بايعانين اۋداندىق پوليتسيا ءبولىمى اكىمشىلىك پوليتسيا بولىمشەسىنىڭ اۆتوينسپەكتورى, كاپيتان ادىلقاھار قادىروۆ ءبىر وتباسىن اجالدان قۇتقارىپ قالدى.
وقيعا بىلتىر 1 ناۋرىز كۇنى بولعان ەدى. تاڭعى ساعات 07.30 شاماسىندا ادىلقاھار جۇمىسقا شىعىپ بارا جاتىپ, قاراما-قارسى تۇراتىن كورشىسىنىڭ ەسىك-تەرەزەسىنەن قويۋ ءتۇتىن شىعىپ جاتقانىن كورگەن.
«ول كەزدە مەن ەشتەڭە ويلاعان جوقپىن. بۇل ۇيدە جەتى ادام تۇرادى. باسىما بىردەن «ولار امان با ەكەن؟» دەگەن وي كەلدى. سول كۇنى ۇيدە ءۇش جاس بالاسىمەن اناسى عانا بولىپتى. كورشىم ۆاحتالىق جۇمىستا, اكە-شەشەسى اقتوبەگە كەتكەن. جاقىنداپ بارىپ, ۇيدە كىم بار دەپ ايقايلادىم. دىبىس جوق. سودان سىرتقى كيىمىمدى شەشىپ تاستاپ, بەتىمدى قارمەن ىسقىلاپ الىپ, تەرەڭ دەم الدىم دا, ۇيگە كىرىپ كەتتىم. ءۇيدىڭ ىشىندەگى قويۋ تۇتىننەن ەشتەڭە كورىنبەيدى. ءارى قاراي ەسىمدە ەشتەڭە جوق», دەيدى ادىلقاھار ۇلىقپان ۇلى.
جالىن ءۇيدىڭ ىشىنە تۇگەل تارالماعان. ءبىر بولمەدە ۇيىقتاپ جاتقان بالالاردىڭ اناسىن وياتىپ, سىرتقا شىعارادى. بالالار بۇل بولمەدە جوق ەكەن. اناسى شىرقىراپ, بالالار جاتقان بولمەنى نۇسقايدى. ول جاققا بارۋ مۇمكىن ەمەس. ءورت سول بولمەگە جاقىن جەردەن تۇتانعان سياقتى. ادامدى تۇنشىقتىرىپ, كوزىن اشتىرمايتىن قويۋ ءتۇتىن لىقسىپ, كۇشەيىپ بارادى. ادىلقاھار بالالار بولمەسىنىڭ ەسىگىن اشىپ, داۋىستاعاندا, ەشكىم ءۇن قاتپاعان. ءتۇتىن مەن يىسكە شىداپ تۇرۋ مۇمكىن ەمەس. ول قارمانىپ جەردى سيپالاي بەرگەندە, قولى بالاعا ءتيدى. ونى ەكى قولىمەن كوتەرىپ الدى دا, سىرتقا ۇمتىلدى. بۇل كەزدە كورشىلەر دە جينالا باستاعان. جۇگىرىپ كەلگەن ادامعا بالانى ۇستاتتى دا, بەتى-قولىن ىسقىلاپ, بىرنەشە رەت تەرەڭ دەم الىپ, ۇيگە قايتا ۇمتىلدى. ادىلقاھار كىرگەن جاعىنا قايتا ۇمتىلىپ, جاڭاعى جەردەن تاعى ءبىر كىشكەنتايدى تاۋىپ, سىرتقا جۇگىردى. بىراق ۋلى گازدان باسى اينالىپ, كوزى قاراۋىتىپ بارادى. بۋىندارىنان ءال كەتتى. باسىندا ەسىمنەن تانىپ, وتتىڭ ىشىنە قۇلاپ قالمايىن دەگەن عانا وي بار. تالتىرەكتەپ, جۇرەگى لوقسىپ, سىرتقا ازەر شىقتى. بۇل كەزدە ءۇيدىڭ ءىشىن تۇگەل شارپىعان جالىن ءۇيدىڭ شاتىرىنا دەيىن جەتكەن. جينالعان جۇرت قولدارىنا تۇسكەن زاتپەن ءورتتى سوندىرۋمەن الەك. ەسىن جيناعان كەلىنشەك ءتورت جاستاعى ۇلىنىڭ قالعانىن ايتىپ شىرىلدايدى. ويلانۋعا ۋاقىت جوق. بىرەر سەكۋند كەشىكسە, بالادان ايىرىلادى. باسى اينالىپ تۇرسا دا, ورتكە ءۇشىنشى رەت كىرۋگە ءماجبۇر. بالالاردىڭ جاتقان جەرىن بىلەدى. تەز جەتسە بولدى. ىرگەدە جاتقان كىشكەنتايدى سيپالاپ تاۋىپ, كوتەرىپ السا دا, ەسىككە دەيىن جەتۋ – مۇڭ. باس اينالىپ, قۇلاپ بارادى. كوز كورمەيدى. بىرەر سەكۋندتا بۇل جەر قىپ-قىزىل ورتكە اينالادى. قايتكەندە دە قۇلاپ قالماۋ كەرەك. شىعا الماي قالسا شە؟ بۇل كەزدە وقيعا ورنىنا جەتكەن ءورت سوندىرۋشىلەر مەن جەدەل جاردەم قىزمەتكەرلەرى ادىلقاھارعا كومەككە كەلىپ, قۇلاپ بارا جاتقان ونى بالامەن بىرگە اۋرۋحاناعا الىپ كەتەدى. تورتەۋى دە ەسىن اۋرۋحانادا جيناپ, بىرنەشە كۇن ەمدەلدى.
تاڭ الدىندا ەلەكتر توگىنىڭ قىسقا تۇيىقتالۋىنان بولعان ءورت ءاپ-ساتتە ءبىر ءۇيدىڭ ءتورت ادامىنىڭ ومىرىنە وسىلايشا قاتەر ءتوندىردى. جۇمىسقا بارا جاتقان پوليتسەي تەرەزەدەن شىققان ءتۇتىندى كورىپ, جەدەل ارەكەت ەتپەگەندە, ءتورت جان ءورت ىشىندە قالار ما ەدى؟
قاراۋىلكەلدى اۋىلىنىڭ تۇرعىندارى تابىن بوكەنباي باتىر كوشەسىندە بولعان الاپات ءورتتى ۇمىتقان ەمەس. وسى جاعدايدى ەستي سالا جۇمىس ورنىنان جەتكەن ءۇيدىڭ وتاعاسى مەن ۇلكەندەرى ادىلقاھارعا العىسىن جاۋدىردى. جازدا ورتەنگەن ءۇيدى ءسۇرىپ تاستاپ, كورشىنىڭ ءۇيىن ساتىپ الدى. بۇلار ءالى دە كورشى. ادىلقاھار امان قالعان ءۇش بالا ءۇشىن الەمدەگى ەڭ باتىر, ەڭ كۇشتى ادامعا اينالدى. باتىر پوليتسەي وسى وقيعانى ەسكە العىسى دا كەلمەيدى.
«سول كۇنى مەنىڭ ورنىمدا بولعان كەز كەلگەن ادام وسىلاي ارەكەت ەتەر ەدى. شىنىمدى ايتسام, اۋىلداعى ءورت وقيعاسىنىڭ جاريا بولعانىن قالامادىم. الەۋمەتتىك جەلىگە قالاي شىعىپ كەتكەنىن دە بىلمەيمىن. بىرەۋلەر سالعان بولار. اۋرۋحانادا جاتقانىمدا الەۋمەتتىك جەلىدەگى جازبالاردى جىبەردى. ورتكە قالاي كىرگەنىمدى عانا بىلەمىن. باسقاسى ەسىمدە جوق», دەيدى باتىر پوليتسەي.
شەشىمدى دە, كەسىمدى ادامنىڭ ءسوزى. كوزسىز ەرلىك جاريالىلىقتى سۇيمەيدى. ەرلىك – ويلانۋعا ۋاقىت تا, مۇمكىندىك تە جوق كەزدە جاسالاتىن ارەكەت. ەرلىكتىڭ قاراپايىم ەرەجەسى – وسى. ادىلقاھار ءتىپتى فوتوسۋرەتىن جاريالاعاندى دا قاجەت ەتپەدى. 2014 جىلدان بەرى بايعانين اۋداندىق ىشكى ىستەر بولىمىندە قىزمەت ەتەتىن قاراپايىم جىگىتتىڭ ومىرلىك ۇستانىمى – وسىنداي.
اقتوبە وبلىسى