مەملەكەتتىك ساتىپ الۋداعى ماڭىزدى وزگەرىستەر

اتاپ ايتقاندا, وزگەرىستەر كەلەسىلەرگە اسەر ەتتى:

كونكۋرس وتكىزۋ مەرزىمى قىسقارتىلدى (كونكۋرستىق قۇجاتتامانى تالقىلاۋ 5 جۇمىس كۇنىنەن 2 جۇمىس كۇنىنە دەيىن; وتىنىمدەردى قابىلداۋ 15 جۇمىس كۇنىنەن 5 جۇمىس كۇنىنە دەيىن; وتىنىمدەردى قاراۋ جانە قورىتىندىلاۋ 10 جۇمىس كۇنىنەن 3 جۇمىس كۇنىنە دەيىن); قۇرىلىسقا بايلانىستى جۇمىسقا قوعامدىق مونيتورينگ ەنگىزى­لىپ جاتىر. جۇمىستى ورىنداۋ كەستە­لەرىن, شارتتاردىڭ ورىندالۋى تۋرالى ەسەپتەردى جالپىعا قولجەتىمدى ەتۋ, شارت­تاردىڭ ورىندالۋىن باقىلاۋعا جۇرت­شىلىقتى تارتۋ جوسپارلانىپ وتىر; ساتىپ الۋ ناتيجەلەرىنە شاعىم­دانۋدىڭ جاڭا ءتارتىبى ىسكە اسىرىلادى. ساتىپ الۋدى جەدەل جۇرگىزۋ جانە راسىمدەردىڭ كەشىكتىرىلۋىن بولدىرماۋ ماقساتىندا شاعىمداردى ساتىپ الۋدى ۇيىمداستىرۋشىنىڭ ءوزى قارايدى; از مولشەردەگى ساتىپ الۋلار بو­يىنشا 100 اەك-كە دەيىنگى تاۋارلاردى, 500 اەك-كە دەيىنگى جۇمىستار مەن قىزمەتتەردى ءبىر كوزدەن الۋ قۇقىعى ەنگىزىلدى. اۋىلدىق اكىمدىكتەر ءۇشىن ءبىر كوزدەن ساتىپ الۋدىڭ شەكتى مولشەرى 3 000 اەك-تەن 4 000 اەك-كە دەيىن ۇلعايتىلدى; شاعىن جانە ورتا كاسىپكەرلىك سۋبەكتىلەرىن قولداۋ ماقساتىندا وسى ساناتتاعى سۋبەكتىلەردەن قۇنى 50 000 اەك-تەن اسپايتىن تاۋارلاردى, جۇمىستار مەن كورسەتىلەتىن قىزمەتتەردى ساتىپ الۋدىڭ باسىم قۇقىعى بەلگىلەندى; ىشكى نارىقتى قولداۋ ماقساتىندا ۇلتتىق رەجىمنەن الىپ تاستاۋدى بەلگىلەۋ ارقىلى ۆەب-پورتالدا وتاندىق ءوندىرىس تاۋارلارىن باسىمدىقپەن الۋ جۇمىسى جالعاسادى; باسەكەلەستىكتى دامىتۋ جانە بيزنەستى قورعاۋ ماقساتىندا مەملەكەتتىك مەكەمەلەر جانە كۆازيمەملەكەتتىك سەكتور سۋبەكتىلەرى سانالاتىن ءونىم بەرۋشىلەردىڭ وتىنىمدەرىن جەكە كاسىپكەرلىك سۋبەكتىلەرى سانالاتىن ءونىم بەرۋشىلەردەن كەمىندە ەكى ءوتىنىم بولعان جاعدايدا ۆەب-پورتال اۆتوماتتى تۇردە قابىلدامايدى; باعالىق ەمەس كريتەريلەردى دامىتۋ جانە جەرگىلىكتى جەتكىزۋشىلەردى قولداۋ ماقساتىندا اۋماقتىق بەلگى (1%-دان 2%-عا دەيىن) جانە تەرىس ماندەر (0.1%-دان 0,2%-عا دەيىن) تۇرىندەگى شارتتى جەڭىلدىكتەردى ەسەپتەۋ وزگەرتىلدى.