالىپ تۇردى.
ول ەرنەست حەمينگۋەي, گەرمان مەلۆيلل, لەۆ تولستوي, توماس مانن, البەر كاميۋ, جان پول سارتر سىندى الىپتاردىڭ قاتارىندا تۇر. سوندىقتان بۇل – جالعىز قازاق ادەبيەتىنىڭ قايعىسى ەمەس, الەم ادەبيەتىنىڭ قازاسى.
ديدار امانتاي,
جازۋشى