استانا قالاسىندا Euronews تەلەارناسىنىڭ وڭىرلىك كەڭسەسى سالتاناتتى تۇردە اشىلدى.
اشىلۋ سالتاناتىندا ءسوز سويلەگەن مادەنيەت جانە اقپارات ءمينيسترى ايدا بالاەۆا Euronews كەڭسەسىنىڭ اشىلۋى قازاقستاننىڭ اقپارات سالاسى ءۇشىن ماڭىزدى وقيعا ەكەنىن اتاپ ءوتتى. مينيستر بۇل تەك گەوگرافيالىق اۋقىمدى كەڭەيتۋ ەمەس, سونداي-اق قازاقستاننىڭ باي مادەني مۇراسىن, زاماناۋي جەتىستىكتەرىن الەمگە كورسەتۋگە بەرىلگەن جاڭا مۇمكىندىك ەكەنىن ايتتى.
«مەملەكەت باسشىسى قازاقستاندىق مادەنيەتتى, تۋريستىك جانە ينۆەستيتسيالىق الەۋەتتى حالىقارالىق دەڭگەيدە تانىستىرۋدى تاپسىرعان بولاتىن. مەنىڭ ويىمشا, بۇل كەڭسەنىڭ اشىلۋى وسى جۇمىستارعا جاڭا سەرپىن بەرەتىنى ءسوزسىز. بۇل كەڭسە مادەنيەتتەر اراسىنداعى ديالوگ الاڭىنا اينالىپ, جاڭا يدەيالار مەن كرەاتيۆتى شەشىمدەردى ىلگەرىلەتۋگە ۇلەس قوسادى. بۇل باستاما ارقىلى تەك ءوزارا تۇسىنىستىكتى ارتتىراتىن عانا ەمەس, جاھاندىق مەديا كەڭىستىكتى بايىتاتىن جوبالار دۇنيەگە كەلەتىنىنە سەنىمدىمىن», دەدى مينيستر.
بىرلەسكەن ىنتىماقتاستىق اياسىندا Euronews 39 ميلليوننان اسا كورەرمەندى قامتىعان كوشپەلىلەر ويىندارىنىڭ ماتەريالدارىن ترانسلياتسيالادى. سونداي-اق قازاق حالقىنىڭ مادەني مۇراسى مەن ينۆەستيتسيالىق جوبالارى تۋرالى 10 باعدارلاما, حابارلار مەن سۇحباتتار جاريالاندى.
«قازاقتار – ۇلى دالا وركەنيەتىنىڭ مۇراگەرلەرى, ورتالىق ەۋرازياداعى كوكپارشى كوشپەلى حالىقتاردىڭ مەملەكەتتىلىك ءداستۇرىنىڭ ءىزباسارلارى. قازاق حاندىعى 1465 جىلى التىن وردا كۇيرەگەننەن كەيىن قۇرىلىپ, كەيىننەن تاۋەلسىز مەملەكەت رەتىندە قازىرگى قازاقستاننىڭ قالىپتاسۋىنا اكەلدى. كەلەسى جىلى قازاقستان ءوز تاۋەلسىزدىگىنىڭ 35 جىلدىعىن اتاپ وتەدى. قازىرگى تاڭدا قازاقستان 20 ميلليون حالقى بار الەمدەگى ەڭ ءىرى 40 ەكونوميكا قاتارىنان ورىن الىپ, كوپتەگەن ەكونوميكالىق جانە ساياسي رەفورمالارمەن ۇلگى بولارلىق جولدى كورسەتىپ وتىر. پرەزيدەنت قاسىم-جومارت توقاەۆتىڭ جەتەكشىلىگىمەن بىرنەشە ساياسي رەفورمالار تابىستى جۇزەگە اسىرىلدى. وسى وزگەرىستەردىڭ ارقاسىندا بۇگىن تاريحي ءسات – استاناداعى Euronews كەڭسەسىنىڭ اشىلۋ سالتاناتىنا جينالىپ وتىرمىز. ءبىز قازاقستاننىڭ ەكونوميكاسى, مادەنيەتى جانە مۇراسى تۋرالى حالىقارالىق اۋديتوريانى اقپاراتتاندىرۋعا باعىتتالعان جۇمىستاردى جالعاستىرامىز. قازاقستاندىق كاسىپكەرلەرمەن, سۋرەتشىلەرمەن جانە تالانتتارمەن جۇمىس ىستەپ, قازاقستاننىڭ جاڭا شىندىعىن جانە جارقىن بولاشاعىن كورسەتەتىن ءۇش تۇپنۇسقالىق تەلەشوۋ ازىرلەيمىز», دەدى ءوز كەزەگىندە «Euronews» ديرەكتورلار كەڭەسىنىڭ توراعاسى پەدرو ۆارگاس.
ىنتىماقتاستىقتىڭ ماڭىزدى بولىگى – Euronews academy جوباسىن جۇزەگە اسىرۋ. ونىڭ اياسىندا وتاندىق جۋرناليستەرگە شەتەلدىك سپيكەرلەردىڭ قاتىسۋىمەن وفلاين ترەنينگتەر مەن ماستەر-كلاسستار ۇيىمداستىرىلادى. بۇل قازاقستاندىق باق وكىلدەرىنىڭ كاسىبي داعدىلارىنا وڭ اسەرىن تيگىزەدى.
قازىرگى ۋاقىتتا 20 جوبانى ىسكە اسىرۋ بويىنشا جۇمىس جۇرگىزىلىپ جاتىر. ولاردىڭ قاتارىندا مادەنيەت, ونەر جانە ءومىر سالتى تۋرالى «Modern Nomads» شوۋى, بيزنەس پەن ەكونوميكاعا ارنالعان وڭىرلىك شوۋ – «East-West Connect», سونداي-اق وڭىرلىك تۇلعالارمەن سۇحباتتار – «Voices from Central Asia» جوبالارى بار.