«الەم حالىقتارىنىڭ ەرتەگىلەرى» اتتى انتولوگيا 1961 جىلى نيۋ-يوركتەگى Putnam’s Sons باسپاسىنان اعىلشىن تىلىندە جارىق كورگەن. بۇل انتولوگياعا قازاق ەرتەگىسى رەتىندە «الدار كوسەنىڭ سيقىرلى تونى» ەنگەن.
اتالعان كىتاپتاعى ەرتەگىلەردى ۆلاديسلاۆ ستانوۆسكي مەن جەن ۆلاديلاۆ قۇراستىرعان, ال Jean Layton ەسىمدى امەريكالىق اۋدارماشى اعىلشىن تىلىنە تارجىمەلەگەن. انتولوگيا دجوردج ۆاشيڭتون ۋنيۆەرسيتەتىنىڭ گەلمان اتتى باستى كىتاپحاناسىندا ساقتاۋلى تۇر.
كىتاپقا سەگىزىنشى ەرتەگى رەتىندە ەنگەن «الدار كوسەنىڭ سيقىرلى تونىمەن» بىرگە كەلەسى بەتىنە وسى ەرتەگىنىڭ وزبەك حالقىنا تيەسىلى تاعى ءبىر نۇسقاسى بەرىلگەن. اۆتورلار اتالعان ەرتەگىنىڭ ورتالىق ازياداعى تۇركى حالىقتارى اراسىندا كەڭ تارالعانىن ەسكەرىپ, وقىرمانداردىڭ سالىستىرىپ وقۋىنا مۇمكىندىك تۋعىزىپ, ارناۋلى تۇردە قاتار كىرىستىرگەنى دە كوڭىلگە قونىمدى. قالاي دەسەك تە, وسىدان 63 جىل بۇرىن «الدار كوسە» ەرتەگىسىنىڭ امەريكاعا بارۋى ءبىز ءۇشىن قۋانارلىق جاعداي ەكەنى راس.