انتيكور اباي وبلىسىنىڭ دەنساۋلىق ساقتاۋ سالاسىن سىبايلاس جەمقورلىق تاۋەكەلدەرىنە تەكسەرۋ بارىسىندا «سك-فارماتسيا» جشس مەديتسينالىق پرەپاراتتاردى ۋاقىتىلى جەتكىزبەيتىنىن انىقتادى, دەپ جازادى Egemen.kz.
مۇنداي جاعداي تەگىن ءدارى-دارمەك تاپشىلىعىن تۋدىرىپ, پاتسيەنتتەردى ءوز قاراجاتىن جۇمساۋعا يتەرمەلەيدى. ال مەديتسينالىق مەكەمەلەر ناقتى جاعدايدى جاسىرۋ ءۇشىن «جالعان رەتسەپتەر» جازىپ وتىرعان. قۇجاتتارعا سايكەس ناۋقاستار ءدارى-دارمەكپەن تولىق قامتاماسىز ەتىلمەگەنى بەلگىلى بولعان.
«تالداۋ قورىتىندىسى بويىنشا اباي وبلىسىنىڭ بارلىق ەمحانالارىندا دەنساۋلىق ساقتاۋ مينيسترلىگىنىڭ «الەۋمەتتىك ءاميان» قوسىمشاسىندا QR-كود ارقىلى پاتسيەنتتەرگە تەگىن ءدارى-دارمەك بەرۋ جۇيەسى ەنگىزىلدى. قازىرگى ۋاقىتتا بۇل - ءدارى-دارمەكتەردى الۋدىڭ بالاما ءادىسى, الايدا ول قازىردىڭ وزىندە وڭ ناتيجە كورسەتىپ جاتىر», دەلىنگەن انتيكور حابارلاماسىندا.
QR-كود ارقىلى پاتسيەنتتەرگە تەگىن ءدارى-دارمەك بەرۋ پيلوتتىق جوباسىنىڭ قورىتىندىسى وڭ اسەر بايقاتسا, جۇيەنى ەل كولەمىندە ەنگىزۋ جوسپارلانىپ وتىر.