جەتىسۋ وڭىرىندە الەۋمەتتىك سالا نىساندارىن جاڭارتۋ, قايتا سالۋ جۇمىستارى قارقىندى جۇرگىزىلىپ جاتىر. جاڭا وبلىس قۇرىلعالى بار-جوعى ءۇش جىلعا جۋىقتاسا دا, اتقارىلعان جۇمىس اسا اۋقىمدى. سونىڭ باسىم بولىگى الەۋمەتتىك سالالارعا باعىتتالعان.
وتكەن جىلى بىرنەشە زاماناۋي عيمارات ءبىلىم, دەنساۋلىق ساقتاۋ, مادەنيەت, سپورت, الەۋمەتتىك قورعاۋ سالالارىندا قولدانىسقا بەرىلگەن ەدى. بيىل دا اۋىل-ايماقتاردا حالىققا قاجەت جاڭا نىساندار كوپتەپ سالىنادى دەپ جوسپارلانىپ وتىر. ايتالىق, 1055 ورىندىق 13 بالاباقشا اشىلادى. وبلىس اكىمى ءباسپاسوز قىزمەتىنىڭ مالىمەتىنە سۇيەنسەك, 2024 جىلى 914 ورىندىق 12 بالاباقشا, 150 ورىندىق 5 شاعىن ورتالىق جانە قوسىمشا 594 ورىن اشىلدى. وڭىردە 2–6 جاس ارالىعىنداعى بالالاردى مەكتەپكە دەيىنگى تاربيەمەن, وقىتۋمەن قامتۋ 94,4%, ال 3–6 جاس ارالىعىنداعىلاردى قامتۋ 98,8%-دى قۇرايدى.
جاركەنت قالاسىندا 1200 ورىندىق العاشقى جايلى مەكتەپ اشىلدى, سونداي-اق كوكسۋ اۋدانىنىڭ قاراتال اۋىلىندا 120 ورىندىق مەكتەپ پايدالانۋعا بەرىلدى. بۇدان وزگە, كوكسۋ اۋدانىنا قاراستى بالپىق بي اۋىلىنداعى بۇرىنعى سپورت مەكتەبىنىڭ عيماراتىن بالاباقشا رەتىندە قايتا جاڭعىرتۋ, ءتورت مەكتەپتە كۇردەلى جوندەۋ جۇمىستارى اياقتالدى.
وڭىردە دەنساۋلىق ساقتاۋ ينفراقۇرىلىمى دا ايتارلىقتاي جاقسارىپ كەلەدى. اتاپ ايتقاندا, سالادا 16 نىساننىڭ قۇرىلىسى مەن كۇردەلى جوندەۋ جۇمىستارى جۇرگىزىلىپ جاتىر. پانفيلوۆ اۋدانى شەجىن اۋىلىنداعى فەلدشەرلىك-اكۋشەرلىك پۋنكتتىڭ قۇرىلىسى, كوكسۋ, پانفيلوۆ, سارقان اۋداندارىنداعى ءۇش نىساننىڭ كۇردەلى جوندەۋ جۇمىستارى اياقتالدى. كەربۇلاق اۋدانىنىڭ سارىوزەك اۋىلىندا 250 ادام قابىلدايتىن ەمحانا ىسكە قوسىلدى. قاراتال اۋدانىنىڭ ورتالىق اۋرۋحاناسىنىڭ «ا» بلوگى كۇردەلى جوندەۋدەن وتكىزىلدى.
