مۇحيت اسىپ, سۋىق حابار جەتتى... الاش رۋحانياتىنىڭ الداسپانى, قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى مۇحتار مۇقان ۇلى ماعاۋين 85 جاسقا قاراعان شاعىندا باقيعا وزىپتى. بۇل قارالى حابار حالقىمىزدىڭ قابىرعاسىن قايىستىرىپ جىبەردى. ۇلى اباي توپىراعىندا تۋىپ-وسكەن جازۋشى جاس كۇنىنەن-اق تاريحتىڭ تار جول, تايعاق كەشۋىندە ەسەسى كەتىپ, ەڭسەسى ەزىلگەن ۇلتىنىڭ ۇپايىن تۇگەندەۋدى ءوزىنىڭ ومىرلىك مۇراتىنا اينالدىردى. اۋىلداعى كەۋدەسى كەڭ سارايداي كونەكوز قاريالاردىڭ, اسىرەسە تۋعان اتاسى ماعاۋيا اقساقالدىڭ اۋزىنان ەستىگەن ەسكىنىڭ ەستى سوزدەرى ورەلى ورەننىڭ وي-ءورىسىن كەڭەيتىپ, بالا كۇنىنەن كورگەن-بىلگەن كەڭەس وكىمەتىنىڭ تۇسىنداعى ءتۇرلى كەلەڭسىزدىكتەر نامىسىن قايراعانى ءسوزسىز.
ۋنيۆەرسيتەتتە وقىپ جۇرگەنىندە جازعان العاشقى اڭگىمەلەرىنەن-اق ادەبيەتكە ايتارى بولەك, ءسوز ساپتاسى ەرەك قالامگەردىڭ كەلگەنى بەلگىلى بولدى. ءبىرتۋار ۇستازى, پروفەسسور بەيسەمباي كەنجەباەۆتىڭ جەتەكشىلىگىمەن حاندىق داۋىردەگى جىراۋلار پوەزياسى تۋرالى عىلىمي جۇمىسىن سانسىز كەدەرگىلەرگە قاراماستان, دىتتەگەن جەرىنە جەتكىزۋى جاس عالىمنىڭ بويىنداعى جاسىماس جىگەر-قايراتتى كورسەتسە كەرەك.
اينالاسىنان ات وزدىرعان ابزال اعامىز قولىنان قالامى تۇسكەنشە الاش مۇراتىنان اينىعان جوق. بارلىق شىعارمالارىندا ۇلتىن ۇلىقتاپ, ءداستۇر-سالتىن دارىپتەدى. وقىرماننىڭ وراسان زور رۋحاني ولجاسىنا اينالعان «قوبىز سارىنى», «الداسپان», «كوكمۇنار», «الاساپىران», «شاقان-شەرى», «سارى قازاق», «تازىنىڭ ءولىمى», «كوكبالاق», «جارماق», «شىڭعىس حان جانە ونىڭ زامانى», «التىن وردا», «مەن», «قازاق تاريحىنىڭ الىپپەسى» سياقتى كەسەك تۋىندىلارى وسى ءسوزىمىزدى ايعاقتاي تۇسەرى انىق.
قالىڭ ەلى قازاعىنا قىزمەت قىلۋدى باستى مۇرات-مۇددەسىنە بالاعان زاڭعار قالامگەردىڭ ونەگەلى ءومىر جولى ەگەمەن ەلىمىزدىڭ ەرتەڭى سانالاتىن كەيىنگى تولقىن وكىلدەرىنە ۇلگى بولۋعا ابدەن لايىق. ۇلتىن ۇشپاققا شىعارۋعا ۇمتىلۋدان شارشاماعان ۇلى مۇحاڭنىڭ ەسىم-سويى ەشقاشان ۇمىتىلماق ەمەس. جانىڭىز ءجانناتتا بولسىن, ۇلت جوقشىسى! مۇراڭىز حالىقپەن بىرگە جاساي بەرەدى, رۋحانيات ابىزى!
«Egemen Qazaqstan» قالامگەرلەرى