رايىمبەك اۋدانى سارىباستاۋ اۋىلىندا جاڭا سپورت كەشەنى اشىلدى. الماتى وبلىستىق قۇرىلىس باسقارماسىنىڭ تاپسىرىسىمەن بوي كوتەرگەن نىساندى باس مەردىگەر «سپ «NEFT» جشس ءبىر جارىم جىل ىشىندە حالىقارالىق, زاماناۋي تالاپتارعا سايكەس ەتىپ سالىپ شىعىپ, قولدانىسقا بەردى.
«جاڭا نىسان جەرگىلىكتى ينفراقۇرىلىمنىڭ دامۋى مەن ءوڭىر تۇرعىندارىنىڭ سپورتپەن اينالىسۋىنا سونى سەرپىن بەرەدى. مەملەكەت باسشىسىنىڭ حالىقتىڭ سالاماتتى ءومىر سالتىن جاقسارتۋ باعىتىنداعى تاپسىرمالارىن ورىنداۋدا الماتى وبلىسى دا بەلسەندىلىك تانىتىپ كەلەدى. قالالىق جەرلەردەن بولەك, شالعاي ايماقتاردا دا سپورتتىق نىسانداردى سالىپ, اۋىل بالالارىنىڭ تەگىن سپورت سەكتسيالارىنا قاتىسۋىنا جان-جاقتى مۇمكىندىك قاراستىرىپ جاتىرمىز», دەگەن الماتى وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى ەربولات سارابەكوۆ تۇرعىنداردى مەرەيلى مەرەكەمەن قۇتتىقتادى.
سپورتتىق نىساننىڭ سالتاناتتى اشىلۋىنا پاريج وليمپياداسىنىڭ گرەك-ريم كۇرەسىنەن كۇمىس جۇلدەگەرى دەمەۋ جادىراەۆ قاتىستى.
«سوڭعى ۋاقىتتا سپورتتىق كەشەندەر مەن الاڭدار بالالاردىڭ دا, ەرەسەكتەردىڭ دە سۇيىكتى ورنىنا اينالدى. حالىقارالىق ارەنادا ۇلكەن جەتىستىكتەرگە جەتسىن دەسەك, بالالاردى جاستايىنان سپورتقا بەيىمدەۋ ۇزدىكسىز جۇرگىزىلۋگە ءتيىس. رايىمبەك اۋدانىنان بىلىكتى سپورتشىلار شىققان. ماسەلەن, رۋسلان جۇمابەكوۆ, ارداق نازاروۆ, بەيبىت نازاروۆ, جاسۇلان قىدىرباەۆ سىندى شەبەر سپورتشىلاردىڭ ەسىمى ەرەكشە اتالادى. الداعى ۋاقىتتا دا ءدال وسىنداي سپورت عيماراتىندا شىنىققان جاستار وليمپيادا جەڭىمپازدارى بولاتىنىنا سەنىمىم مول», – دەدى ول.
70 ورىندىق قۇرىلىستىڭ جالپى قۇنى 1 ملن 336,6 مىڭ تەڭگەنى قۇرايدى. سپورت كەشەنىندە بوكس, كۇرەس, جاتتىعۋ زالدارى, سونداي-اق كوماندالىق سپورت تۇرلەرىنە ارنالعان زال قاراستىرىلعان. جالپى اۋدانى 2253,3 شارشى مەتر عيماراتتا جاس سپورتشىلار مەن جاتتىقتىرۋشىلارعا بارىنشا قولايلى جاعداي جاسالعان. مۇندا اۋىل بالالارى سپورتتىڭ بىرنەشە تۇرىنەن جاتتىعادى.
بۇگىندە وبلىستا 1891 سپورت نىسانى جۇمىس ىستەيدى. 2025 جىلى قولعا الىنۋى ءتيىس 15 سپورت نىسانىنىڭ جوبالىق-سمەتالىق قۇجاتتاماسى ازىرلەنىپ جاتىر.
الماتى وبلىسى