الاكول اۋدانى بيباقان, قوڭىر, ارقارلى اۋىلدارىندا, ەسكەلدى اۋدانىنىڭ ەكپىندى, جاڭالىق اۋىلدارىندا, كەربۇلاق اۋدانىنىڭ ونجاس, كوكساي, قازانسۋ, تاستىباستاۋ, قارلىعاش, رۋدنيك-ارقارلى اۋىلدارىندا, جولامان ستانساسىندا, سارقان اۋدانى چەركاسسك, اباي, امانبوكتەر اۋىلدارىندا, كوكسۋ اۋدانىنىڭ پچ-45 ەلدى مەكەنىندە, تەكەلى قالاسىندا جالپى سانى 17 بلوكتى-ءمودۋلدى مەديتسينالىق كەشەن ورناتىلدى. «اۋىلداعى دەنساۋلىق ساقتاۋدى جاڭعىرتۋ» ۇلتتىق جوباسى اياسىندا وڭىردە 59 نىساننىڭ قۇرىلىسى جۇرگىزىلىپ جاتىر, ونىڭ 15-ءى دارىگەرلىك امبۋلاتوريا, 39-ى فەلدشەرلىك-اكۋشەرلىك, 5-ءى مەديتسينالىق پۋنكت.
سپورت سالاسى بويىنشا تەكەلى قالاسىندا دەنەشىنىقتىرۋ-ساۋىقتىرۋ كەشەنىنىڭ, سارقان اۋدانىنىڭ المالى اۋىلىندا سپورت كەشەنىنىڭ قۇرىلىسى اياقتالدى. تالدىقورعان قالاسىندا ورتالىق ستاديون قايتا جاڭارتىلدى. سونداي-اق قاراتال اۋدانىنىڭ كوپبىرلىك, تاستوبە, ەسكەلدى بي اۋىلدارىندا, كەربۇلاق اۋدانىنىڭ قىزىلجار اۋىلىندا 3 بلوكتى-ءمودۋلدى كەشەندەر ورناتىلدى. وعان قوسا تالدىقورعاندا ەلىمىزدە بالاماسى جوق «جەتىسۋ» كاسىبي ۆولەيبول كلۋبىنا ارنالعان ۆولەيبول ورتالىعى, سونداي-اق ينۆەستور ەسەبىنەن سپورتشىلارعا ارناپ سالىنعان ءتورت قاباتتى تۇرعىن ءۇي پايدالانۋعا بەرىلدى.
جالپى, حالىقتىڭ 1 مىڭ ادامعا شاققانداعى سپورتتىق ينفراقۇرىلىممەن قامتاماسىز ەتىلۋى – 64%, دەنەشىنىقتىرۋمەن, سپورتپەن جۇيەلى تۇردە اينالىساتىن حالىقتىڭ ۇلەسى وبلىس حالقىنىڭ جالپى سانىنىڭ 42%-ىن قۇرايدى.
وبلىس ورتالىعىندا زەينەتكەرلىك جاستاعى ازاماتتارعا ساپالى قىزمەت كورسەتۋ ماقساتىندا بەلسەندى ۇزاق ءومىر ءسۇرۋ ورتالىعى اشىلدى. مۇندا 40-قا تارتا ادام جۇمىس ىستەيدى ءارى قارتتارعا 12 ءتۇرلى قىزمەت كورسەتەدى.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ەرمەك ميزامباەۆتىڭ ايتۋىنشا, وبلىس ورتالىعى تالدىقورعان قالاسىنىڭ وزىندە 25 مىڭعا جۋىق زەينەتكەر تۇرادى, سوندىقتان وبلىس اكىمىنىڭ تاپسىرماسىمەن «ەڭبەك رەسۋرستارى جانە بەلسەندى ۇزاق ءومىر ءسۇرۋ ورتالىعى» كمم قۇرۋ تۋرالى شەشىم قابىلدانعان.
