تالدىقورعان قالاسىندا الەۋمەتتىك وسال توپ وكىلدەرى رەت-رەتىمەن تۇرعىن ۇيگە قول جەتكىزىپ جاتىر. ەلەكتروندى كەزەك ەشكىمدى الالامايدى. ءبارى قالا باسشىلىعىنىڭ قاداعالاۋىندا تۇر. 2024 جىلى وڭىردە تۇرعىن ءۇي قۇرىلىسىنا 7,6 ملرد تەڭگە ءبولىندى. قارجى 56 كوپقاباتتى, 214 جەكە تۇرعىن ءۇي سالۋعا باعىتتالدى. ءسويتىپ, وبلىس ورتالىعىندا بىرنەشە وتباسى قونىستويىن تويلاپ, تالاي جىلدان بەرى كۇتكەن پاتەرىنە كىردى.
2024 جىلى جەتىسۋ وبلىسىندا حالىقتىڭ الەۋمەتتىك وسال توپتارىنا 866 پاتەر ساتىپ الىندى. وعان بيۋدجەتتەن 15,9 ملرد تەڭگە قارجى ءبولىندى. سونىڭ ناتيجەسىندە 57 وتباسى ءۇيلى بولدى. تالدىقورعاندا 37 جاڭا پاتەردىڭ, سارقان قالاسىندا 20 جەكە تۇرعىن ءۇيدىڭ كىلتتەرى تاپسىرىلدى. قالا اكىمى ەرنات ءبازىلدىڭ ايتۋىنشا, جاڭا اۋدانداردا سالىنىپ جاتقان بۇدان دا باسقا كوپقاباتتى تۇرعىن ۇيلەر كوپ ۇزاماي ءوز يەسىن تابادى.
وبلىس ورتالىعىندا قۇرىلىس جۇمىستارى قارقىندى ءجۇرىپ جاتىر. ءوڭىر باسشىسى بەيبىت يساباەۆ اپاتتى تۇرعىن ءۇي ماسەلەلەرىن شەشۋگە ەرەكشە نازار اۋدارىپ وتىر. بىلتىر وبلىستا 348 پاتەر اپاتتى دەپ تانىلىپ, 1,3 ملرد تەڭگەگە 137 پاتەر ساتىپ الىنعان. جەرگىلىكتى بيۋدجەتتەن بولىنگەن 2,4 ملرد تەڭگەگە, اتاپ ايتقاندا, كەربۇلاق اۋدانىندا, تەكەلى, تالدىقورعان قالالارىندا 155 جاڭا پاتەر ساتىپ الىندى. سونداي-اق «سامۇرىق-قازىنا ۇاق» اق دەمەۋشىلەرىنىڭ ەسەبىنەن 560 پاتەرلىك 9 ءۇي سالىنىپ جاتىر.
سارقان اۋدانى اكىمدىگىنىڭ حابارلاۋىنشا, اۋدان ورتالىعىندا باسپانا سالۋ ماسەلەسىنە كەيىنگى جىلدارى باسا نازار اۋدارىلىپ, اۋقىمدى جۇمىستار اتقارىلدى. «2022 جىلى تۇرعىن ءۇي كەزەگىندە تۇرعان ازاماتتار ءۇشىن 5 قاباتتى 50 پاتەرلى ءۇي, 2023 جىلى «بولاشاق» شاعىن اۋدانىندا ەكى قاباتتى 20 پاتەرلى تۇرعىن ءۇي قولدانىسقا بەرىلدى. بۇعان قوسا, اۋداننىڭ الەۋمەتتىك وسال توپتاعى ازاماتتارى ءۇشىن 24 تۇرعىن ءۇي ساتىپ الىندى. 2024 جىلى 20 ءۇيدىڭ كىلتى تاپسىرىلسا, جاڭا جىل قارساڭىندا وسى ۇلگىدەگى 30 تۇرعىن ءۇيدىڭ قۇرىلىسى اياقتالىپ, قولدانىسقا بەرىلدى», دەدى سارقان اۋدانىنىڭ تۇرعىن ءۇي-كوممۋنالدىق شارۋاشىلىعى, اۆتوموبيل جولدارى, جولاۋشىلار كولىگى جانە تۇرعىن ءۇي ينسپەكتسياسى ءبولىمىنىڭ باسشىسى اسەت قاناپيانوۆ.
جاڭا ۇيگە يە بولعاندار قاتارىندا جەتىم بالالار, مۇگەدەكتىگى بار بالانى تاربيەلەۋشى وتباسىلار, مۇگەدەكتىگى بار ازاماتتار, كوپبالالى انالار, تولىق ەمەس وتباسىلار, ەكىنشى دۇنيەجۇزىلىك سوعىستىڭ ارداگەرلەرىنە تەڭەستىرىلگەندەر بار.
ءوڭىر اكىمى ءباسپاسوز قىزمەتىنىڭ مالىمەتىنشە, 2024 جىلى وڭىردە 2 708 پاتەر يەسىن تاپتى. ونىڭ 1113 پاتەرلىك 129 ءۇيى بيۋدجەت ەسەبىنەن, 469 پاتەرلىك 9 ءۇي كوممەرتسيالىق تۇرعىن ءۇي, 866 پاتەر تۇرعىن ءۇي ساتىپ الۋ ارقىلى, 260 پاتەرلىك 4 ءۇي دەمەۋشىلەر ەسەبىنەن بەرىلگەن.
جەتىسۋ وبلىسى