پرەمەر-مينيستر ولجاس بەكتەنوۆ Dalian Hesheng Holdings Group Co., Ltd. كومپانيالار توبىنىڭ باسقارما توراعاسىنىڭ ورىنباسارى ما حۋنحان باستاعان قىتاي دەلەگاتسياسىمەن كەزدەسۋ وتكىزدى. اگروونەركاسىپ كەشەنى سالاسىنداعى ينۆەستيتسيالىق ىنتىماقتاستىق ماسەلەلەرى, سونداي-اق كومىر حيمياسى مەن ماشينا جاساۋ سالالارىنداعى ءوزارا ءىس-قيمىل كەلەشەگى تالقىلاندى.
قىتايلىق كوپسالالى Dalian Hesheng Holdings كومپانياسى بيدايدى وڭدەۋ جانە اشىتۋ سالاسىنداعى تەحنولوگيالىق پاتەنتتىڭ يەگەرى سانالادى جانە وزىق تسيفرلىق تەحنولوگيالاردى پايدالانادى. اقمولا وبلىسىندا بيدايدى تەرەڭدەتە وڭدەۋ بويىنشا تىگىنەن كىرىكتىرىلگەن ونەركاسىپتىك پارك قۇرىلىسىنىڭ جاڭا ينۆەستيتسيالىق جوباسىن ىسكە اسىرۋ جوسپارلانىپ وتىر. ءبىرىنشى كەزەڭدە ينۆەستيتسيا كولەمى 500-800 ملن دوللاردى قۇراسا, جوبانى ىسكە اسىرۋدىڭ ەكىنشى جانە ءۇشىنشى كەزەڭدەرى تاعى 1 ملرد دوللارعا باعالانۋدا. العاشقى كەزەڭدە قايتا وڭدەۋ قۋاتى جىلىنا 3 ملن تونناعا دەيىن ءوسۋ پەرسپەكتيۆاسىمەن 1 ملن توننانى قۇرايدى. 2 مىڭعا جۋىق جۇمىس ورنى اشىلادى.
جوبادا كومىر جىلۋ ەلەكتر ستانساسى مەن كومىر حيمياسى كەشەنىنىڭ قۇرىلىسى دا قاراستىرىلعان. كومىردى قايتا وڭدەۋ ناتيجەسىندە جىلىنا 150-400 مىڭ توننا سۇيىق اممياك الىنادى دەپ كۇتىلىپ وتىر.
جالپى, جاڭا اگروجوبانى ىسكە اسىرۋ مۋلتيپليكاتيۆتى اسەر بەرەدى, اۋىل شارۋاشىلىعىن جاڭعىرتۋعا ىقپال ەتەدى, سونداي-اق لوگيستيكا جانە ساۋدا سەكىلدى ەنشىلەس سالالاردىڭ دامۋىنا سەرپىن بەرەدى.
پرەمەر-مينيستر استىق جيناۋدا رەكوردتىق كورسەتكىشتەرگە قول جەتكىزۋدى ەسكەرە وتىرىپ, بيدايدى قايتا وڭدەۋدى بەلسەندى تۇردە ارتتىرۋدىڭ ماڭىزدى ەكەنىنە توقتالدى.
«قازاقستان – اگرارلىق سەكتورى دامىعان ەل. ءبىز قوسىلعان قۇنى جوعارى ءونىم شىعارۋدى ارتتىرۋعا ۇمتىلامىز. بۇل – ءبىزدىڭ ەلىمىز ءۇشىن باسىم باعىت. ۇكىمەت ءوندىرىستى لوكليزاتسيالاۋعا جانە وزىق تەحنولوگيالاردى ترانسفەرتتەۋگە باعىتتالعان», دەپ اتاپ ءوتتى و.بەكتەنوۆ.
Dalian Hesheng قىتايلىق كومپانيالار توبى باسقارما توراعاسىنىڭ ورىنباسارى ما حۋنحان ءوز كەزەگىندە قازاقستانداعى ىنتىماقتاستىق پەن ءوندىرىستى دامىتۋ كەلەشەگىن جوعارى باعالادى. قولايلى ىسكەرلىك احۋال جانە بيزنەستى جۇرگىزۋگە جاسالعان جاعداي اتاپ ءوتىلدى. ما حۋنحان زاۋىتتىڭ قۇرىلىسىن 2025 جىلدىڭ ەكىنشى توقسانىنا جوسپارلانىپ وتىرعانىن ايتتى.
سونداي-اق كەزدەسۋ بارىسىندا Dalian Hesheng Holdings Group كومپانياسىنىڭ اگرارلىق باعىت جونىندەگى باسقارما توراعاسى يۋي يۋفەي, بيداي بيوفەرمەنتاتسياسىنىڭ بىرەگەي تەحنولوگياسىن ازىرلەۋشى جانە سالاداعى وزىق شەشىمدەردىڭ اۆتورى, اعا ينجەنەر شۋ سونگپو ءسوز سويلەدى.
كەزدەسۋ قورىتىندىسى بويىنشا پرەمەر-مينيستر مۇددەلى مەملەكەتتىك ورگاندارعا قىسقا مەرزىمدە قىتايلىق ارىپتەستەرمەن ينۆەستيتسيالىق كەلىسىم جاساۋ بويىنشا ءتيىستى جۇمىستار جۇرگىزۋدى تاپسىردى.