«بەلسەندى ۇزاق ءومىر ءسۇرۋ ورتالىعى جۇمىسىنىڭ نەگىزگى ماقساتى – مادەني, شىعارماشىلىق, سپورتتىق, ىسكەرلىك قابىلەتتەرىن شىڭداۋ ارقىلى زەينەت جاسىنداعى ادامداردىڭ فيزيكالىق, پسيحيكالىق ساۋلىعىن نىعايتۋ. ورتالىققا كۇن سايىن 250-دەن استام ادام كەلەدى. جىل ىشىندە ورتالىققا كەلۋشىلەردىڭ قاتىسۋىمەن 50-دەن استام ءتۇرلى ءىس-شارا, سونداي-اق اقسۋ, كەربۇلاق, قاراتال اۋداندارىنىڭ كيەلى ورىندارىنا, تاريحي نىساندارىنا ەكسكۋرسيالار, اباي وبلىسىنىڭ سەمەي قالاسىنا ساپار ۇيىمداستىرىلدى. تالدىقورعاننىڭ زەينەتكەرلىك جاستاعى كەز كەلگەن تۇرعىنى ءبىزدىڭ ورتالىققا كەلە الادى, مۇندا بارلىق قىزمەتتەر تەگىن. تەك جەكە كۋالىگى مەن زەينەتكەر كۋالىگىن الىپ كەلۋى كەرەك», دەيدى «ەڭبەك رەسۋرستارى جانە بەلسەندى ۇزاق ءومىر ءسۇرۋ ورتالىعى» كمم باسشىسى اسەت ورازبەك ۇلى.
مۇنداعى قولايلى جاعدايعا قالىڭ كوپشىلىك ءدان ريزا. ورتالىقتان قىزمەت الاتىن ارداگەر سايرا احمەتوۆا: «مەن بەلسەندى ۇزاق ءومىر ءسۇرۋ ورتالىعىنا اشىلعاننان بەرى تۇراقتى كەلەمىن. فيتنەسپەن, يوگامەن, بيمەن اينالىسامىن. ەمدىك ماسساج كۋرسىنان ءوتتىم. ءبىر جاعىنان دەنساۋلىققا پايدالى, ەكىنشىدەن ارالاساتىن ورتاڭ كەڭەيەدى, بۇل ءبىز ءۇشىن وتە ماڭىزدى. قالاساق, ءتىل ۇيرەنۋگە دە جاعداي جاسالعان. ورتالىقتىڭ ەسىگى كەلۋشىلەرگە تاڭەرتەڭنەن كەشكە دەيىن اشىق. ونى قۇرۋعا, جۇمىسىن جۇرگىزۋگە قاتىسقان ازاماتتاردىڭ بارلىعىنا العىسىمدى بىلدىرەمىن», دەيدى.
ايتا كەتەيىك, «ينۆاتاكسي» قىزمەتىنىڭ سانى 18-دەن 32-گە دەيىن ءوستى. بيىلعى جىلعا تالدىقورعاندا ەرەكشە قاجەتتىلىگى بار ازاماتتارعا ارنالعان 150 ورىندى وڭالتۋ ورتالىعىنىڭ قۇرىلىسىن جۇرگىزۋ جوسپارلانعان.
وڭىردە مادەنيەت سالاسى دا قاشاندا نازاردا. اقسۋ اۋدانىنا قاراستى ەسەبولاتوۆ, ماتاي, اراسان اۋىلدارىندا, ەسكەلدى اۋدانىنىڭ قاراتال اۋىلىندا, كوكسۋ اۋدانىنىڭ جارلىوزەك اۋىلىندا 5 مادەنيەت نىسانى سالىنىپ جاتىر. سونىڭ ىشىندە ەسكەلدى اۋدانىنىڭ قاراتال اۋىلىنداعى مادەنيەت ءۇيىنىڭ قۇرىلىسى اياقتالدى, قالعان نىسانداردىڭ قۇرىلىسى بيىل جالعاسادى.
ەسكەلدى اۋدانى قوڭىر, جالعىزاعاش اۋىلدارىندا, قاراتال اۋدانىنىڭ ەسكەلدى بي اۋىلىندا 3 بلوكتى-ءمودۋلدى مادەنيەت وبەكتىسى ورناتىلدى. جاقىندا تاعى 5 بمك ورناتىلادى. اقسۋ اۋدانىنىڭ كوشكەنتال اۋىلىندا, كەربۇلاق اۋدانىنىڭ قوعالى, قاراشوقى اۋىلدارىندا ءۇش اۋىلدىق مادەنيەت ۇيىنە كۇردەلى جوندەۋ جۇمىستارى اياقتالدى. تاعى بەس نىساندى كۇردەلى جوندەۋ جالعاسىپ جاتىر.
جەتىسۋ وبلىسى