پرەمەر-مينيستر ولجاس بەكتەنوۆ ۇشاق اپاتى بولعان جەردە جۇمىس ىستەپ جۇرگەن ۇكىمەتتىك كوميسسيانىڭ باياناداماسىن تىڭدادى, دەپ حابارلايدى Egemen.kz.
قۇتقارۋ قىزمەتتەرى ىزدەستىرۋ جۇمىستارىن اياقتاعانى حابارلاندى. قايعىلى وقيعادان 38 ادام اجال قۇشتى, 29 ادام اۋرۋحاناعا جەتكىزىلدى. بارلىق زارداپ شەككەندەر تەكسەرىلىپ, قاجەتتى كومەك كورسەتىلدى.
وسى ورايدا ولجاس بەكتەنوۆ اۆياتسيالىق قاۋىپسىزدىكتى كۇشەيتۋ بويىنشا بىرقاتار تاپسىرما جۇكتەدى.
«بۇل قايعىلى وقيعا بىزگە دە ۇشۋ قاۋىپسىزدىگى بويىنشا بەلگىلى ءبىر شارالار قابىلداۋ كەرەكتىگىن كورسەتەدى. ەڭ الدىمەن, جوسپاردان تىس تەكسەرۋ جۇرگىزىپ, اۋەجايلار مەن اۋە كەمەلەرىنىڭ تەحنيكالىق جاي-كۇيىن ەرەكشە باقىلاۋعا الۋ قاجەت. وتكىزىلەتىن ءىس-شارالار شەڭبەرىندە ءبىزدىڭ اۆياكومپانيالاردىڭ اۋە كەمەلەرى ەكيپاجدارىنىڭ بىلىكتىلىگىن, رۇقساتىن جانە قۇزىرەتتىلىگىن ەكى رەت تەكسەرۋ قاجەت. اۋە وقيعالارىنا جەدەل دەن قويۋ ماقساتىندا اۆاريالىق-قۇتقارۋ جۇمىستارىنىڭ تەتىگىن جەتىلدىرۋ جانە مۇددەلى مەملەكەتتىك ورگانداردىڭ ۇيلەستىرىلگەن جۇمىسىن قامتاماسىز ەتۋ قاجەت. بۇل جاعدايدان بولاشاقتا بۇعان جول بەرمەۋ ءۇشىن ناقتى ۇسىنىستار جاساي وتىرىپ دۇرىس قورىتىندى جاساۋ كەرەك», دەدى پرەمەر-مينيستر.
ەستەرىڭىزگە سالا كەتەيىك, 25 جەلتوقسان كۇنى جەرگىلىكتى ۋاقىت بويىنشا ساعات 11:30-دا باكۋدەن (ازەربايجان) گروزنىيعا (رەسەي) ۇشقان ازەربايجان اۋە جولدارىنىڭ ۇشاعى اقتاۋدان ءۇش شاقىرىم جەردە اپاتقا ۇشىرادى. جولاۋشىلار ۇشاعى قالىڭ تۇمان سالدارىنان گروزنىيعا قونا الماي, اۋەلى ماحاچكالاعا, كەيىن اقتاۋعا باعىت العان ەدى.