رەجيسسەر گۇلشات سماعۇلوۆانىڭ «شاتىرداعى ەكەۋ» ءفيلمى كالكۋتتا قالاسىندا ء(ۇندىستان) وتكەن «التىن ارىستان» (GLIFF) حالىقارالىق كينوفەستيۆالىندە ەكى اتالىم بويىنشا جەڭىمپاز اتاندى. تۋىندى «ۇزدىك تولىقمەترلى فيلم» دەپ تانىلىپ, Best Debut Filmmaker Of Feature Film نوميناتسياسىندا جەڭىسكە جەتتى.
ايتا كەتەيىك, رەجيسسەردىڭ العاشقى ءفيلمىنىڭ شىعارماشىلىق قۇرامى دا دەبيۋتانتتاردان تۇرادى. اتاپ ايتساق, پروديۋسەر – ءاليا شارىپباەۆا, ستسەناري اۆتورى – جاننا تيموفەەۆا, قويۋشى-سۋرەتشى ەلەنا ايتوۆا, اكتريسا ليديا يارتسەۆا.
بۇدان بولەك كينوتۋىندى بىلتىر نيۋ-يوركتەگى Oniros Film Awards بەدەلدى كونكۋرسىنىڭ شيرەك فينالىنا شىققان ەدى.
كينوكارتينا مادەنيەت جانە اقپارات مينيسترلىگى مەن ۇلتتىق كينونى قولداۋ ورتالىعىنىڭ قولداۋىمەن تۇسىرىلگەن. «شاتىرداعى ەكەۋ» فيلمىندە تاعدىرى قيىندىققا تولى دامير مەن اۋتيزمگە شالدىققان كوستيانىڭ اراسىنداعى دوستىق سۋرەتتەلەدى. شىعارماشىلىق توپ كارتينادا ينكليۋزيانىڭ ماڭىزىن جانە ەرەكشە بالالاردىڭ قوعامعا بەيىمدەلۋ ماسەلەسىن كوتەرگەن.
مارجان قۋاتقىزى